KAL-GOYTA 12
12
Tun-cawta vi Paskata
1Ma-Vatɗina di tam Musus hiɗi Aaron hay nagat Egipte ala: 2Tilla zawni ma liys mi tilla vigi ma jewna; nam ma li mi tilla vigi ma jewna hay busata. 3Nigi ma di tam tokŋa vi Israyel kaf ala: Hay buurta doogota vi til namna zawni, jaf marige kaw ma vi goor ɦu-dimin kep kep, nigi ma vi goor ɦu-dimin kuɗ ziyn kep kep. 4La ɦun as ti kay sum sa hay ziy ma kepnɗi, nisi as tap tuwsi tam ziy ma goy galsina, kuɗ ŋaɓta vi sum sa hay ziyna. Nigi ma ŋra ɦu-dimin namna dig tina vi sum sa hay ziyna. 5Nam ma lin mi ɦu ma moy may talamɗi; ɦu ma jufu, busata valam kepe; nigi as vi goor ɦu-dimiya lebo mee'e kaw ŋray ca.
6Nigi ma ŋom ɦu namna ta-ta hay buurta doogo yam fiɗita vi til zawni; hay vulatita gurona vi Israyel kaf as ŋatamu. 7Nigi ma vi busuwna valamu, ɦasam kulo tam gu-dolla ma hay vun-galan ma'na, tam gu-malla ma buri kulo kalamna kaw, hay ziyn ma nigi min tumna kaf. 8Hay henjet na'ta nigi ma tum sliwamu ɗiliy hay kuta; nigi ma tum hiɗi fu ma bay-kufna hiɗi hadaf ma galakŋa kaw. 9Nigi ma mut sliw namna hiɗi iriyamɗi, zalam hay niyɗi kaw, may nigi ma ɗilim hay kut; naa'a. Yalam lay, hiɗi kiyorom lay, hiɗi sle ma hayn lay. 10Nigi as hin mara kulo'o ta-ta kay grawtɗi; la va mara hinawa kulo'o, nigi ma ŋalam goyo hay kuta. 11Hay li ma nigi tumu, nigi ma jun furgiya, tugurun cuki segiya, zugulda vigi hay ɓigiya; nigi ma tum koloyo kaw, kay namu mi Paskana vi Ma-Vatɗina. 12Hay henjeta ta vaydita nan min jik hay nagat Egipte, guro sa vuɗi jewna hay nagat Egipte kaf nan min cisi goyo, tun cawis tam sumun pa ta-ta tam farayna; nan min ka kitata kay lawayna vi Egipte noŋ kafe. Nanu mi Ma-Vatɗina. 13Busuw ma kulo vok-ziyna ma ɗek goy kigiya, hay li ma nan wi busuwnawa, nan ma jik goy galgiya, hay li ma nan min wat sum sa Egipten ɗawni, bakmaran ma tamgi nigiɗi.
14Buur na'ta nigi ma ŋoma' kulo kigiya, nigi ma li yuldet haya'a kay suburan senu. Gatta kay buur na'ta as mu'ɗi, nigi ma ŋoma' dok-doko kay jafna vigi ma bugolgin kaw. 15Nigi ma ti fu ma bay-kufna ir buur siɗiya, tun caw hay buurta jewt pa, fu ma-kufna nigi as ŋayam kulo tigiɗi; jar buur namna lakŋi, la sa ti fu ma hiɗi kufnawa, ma bam iram goyo jar gurona vi Israyel. 16Hay buurta jewta, nigi ma yi tuwgiya kay li dakka ta peldetta, nigi ma li dakka ta peldetta hay buurta siɗiyata kaw. Buur namna cani nigi as li lop hayamɗi; gigekaw as kotom mi ti ma vunamna tuta. 17Nigi ma li kuɗ yuldeta vi fun-bay-kufna kay kayni mi buur ma nan kal vokŋa vigi ay goyo hay nagat Egipte pa; gatta kay buur na'ta as mu'ɗi, nigi ma ŋoma' ta-ta kay jafna vigi ma bugolgina. 18Hay buurta dok-ma' yam fiɗita vi til ma jewna, nigi ma tun caw ti fun-bay-kufna ta-ta hay vulatita vi buurta doogo yam kepta. 19Nigi ma ŋom fu ma-kufna hay ziyna vigiɗi ta-ta ir buur siɗiya, kay sa ma ŋom fun ma-kufnawa ni, ma kaam selem goyo jar gurona vi Israyel, la nam mi sa ma pulu lebo vuɗ hay nagata kaw. 20Nigi ma ti fun ma-kufna noŋɗi. Hay ziyna vigi noŋ kaf nigi ma tum ma fun ma bay-kufna.
