KAL-GOYTA 38

Inda vi giwin-ma-ɗifinna hiɗi doway-firina

1Nam kot giwin-ma-ɗifinna ma ŋal sle ma ɗifinna hiɗi gu-kasiyana; fiyokka valamu ir goldoŋ vasl, buɗukka valamu ir goldoŋ vasl; gefem fiɗi pet ŋray ca, fiyokka valam ta kulota ir goldoŋ ɦidi may. 2Hay gefem ma fiɗina, nam kot miyokŋa kulo'o, nam korom tuwam hiɗi wayna. 3Nam kot jak ma li lop hay giwin-ma-ɗifinna noŋ kaf, ŋarakŋa ma ko butuw-kuna, pella, tasa ma ŋulona, va ma yaw sliwna, kot ganuna kaw; sle namna kaf nam kotom hiɗi wayna. 4Nam cil wayna ki dena nala, nam cum gaa kuɗ gaŋ giwin-ma-ɗifinna, hay gal ma gaana, ta-ta kulo hoyokomu. 5Nam yor girliŋ fiɗi, nam lakam goy hay gef ma fiɗina vi kaway-ciliyna, kay kal malla hayamu. 6Nam kot malla hiɗi gu-kasiyana, korom tuwam hiɗi wayna. 7Nam kal malla hay girliŋŋa ma ka ciy goy gaŋ giwin-ma-ɗifinna, kay ziyim hiɗi namu. Nam kotom hayam gaa zulu, hiɗi biremna.

8Nam kot doway-firina ma kawayna, diram ma tuni gaan yori kawaya, nam kotom tuwam hiɗi daraŋgalla vi boyna sa ka tok tuwsiya hay vun guɗuk ma fi-tuwna.

9Nam kot wur-daŋŋa, hay gal ma kayamna, kay kot wur-daŋŋa kayni: Nisi gar sligar-gaɓayna hiɗi baraw haɓna ma duɓarayna, fiyokka valamu ir goldoŋ kis. 10Hiɗi dolla dok-ma', ini kulo kay wayn dok-ma'; sle ma gaɓna vi dolla hiɗi zigewna kaf kotay hiɗi doorota. 11Hay gal ma gaana sligar ma gaɓayna ir goldoŋ kis ka'a, hiɗi dolla dok-ma', hiɗi kaway ma yorin gaa kuɗum dok-ma'; sle ma gaɓna vi dolla hiɗi zigewna kaf kotay hiɗi doorota. 12Hay gal ma vulatina, sligar-gaɓayna ir goldoŋ dok-vasl, hiɗi dolla doogo, hiɗi diram ma yori gaan doogo kaw, sle ma gaɓna vi dolla hiɗi zigewna kaf kotay hiɗi doorota. 13Hay gal ma kuɗuwna, jar goldoŋ ma dok-vaslna vi buɗukka valam kayni, 14sligar-gaɓayna ma ir goldoŋ doogo yam vasl kay gefem ma kepna; hiɗi dolla ma ɦidina, hiɗi kaway ma yori gaa kuɗumna kaw, lo, 15kay gefem ma ma'na, ma ŋray goy dig vun wur-daŋŋa, sligar-gaɓayna ka ir goldoŋ doogo yam vasl, dolla ka ɦidi, diram gaa yori ɦidi kaw. 16Sligar-ma-gaɓayna kaf ma ka kalaf hay wur-daŋŋa, kotay hiɗi baraw-haɓna ma duɓarayna. 17Dir dolla ma gaana mi wayna, sle ma gaɓna hiɗi zigewna koray hiɗi doorota, yalam ma kulona koray hiɗi doorota. Dolla ma hay wur-daŋŋa kaf zigew-doorona ka juni jaramu. 18Sligar-ma-gaɓayna ma ka hay vun wur-daŋŋa ciliy hiɗi baraw ma tuwam zim-zimna, ma tuwam cih-cihna hiɗi ma tuwam slawna, hiɗi baraw-haɓna ma duɓarayna; fiyokka valamu ir goldoŋ dok-ma', fiyokka valam ta kulota ir goldoŋ vasl, ŋray ca ki buɗukŋa vi sligar-gaɓayna ma hay wur-daŋŋa nala; 19dolla ma hayam fiɗina hiɗi diram ma yori gaa fiɗina kotay hiɗi wayna, sle ma gaɓna hiɗi zigew ma hayamna kotay hiɗi doorota, yalam ma kulona koray hiɗi doorota. 20Gu ma piy gaana kaf ma ka kalaf hay wur-daŋŋa kotay hiɗi wayna.

