EZEKIYEL 11

Kitata kay sa ŋulona vi Israyel

1Ŋusta slan goyo, na' tuɗan hay vun-ziyda vi Ma-Vatɗina, hay vuna' ma gal kuɗuwna. Nan ɗuw hay vun-ziyd kayni, sumun ka dok-ma' yam vasl; jarsiya nan wi Yaazaniya goora vi Azzur, hiɗi Pelatiya, goora vi Benaya, sa ŋulona vi sumuna. 2Ma-Vatɗina di tanu: Goora vi sana, sumun kayni diksi suluku, nisi ɗek yal ma joona mi sum sa hay hoyok-ziyn tanna. 3Nisi di'e: Liyn may kay in ziy wulin tuwaɗi, hoyok-ziyna ti doŋolayta, nay mi sliwn may. 4Kuɗ na'ta kayni daŋ vun-jobta katsiya, daŋ vun-jobta, goora vi sana.

5Ki kayn nala ŋusta vi Ma-Vatɗina co kanu, na' di tanu:

Daŋ va ma Ma-Vatɗin dumna:

Daŋ ala: Nigi ka di nala,

jafna vi sa Israyella,

va ma kal goy hay varta vigina nan wumu.

6Nigi ci sumuna vigiyawa ŋolo hay hoyok-ziyn tani,

nigi hob hagana vi hoyok-ziynawa hiɗi tuw sum sa mitina.

7Kuɗ na'ta kayni Bum-Sumuna Ma-Vatɗina vigi ka di ala:

Tuw sum sa mitina vigiya

sa nigi molsi goy hay hagata vi hoyok-ziyn kayni,

nisi mi sliwna,

hoyok-ziyna mi doŋolayna may;

may nigiya, nisi ma cukgi goyo.

8Nigi li nar kay kew-gaferaŋa;

Awa ŋaa'a! Nala nan ma mar kew-gaferaŋ gaa kigiya,

Dita vi Bum-Sumuna Ma-Vatɗina.

9Nan ma cukgi goy hay hoyok-ziyn pa,

nan ma vulgi goy hay ɓam sum sa pulla.

Nan ma hob vun kitata van katgiya kaw.

10Kew-gaferaŋa ma cukgi gaa'a,

nan ma ka kitat kigiya kalaf hay nagata vi Israyel,

nigi ma wi ala nanu mi Ma-Vatɗina.

11hoyok-ziyna ma muɗ ɗawni ti doŋolayta vigi loɗi,

nigi hayɗin ma muɗ kalaf hay hoyok-ziyn ɗawni mi sliwna.

Nan ka kitat kigi ɗawni kalaf hay vun-nagata vi Israyel.

12Nala nigi ma wi ala nanu mi Ma-Vatɗina,

nigi min tap kuɗ ɗota-gatta vanɗi,

nigi min vi kuɗ dita vanɗi;

may nigi li kayni ŋray ca ki sum sa ŋuyi katgin ka li nala.

13Hay li ma nan ka di vun-jobta zaw kayni, Pelatiya goora vi Benaya mita. Nan dab vokan gaa kay nagata, nan siwel hiɗi delan kulo ŋolo ala: Hih! Bum-Sumuna Ma-Vatɗina, mar cimta-goyta kay caw gurona vi Israyel ma hin goyn kayn mi naŋu!

Deŋga tam sum sa kalay goy gorvona

14Ma-Vatɗina ka di dit tan ala:

15Goora vi sana,

nisi kayni si ɓosiyoŋŋa,

ɓosiyoŋŋa, sa hay jafna vaŋu,

hiɗi jafna vi Israyel noŋ kafe,

nisi sa jafna vi Yerusalem di tisi ala:

Lakgi goy gine hiɗi Ma-Vatɗina,

nagat kayni vuli muma numa'a.

16Kay na'ta naŋ ma di ala:

Ki kayn nala Bum-Sumuna Ma-Vatɗina di'e:

La nan vi tuwan goy gine hiɗi jaf-sum nisina,

la nan mersi goy hay nagat ŋolo,

hay liyn mara'a nan ma muɗ mi liyn ma peldetna visiya,

hay nagata ta nisi may haya' pata.

17Kuɗ kayni naŋ ma di tisi ala:

Bum-Sumuna Ma-Vatɗina ka di ala:

Nan ma tapgi kulo jar sumuna,

nan ma yawgiyay goy hay naga ma nigi meray goy hayamna pa,

nan ma vulgi nagata vi Israyel.

18Nisi ma coy goy ɗawn pa,

liwista hiɗi joot kaf nisi ma yawa' goyo,

19nan ma vulsi dikga ta kepta,

nan tun ŋusta ta wuliya hay diksiya.

Nan min sli goy haysiya dikga ta ɗeŋe

ki hiɗiyn nala,

nan ma vulsi dikga ta lumaɗiya.

20Kay nisi ma li kuɗ ɗota-gatta vanu,

kay nisi ma tap kuɗ dita vanu,

nisi ma muɗ si sumuna vanu,

nan ma muɗ mi Lawna visiya kaw.

Vatta vi va ma vul tuwam kir Ezekiyel

21May nisi sa diksi tapay kuɗ liwista hiɗi joota visiya,

nan ma hin lopna visiya nig gaa kisiya,

Din mi Bum-Sumuna Ma-Vatɗina.

Vatta vi slen ma vul tuwam kir Ezekiyel, gajijita vi Lawn hin Yerusalem

22Sa kerubena, hiɗi sem-keken tapay kuɗsiya, nisi meɗ gilaŋatsi goyo, gajijita vi Lawna vi Israyel ay kulo kisiya. 23Gajijita vi Ma-Vatɗina fok kulo hay hoyok-ziyn pa, tun kulo kay hiɗiyta ta ka hay gal ma kuɗuwna vi hoyok-ziyna. 24Ŋusta slanu, tuɗan hay Kaldee kat sa yaway goy gorvona, nan wi slen kayni hiɗi Ŋusta vi Lawna; va ma vul tuwam kiranna vat goy vok iranu. 25Slen ma Ma-Vatɗina ɗekem kiranna nan dum tam sa yaway goy gorvon kaf.

Currently Selected:

EZEKIYEL 11: Massana

Highlight

Copy

Compare