21Musus yi sum sa maariyana vi Israyel kaf, nam di tisiya, tuɗgi gargi farayna kay jafna vigiya, ŋatgi guro fok ma paskana. 22Nigi ma ka ɓam gun ma yum hisop nigi ma jiyobom gaa hay busuw ma ka ɦokay hay tasata, nigi ma jom tam gu-malla hiɗi dolla ma ka hay vun-galan ma ma'na. Sa jargi gigekaw as kal goy hay ziyna valamɗi ta-ta liyn fo goyo. 23Hay li ma Ma-Vatɗin min jika kay ci sum sa Egipten ɗawni, hay li ma iram ma wi busuwn tam gu-malla hiɗi dol ma ma'n ɗawni, nam ma jik goy gal vun-ziyna, nam ma hin hagat tam sa ma ɓulak slena kay nam ma kal hay ziyna vigiya kay ci sumunɗi.
24Gat na'ta kayni nigi ma li kuɗa'a, ŋoma' migi nigiya, mi gurona vigi kaw dok-doko. 25Hay li ma nigi coowa hay nagata ta Ma-Vatɗin min vulgiya, ki nam deŋ tigi nala, gat na'ta ta peldetta kayni nigi ma li kuɗa'a. 26La gurona vigi jobgiyawa ala ɗifin namna ma nigi lumna kayni ɗek mige ni, 27nigi ma hot dit ala kayni mi ɗifinna vi paskata kay subur sem Ma-Vatɗina, kay hay li ma nam ci sum sa Egipten goy kayni, nam cap goy gal ziyna ir gurona vi Israyel, suɗ ziyna visi goyo. Sumun her gaa'a, dab voksi gaa'a. 28Nala gurona vi Israyel kaliya, nisi li kuɗ va ma Ma-Vatɗin dum mi Musus hiɗi Aaron.
Mitta vi guro sa vuɗi jewna
29Co hay henjet-daŋalta kayni, Ma-Vatɗina ci guro sa vuɗi jewna hay nagat Egipte goy kafe; tun caw ay tam goora vi Farawn ma vuɗi jewna ma mus kay zlamda-mulda valamna pa ta-ta tam guro sa vuɗi jewna vi sa gorvona sa ka hay daŋgayna valamu, ta-ta tam faray ma vuɗi jewn goŋ'. 30Farawn fok kulo'o hay henjeta, namu hiɗi sa sunda valam noŋ kafe, hiɗi sum sa Egipten noŋ kafe; tiyn pat ŋolo hay nagat Egipte, kay ziyn ma mitta li hayamɗi mayɗi.
31Hay henjet na'ta de', Farawn yi Musus hiɗi Aaron, nam disiya: Yawgi kulo'o, kalgi goy jar sumuna vanu, nigiya, hiɗi gurona vi Israyel. Tuɗgi sungi Ma-Vatɗina, ki nigi kay tuwgi di nala. 32Yawgi fok-dimina hiɗi luwayna vigiya ki nigi di nala. Tuɗgiya, may nigi gan bolo. 33Sum sa Egiptena tun caw gossiya, tun caw digiɗsi goy hay nagat gosoyo, kay nisi ka var ala nisi kaf ma mit goyo.
34Sum sa Israyella yaw futuwna visi ma yi fun kisiya, nisi jun dowayna visi hay sligara visiya, gaɓam pelsiya may. 35Gurona vi Israyel li kuɗ va ma Musus disitna. Nisi job doway ma yori hiɗi doorota hiɗi doway ma yori hiɗi ora hiɗi sligara kaw tam sum sa Egiptena. 36Ma-Vatɗina kal dikga ŋaata hay sa Egiptena, nisi tun caw li slugota mi sa Israyella, vulsi sle ma nisi jobsi kalamna. Nala nisi pat slena vi sum sa Egipten noŋ kiwliŋ'.
Kalta vi sum sa Israyella goy hay Egipte pa
37Gurona vi Israyel fokis hay Ramses pa kal hay Sukkot sum sa goy asayn ir birim kis-karkiya, gurosgurayn hayɗi. 38Sumun ŋolo kuɗ batsi valamu valamu kalay hiɗi nisiya, farayn kaw kisi ŋolo, fok-dimina hiɗi luwayn ka kisi kaw. 39Nisi cuf hambulla ma bay-kufna hiɗi futuw ma nisi maramay kisi Egipte pana, kay nam may liy hiɗi kufnɗi; kay hay li ma nisi digiɗsiyay goy hay Egipte pan kayni, nisi may vi yisi noŋɗi, nisi may yaw sle ma tin hay ɓisiɗi. 40Musta vi gurona vi Israyel hay nagat Egipte li noŋ pet ir busat kis-fiɗi hiɗi diram dok-ɦidi. 41Hay vatta vi busat na'ta kayni, buur kep, vokŋa Ma-Vatɗina kaf kalay goy hay nagat Egipte.