Ŋaɓta vi slen ma li lop tabernaklen hiɗi namna

21Kayni mi ŋaɓta vi slen ma li lop tabernaklen ma fi-tuwna, nisi hot ɗuwum mara'a kuɗ va ma Musus di'e. Lop namna kotom kayni si sa Levitna sa ka gaa kuɗ gaŋeraŋa vi Itamar, goora vi Mul-ma-ɗifinna Aaron. 22Betsaleel goora vi Uriyas, goor-ŋolona vi Hur, ma hay jafna vi Yudana, nam li slen ma Musus dum kalamna kafe; 23sa ma gutum hay lopna kayni mi Oholiyab, goora vi Ahisamak, ma hay jafna vi Dan, sa ma iram yali kay ɗo slena, kay wi yal slena, kay cil sligara ma tuwam zim-zimna, ma tuwam cih-cihna, ma tuwam slawna hiɗi baraw haɓna ma ciliyna.

24Or ma sumun vulum ɦawana, ma nisi tapam noŋ kaf kay li lopna vi liyn ma peldetna kayni, nam co noŋ pet ir talente dok-ma' yam zleeŋe, hiɗi sikel kis-karkiya hiɗi diram dok-ɦidi, kuɗ ŋaɓta vi sikel ma hay liyn ma peldetna. 25Sum sa hay tokŋa sa ŋaɓsi goyna gurjuta visi co noŋ pet talente kis, hiɗi sikel birim kep hiɗi diram kis-siɗiya hiɗi diram dok-siɗiya yam vasl. Kuɗ ŋaɓta vi sikel ma hay liyn ma peldetna. 26Kayn di ala gal sikel kep kay san kepe. Kuɗ ŋaɓta vi sikel ma ka hay liyn ma peldetna. Ŋray kay sum sa ŋaɓay goyna, tun caw tam busat dok-ma' ta-ta voko. Ŋray kay sumun birim kis-karkiya hiɗi diram ɦidi hiɗi kis-vasl hiɗi diram dok-vasl. 27Hiɗi talente ma kisna, nisi yor dir (dolla vi) liyn ma peldetna hiɗi dir (dolla vi) sligar-gaɓayna. Talente ma kisna yor dir dolla kis lay, talente kep kay dolla kep. 28Sikel ma ir birim kep hiɗi diram kis-siɗiya, hiɗi diram dok-siɗiya yam vaslna, nisi kot sle ma gaɓna hiɗi zigewna vi dolla, nisi kor yam dolla kaw. 29Wayna ma nisi vulum ɦawana tap noŋ pet ir talente dok-siɗiya, hiɗi sikel birim ma', hiɗi diram kis-fiɗi. 30Dolla ma ka hay vun guɗuk ma fi-tuwna nisi yorom diram gaa'a, giwin-ma-ɗifinna ma kawayna hiɗi kaway-ciliyna, hiɗi slen ma li lop hay giwin-ma-ɗifinna kafe; 31Dolla vi wur-daŋŋa, ŋuyum tuwam kaf, dolla vi vun-ziyna vi wur-daŋŋa; hiɗi gu ma piy gaana kaf ma ka kalaf hay tabernaklena hiɗi wur-daŋŋa.

Currently Selected:

KAL-GOYTA 38: Massana

Highlight

Copy

Compare