KAL-GOYTA 39

Kotta vi sligara ma ɗifinna

1Hiɗi sligar ma tuwam ɗoy zim-zimna, ma tuwam ɗoy cih-cihna, ma tuwam ɗoy slawna, nisi kot sligara ma li lopna hay liyn ma peldetna, nisi kot sligar ma ɗifinna kay Aaron, ki Ma-Vatɗina vul hagata mi Musus nala. 2Nisi kot sligar-ŋoŋŋa hiɗi ora, hiɗi baraw ma tuwam zim-zimna, ma tuwam cih-cihna, na slawna hiɗi baraw haɓna ma duɓarayna. 3Nisi beɗ or goy heberek', kaam iram goy ki zigewn nala, nisi zlinawam jar sligar ma ciliy hiɗi tuwam zim-zimna, ma tuwam cih-cihna, ma tuwam slawna, hiɗi baraw haɓna ma duɓarayna; nam ay kotay ŋaa'a ŋolo. 4Nisi kot jeŋŋa ma tapam kulona, gaŋam ma ma'na pet tapay kulo'o ki kayn nala. 5Kantina nisi kotom hiɗi sle ma kot sligar-ŋoŋŋa kaw, nam ka juni kulo kalamu; nam kotay hiɗi ora, hiɗi ɓaraw ma tuwam zim-zimna, ma tuwam cih-cihna hiɗi ma tuwam slawna, hiɗi baraw haɓna ma duɓarayna, ki Ma-Vatɗina vul hagata tam Musus nala. 6Nisi ŋuy tuw or ma ciyna hiɗi hiɗiyn oniks, nisi ɓir sem gurona vi Israyel kulo kalamu, ki san ɗo hay tampoŋ nala. 7Nisi cum kulo hay pel sligar-ŋoŋŋa kay gi-humda kay gurona vi Israyel, ki Ma-Vatɗina vul hagat tam Musus nala.

8Nisi kot birim-ŋoŋŋa kotay hiɗi yal ŋolo, kotom hiɗi sle ma kot sligar-ŋoŋŋa kaw, kotom hiɗi ora, hiɗi baraw ma zim-zimna, ma tuwam cih-cihna, ma slawna hiɗi baraw haɓna ma duɓarayna. 9Gefem fiɗi kaf ŋray ca; birim-ŋoŋŋa kotay kayn jaɓay kay tuwam ma'; fiyokka valamu ŋa way-ɓamta kepe, buɗukka valamu ŋa way-ɓamta kepe, nam ciy kay tuwam ma'. 10Nisi ci hiɗiyn talamu, zlaram kuɗ tuwam fiɗi. Ma zlaray jewna yum ala: Sardowan, topaz hiɗi emerode. 11Ma zlaray sem ma'na: grenat, safir hiɗi diyamaŋ; 12ma zlaray sem ɦidina: Opal, agat hiɗi Ametiste; 13ma zlaray sem fiɗina: krisolit, oniks hiɗi yaspis. Nam ka ciy gaa hoɗoɗ hoɗoɗ'. 14Nam noŋ pet doogo yam ma', ŋray hiɗi sem gurona vi Israyel; ɗoy gaa'a ki tampoŋ nala, jafna vi Israyel sa doogo yam ma'na semda visi ka ɗoy hayam kafe. 15Nisi kot jaɓna hiɗi or ma bay-rigasna, ciliy ki zigewn nala. 16Gaŋam ma' pete nisi lum kulo jiŋiliŋ hiɗi ora, kot girliŋ-ora ma', girliŋ-ora ma ma'na nisi cum goy gaŋ sligar-ŋoŋŋa, 17jaɓ ma ora ma ma'na nisi kalam hay girliŋ ma ka ciy goy gaŋam ma' petna; 18jaɓna ma ma'na ma ka goy hay pel sligar-ŋoŋŋa nisi vum vunam goy voko. 19Nisi kot girliŋ-ora mara ma' lo, nisi cum goy hay gaŋ birim-ŋoŋŋa ma pete, hay vunam ma kalaf ɗigiyna ma ka kulo tam sligar-ŋoŋŋa. 20Nisi kot girliŋ-ora mara ma' lo, nisi cum gaa kuɗ pel sligar-ŋoŋŋa ma ma'na pete, hay gal ma vokŋa, goboy tam vunam ma tapayna, kulo'o kay kantina vi sligar-ŋoŋŋa. 21Nisi jun vun zigew ma tuwam zim-zimna tam girliŋ ma ka ciy vun birim-ŋoŋŋa, junum vunam hen tam girliŋ ma ciy pel sligar-ŋoŋŋa, kay birim-ŋoŋŋa ma duɓak kulo'o kay kantina vi sligar-ŋoŋŋa, kay jaram ma ja goy hiɗi namɗi, ki Ma-Vatɗina vul hagata tam Musus nala.