42Yuldeta li hay henjet na'ta kay subur sem Ma-Vatɗina. Kay namu mi ma kal gurona vi Israyel ay goy hay Egipte pa. Jafna vi Israyel kaf hiɗi gurona visi sa bugolsina ma li yuldeta hay henjet na'ta kay subur sem Ma-Vatɗina.
43Ma-Vatɗina di tam Musus hiɗi Aaron: Kayni ti gatta ta coliya kay paskata: Sa ma pulu as ti ɦu ma paskanɗi. 44Sum sa gorvona sa nigi gussi hiɗi gurjut kaf nigi ma kaasi gosaya; bugol kayni nisi as ti ɦu ma paskana. 45Sa ma li ziy jargiya hiɗi sa ma li lop kay gurjuta as tiɗi, 46nigi ma tum kayni hay ziyna tuta, nigi ma kal sliwn goy bugol ziyna vigiɗi, nigi ma kus zok-ɦunɗi. 47Vokŋa vi sum sa Israyel kaf as li yuldeta vi paskata. 48La sa ma pulu ma ka li ziy jargina min ti ɦu ma paskana kay subur sem Ma-Vatɗina, sum sa jufayna hay ziyna valam noŋ kaf ma ka gosaya; nala nam muɗi goora vi nagata, nam as ti'e yo. May la san bay ka gosaya, nam as tiɗi. 49Gat na'ta kayni ka kigi nigi sa gurona vi nagat lay, kay sum sa ka li ziy jargin lay.
50Gurona vi Israyel kaf li kuɗ va ma Ma-Vatɗina dum mi Musus hiɗi Aaronna. 51Hay buur na'ta, Ma-Vatɗina kal gurona vi Israyel goy hay nagat Egipte, kuɗ vokŋa visiya visiya.
Currently Selected:
KAL-GOYTA 12: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
KAL-GOYTA 12
12
Tun-cawta vi Paskata
1Ma-Vatɗina di tam Musus hiɗi Aaron hay nagat Egipte ala: 2Tilla zawni ma liys mi tilla vigi ma jewna; nam ma li mi tilla vigi ma jewna hay busata. 3Nigi ma di tam tokŋa vi Israyel kaf ala: Hay buurta doogota vi til namna zawni, jaf marige kaw ma vi goor ɦu-dimin kep kep, nigi ma vi goor ɦu-dimin kuɗ ziyn kep kep. 4La ɦun as ti kay sum sa hay ziy ma kepnɗi, nisi as tap tuwsi tam ziy ma goy galsina, kuɗ ŋaɓta vi sum sa hay ziyna. Nigi ma ŋra ɦu-dimin namna dig tina vi sum sa hay ziyna. 5Nam ma lin mi ɦu ma moy may talamɗi; ɦu ma jufu, busata valam kepe; nigi as vi goor ɦu-dimiya lebo mee'e kaw ŋray ca.
6Nigi ma ŋom ɦu namna ta-ta hay buurta doogo yam fiɗita vi til zawni; hay vulatita gurona vi Israyel kaf as ŋatamu. 7Nigi ma vi busuwna valamu, ɦasam kulo tam gu-dolla ma hay vun-galan ma'na, tam gu-malla ma buri kulo kalamna kaw, hay ziyn ma nigi min tumna kaf. 8Hay henjet na'ta nigi ma tum sliwamu ɗiliy hay kuta; nigi ma tum hiɗi fu ma bay-kufna hiɗi hadaf ma galakŋa kaw. 9Nigi ma mut sliw namna hiɗi iriyamɗi, zalam hay niyɗi kaw, may nigi ma ɗilim hay kut; naa'a. Yalam lay, hiɗi kiyorom lay, hiɗi sle ma hayn lay. 10Nigi as hin mara kulo'o ta-ta kay grawtɗi; la va mara hinawa kulo'o, nigi ma ŋalam goyo hay kuta. 11Hay li ma nigi tumu, nigi ma jun furgiya, tugurun cuki segiya, zugulda vigi hay ɓigiya; nigi ma tum koloyo kaw, kay namu mi Paskana vi Ma-Vatɗina. 12Hay henjeta ta vaydita nan min jik hay nagat Egipte, guro sa vuɗi jewna hay nagat Egipte kaf nan min cisi goyo, tun cawis tam sumun pa ta-ta tam farayna; nan min ka kitata kay lawayna vi Egipte noŋ kafe. Nanu mi Ma-Vatɗina. 13Busuw ma kulo vok-ziyna ma ɗek goy kigiya, hay li ma nan wi busuwnawa, nan ma jik goy galgiya, hay li ma nan min wat sum sa Egipten ɗawni, bakmaran ma tamgi nigiɗi.
