ESTER 6
6
Mardose muɗi ŋolo Haman vatay goyo
1Hay henjet na'ta, mulla kal senɗi, nam vul dita kay nisi ma maram ɗerwelda vi slen kaf ma liy jewna, hiɗi labar ma liyna kaw, kay jaŋam vok iramu, nisi jaŋam goy vok mulla. 2Nisi fi labara ɗoya kay slen ma Mardose dum goyo kay Bigtan hiɗi Terek, sum sa patayna vi mulla sa ma'na, sa ŋom vun-galana, sa gar kay ci mulla Asuwerus goyo. 3Mulla di'e: Suburta hiɗi ŋolda mige ma Mardose fi kuɗ kayni? Sa sun mulla hot dita: sa may vulum ŋolda kuɗ kaynɗi.
4May mulla di'e: Hay wur-daŋ klan mi gige? Dolay ka co wur-daŋŋa kayn mi Haman, hay tani Haman co tam mulla kayni kay jobom kay Mardose, kay nam min ɓalam kulo kat guna ma nam kotomna. 5Sa sunda di'e: Tuɗ hay daŋŋa kilan mi Haman. Mulla di'e: Hinim kalay kalafi. 6Haman kalay kalafi tam mulla. Mulla di talamu: Sa ma mulla min slum yalam kulona ma lum talam mi mige? Haman di hay dikam kalaf ala: Sa mara ma mulla min vulum ŋolda suwan nanu ka lo su? 7Haman di tam mulla: Sa ma mulla min vulum ŋolda? 8Yaw sligara vi mulla ma mulla cukumna, ɓem kay kulum ma mulla ɓe kalamna, tunum jakawata vi mulda kalamu may, 9vul sligara namna hiɗi kulumna hay ɓam sa ma ŋolla vi mulla mara kep, bugolda cuk sligara tam sa ma mulla vulum ŋolda, poyom hiɗi kulumna hay liy ma musta vi hoyok-ziyn kaf, siwel vokom ala: sa ma mulla min vulum ŋolda lum ki kayn nala! 10Mulla hot dit tam Haman: Tuɗaŋ gosoyo, yawaŋ sligara hiɗi kulumna ki naŋ di nala, naŋ ma li ki kayn nala kat Mardose sa ma Yudiyana, ma ka musi hay faatana vanu, yaŋ ma jok va kep kaw kuɗ slen ma naŋ dumnaɗi. 11Haman yaw sligara cukum tam Mardose, nam ɓem kay kulumna kaw, poyom hiɗi kulumna hay hoyok-ziyna, hay liyn ma musta, ka siwel vokom ala: sa ma mulla min vulum ŋolda lum ki kayn nala!
12Bugolda, Mardose hot hay faatana vi mulla, may Haman li tuwam koloyo kay kal vo'o, dikam kaaya, yalam bariya kaw. 13Haman vi labar ma li talamna mi cata valamu Zerek hiɗi sa boniyomna kafe. Sa vulum gatta hiɗi cata valamu Zerek di talamu: Mardose namna ma naŋ tun caw muɗ pusluri vokomna kayni, la nam mi Yudiyana, naŋ ma col kulo vokomɗi. Naŋ ma nig gaa vok iramu kay dok-doko. 14Hay li ma nisi ka law hiɗi namu, sa patayna vi mulla co'o; nisi li tuwsi gosoyo kay tuɗ Haman hay tina ma Ester kotomna.
BIBALDA TA PELDETTA © L'Alliance Biblique du Cameroun, 2001