22Nisi kot ŋoŋŋa ma fiyokŋa, nisi cilim kaf kayn hiɗi baraw ma tuwam zim-zimna. 23Ŋoŋ ma fiyok namna nisi hinim wayam goy baŋa'a. Delem ma kal yam hayna nam diŋasli ŋolo kay a nam jet goyɗi. 24Gaa hay gaŋamu nisi jun ɦoro-ɦorona ma tuwam ɗoy zim-zimna, ma tuwam ɗoy cih-cihna ma tuwam slawna hiɗi baraw haɓna ma duɓarayna. 25Nisi kot gilereŋŋa hiɗi ora ma bay-rigasna, nisi jun gilereŋ jar ɦoro-ɦorona, ŋuyum goy hay gaŋ ŋoŋ-ma-fiyokŋa noŋ cusl' jar ɦoro-ɦorona. 26Gilereŋ kep, ɦoro-ɦoro kep; gilereŋ kep, ɦoro-ɦoro kep, ŋuyum goy hay gaŋ sligar fiyokŋ kafe, kay li lopna, ki Ma-Vatɗina vul hagata tam Musus nala.

27Nisi kot sligar-tuwna hiɗi baraw-haɓna, ciliya, kotom kay Aaron hiɗi gurona valamu; 28jakawata hiɗi pokita nisi kotom hiɗi baraw haɓna, kayni mi ganta visiya; kalesoŋŋa nisi kotom hiɗi baraw haɓna ma duɓarayna; 29kantina nisi kotom hiɗi baraw haɓna ma duɓarayna, tuwam ɗoya; tuwam zim-zim, tuwam cih-cih, slawi kaw, ki Ma-Vatɗina vul hagata tam Musus nala. 30Nisi beɗ or ma bay-rigasna goy goor heberek', kay bogoray ma ɗifinna, nisi ɗo hayamu ki san ɗo hay tampoŋŋa nala, nisi ɗo ala: Peldetta tam Ma-Vatɗina. 31Nisi junum tam jakawata, kulo kalamu, ki Ma-Vatɗina vul hagata tam Musus nala.

Tabernaklena inawa kulo'o

32Ki kayn nala lop inda vi tabernaklena hiɗi inda vi guɗuk ma fi-tuwna vatawa yo. Gurona vi Israyel li kuɗ slen ma Ma-Vatɗina dum mi Mususna noŋ kaf. 33Nisi mar tabernaklena mi Musus, guɗukŋa hiɗi slen ma talamna noŋ kaf, sle ma gaɓna, biremna, malla, dolla hiɗi diram ma yori gaana; 34va ma baara ma bak fok-dimina ma tuwam ɗoy slawna, va ma baara ma kotay hiɗi bak dofeŋŋa, sligar-gaɓayna ma poŋ jar-liyna, 35timgilla vi di-goyta hiɗi mal ma talamna, hiɗi goɓolokona; 36tablena, hiɗi jak ma kalam kafna, hiɗi fun ma vuli goyna 37va ma tun fitilla ma kotay hiɗi or ma bay-rigasna, fitil ma tunum kalamna, fitilla valam ma tuwam kotayna, hiɗi jak ma kalamna noŋ kaf, hiɗi mul ma ɦok hay fitilla; 38giwin-ma-ɗifinna ma ora, mul ma ɦok kamna hiɗi mul ma his fayna, sligar ma gaɓam kulo hay vun guɗukŋa; 39giwin-ma-ɗifinna ma kawayna, kaway ma ciliy jar-tuwamna, malla, hiɗi sle ma hayam kafna, doway-firina hiɗi diram ma yori gaana; 40sligar ma gaɓay tam wur-daŋŋa, dolla valamu diram ma yori gaana, sligar ma gaɓay tam vunna vi wur-daŋŋa, zigew ma kalam hayamna, gu ma piy gaana; hiɗi jakŋa ma li lop hay tabernaklen noŋ kafe, kay guɗuk ma fi-tuwna. 41Sligar ma li lop hiɗi namu hay liyn ma peldetna, sligar ma ɗifinna vi Mul-ma-ɗifinna Aaron, sligara vi gurona valamu kay lop ma ɗifinna. 42Lop namna gurona vi Israyel lum kafe. Slen ma Ma-Vatɗin dum mi Mususna noŋ kaf nisi hum kuɗumu. 43Musus sar lop namna noŋ kaf, nam ɗuw kayni lop namna liya ki Ma-Vatɗin vulum hagat kay lum nala. Musus gi bolo kay lop namna.

Currently Selected:

KAL-GOYTA 39: Massana

Highlight

Copy

Compare