14Buur na'ta nigi ma ŋoma' kulo kigiya, nigi ma li yuldet haya'a kay suburan senu. Gatta kay buur na'ta as mu'ɗi, nigi ma ŋoma' dok-doko kay jafna vigi ma bugolgin kaw. 15Nigi ma ti fu ma bay-kufna ir buur siɗiya, tun caw hay buurta jewt pa, fu ma-kufna nigi as ŋayam kulo tigiɗi; jar buur namna lakŋi, la sa ti fu ma hiɗi kufnawa, ma bam iram goyo jar gurona vi Israyel. 16Hay buurta jewta, nigi ma yi tuwgiya kay li dakka ta peldetta, nigi ma li dakka ta peldetta hay buurta siɗiyata kaw. Buur namna cani nigi as li lop hayamɗi; gigekaw as kotom mi ti ma vunamna tuta. 17Nigi ma li kuɗ yuldeta vi fun-bay-kufna kay kayni mi buur ma nan kal vokŋa vigi ay goyo hay nagat Egipte pa; gatta kay buur na'ta as mu'ɗi, nigi ma ŋoma' ta-ta kay jafna vigi ma bugolgina. 18Hay buurta dok-ma' yam fiɗita vi til ma jewna, nigi ma tun caw ti fun-bay-kufna ta-ta hay vulatita vi buurta doogo yam kepta. 19Nigi ma ŋom fu ma-kufna hay ziyna vigiɗi ta-ta ir buur siɗiya, kay sa ma ŋom fun ma-kufnawa ni, ma kaam selem goyo jar gurona vi Israyel, la nam mi sa ma pulu lebo vuɗ hay nagata kaw. 20Nigi ma ti fun ma-kufna noŋɗi. Hay ziyna vigi noŋ kaf nigi ma tum ma fun ma bay-kufna.
21Musus yi sum sa maariyana vi Israyel kaf, nam di tisiya, tuɗgi gargi farayna kay jafna vigiya, ŋatgi guro fok ma paskana. 22Nigi ma ka ɓam gun ma yum hisop nigi ma jiyobom gaa hay busuw ma ka ɦokay hay tasata, nigi ma jom tam gu-malla hiɗi dolla ma ka hay vun-galan ma ma'na. Sa jargi gigekaw as kal goy hay ziyna valamɗi ta-ta liyn fo goyo. 23Hay li ma Ma-Vatɗin min jika kay ci sum sa Egipten ɗawni, hay li ma iram ma wi busuwn tam gu-malla hiɗi dol ma ma'n ɗawni, nam ma jik goy gal vun-ziyna, nam ma hin hagat tam sa ma ɓulak slena kay nam ma kal hay ziyna vigiya kay ci sumunɗi.
24Gat na'ta kayni nigi ma li kuɗa'a, ŋoma' migi nigiya, mi gurona vigi kaw dok-doko. 25Hay li ma nigi coowa hay nagata ta Ma-Vatɗin min vulgiya, ki nam deŋ tigi nala, gat na'ta ta peldetta kayni nigi ma li kuɗa'a. 26La gurona vigi jobgiyawa ala ɗifin namna ma nigi lumna kayni ɗek mige ni, 27nigi ma hot dit ala kayni mi ɗifinna vi paskata kay subur sem Ma-Vatɗina, kay hay li ma nam ci sum sa Egipten goy kayni, nam cap goy gal ziyna ir gurona vi Israyel, suɗ ziyna visi goyo. Sumun her gaa'a, dab voksi gaa'a. 28Nala gurona vi Israyel kaliya, nisi li kuɗ va ma Ma-Vatɗin dum mi Musus hiɗi Aaron.
Mitta vi guro sa vuɗi jewna
29Co hay henjet-daŋalta kayni, Ma-Vatɗina ci guro sa vuɗi jewna hay nagat Egipte goy kafe; tun caw ay tam goora vi Farawn ma vuɗi jewna ma mus kay zlamda-mulda valamna pa ta-ta tam guro sa vuɗi jewna vi sa gorvona sa ka hay daŋgayna valamu, ta-ta tam faray ma vuɗi jewn goŋ'. 30Farawn fok kulo'o hay henjeta, namu hiɗi sa sunda valam noŋ kafe, hiɗi sum sa Egipten noŋ kafe; tiyn pat ŋolo hay nagat Egipte, kay ziyn ma mitta li hayamɗi mayɗi.
31Hay henjet na'ta de', Farawn yi Musus hiɗi Aaron, nam disiya: Yawgi kulo'o, kalgi goy jar sumuna vanu, nigiya, hiɗi gurona vi Israyel. Tuɗgi sungi Ma-Vatɗina, ki nigi kay tuwgi di nala. 32Yawgi fok-dimina hiɗi luwayna vigiya ki nigi di nala. Tuɗgiya, may nigi gan bolo. 33Sum sa Egiptena tun caw gossiya, tun caw digiɗsi goy hay nagat gosoyo, kay nisi ka var ala nisi kaf ma mit goyo.
34Sum sa Israyella yaw futuwna visi ma yi fun kisiya, nisi jun dowayna visi hay sligara visiya, gaɓam pelsiya may. 35Gurona vi Israyel li kuɗ va ma Musus disitna. Nisi job doway ma yori hiɗi doorota hiɗi doway ma yori hiɗi ora hiɗi sligara kaw tam sum sa Egiptena. 36Ma-Vatɗina kal dikga ŋaata hay sa Egiptena, nisi tun caw li slugota mi sa Israyella, vulsi sle ma nisi jobsi kalamna. Nala nisi pat slena vi sum sa Egipten noŋ kiwliŋ'.
Kalta vi sum sa Israyella goy hay Egipte pa
37Gurona vi Israyel fokis hay Ramses pa kal hay Sukkot sum sa goy asayn ir birim kis-karkiya, gurosgurayn hayɗi. 38Sumun ŋolo kuɗ batsi valamu valamu kalay hiɗi nisiya, farayn kaw kisi ŋolo, fok-dimina hiɗi luwayn ka kisi kaw. 39Nisi cuf hambulla ma bay-kufna hiɗi futuw ma nisi maramay kisi Egipte pana, kay nam may liy hiɗi kufnɗi; kay hay li ma nisi digiɗsiyay goy hay Egipte pan kayni, nisi may vi yisi noŋɗi, nisi may yaw sle ma tin hay ɓisiɗi. 40Musta vi gurona vi Israyel hay nagat Egipte li noŋ pet ir busat kis-fiɗi hiɗi diram dok-ɦidi. 41Hay vatta vi busat na'ta kayni, buur kep, vokŋa Ma-Vatɗina kaf kalay goy hay nagat Egipte.
42Yuldeta li hay henjet na'ta kay subur sem Ma-Vatɗina. Kay namu mi ma kal gurona vi Israyel ay goy hay Egipte pa. Jafna vi Israyel kaf hiɗi gurona visi sa bugolsina ma li yuldeta hay henjet na'ta kay subur sem Ma-Vatɗina.
43Ma-Vatɗina di tam Musus hiɗi Aaron: Kayni ti gatta ta coliya kay paskata: Sa ma pulu as ti ɦu ma paskanɗi. 44Sum sa gorvona sa nigi gussi hiɗi gurjut kaf nigi ma kaasi gosaya; bugol kayni nisi as ti ɦu ma paskana. 45Sa ma li ziy jargiya hiɗi sa ma li lop kay gurjuta as tiɗi, 46nigi ma tum kayni hay ziyna tuta, nigi ma kal sliwn goy bugol ziyna vigiɗi, nigi ma kus zok-ɦunɗi. 47Vokŋa vi sum sa Israyel kaf as li yuldeta vi paskata. 48La sa ma pulu ma ka li ziy jargina min ti ɦu ma paskana kay subur sem Ma-Vatɗina, sum sa jufayna hay ziyna valam noŋ kaf ma ka gosaya; nala nam muɗi goora vi nagata, nam as ti'e yo. May la san bay ka gosaya, nam as tiɗi. 49Gat na'ta kayni ka kigi nigi sa gurona vi nagat lay, kay sum sa ka li ziy jargin lay.
50Gurona vi Israyel kaf li kuɗ va ma Ma-Vatɗina dum mi Musus hiɗi Aaronna. 51Hay buur na'ta, Ma-Vatɗina kal gurona vi Israyel goy hay nagat Egipte, kuɗ vokŋa visiya visiya.
Currently Selected:
:
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001