ESTER 5
5
Ester kalay kat mulla, Haman ka gar kay ci Mardose
1Hay li ma buurta ɦidita coowa, Ester cuk sligara vi mulda ta'a, na' co hay daŋŋa vi mulla, ɗiger vok ziyda vi mulla. Mulla ka musi kulo kay zlamda-mulda valamu, hay liyna vi mulda, vok vun-ziyna. 2Hay li ma mulla wi ca-mulda Ester coli kulo hay wur-daŋŋa, na' fi slugot vok iramu, mulla meɗa' zugulda-ora valamu ta ka hay ɓalamu. Ester co goboyo, na' jo vun zugulda. 3Mulla di'e: Mayɗin mige ca-mulda Ester? Nak min job mige? La nak joba' ti gal mulda van kaw, nan as vulakga. 4Ester di'e: Mulla, la naŋ mina, vaydi naŋ hiɗi Haman, nigi ma co ti tina ma nan kotom kigiya. 5Mulla di'e: Tuɗgi gargi Haman koloyo kay numa tuɗ kuɗ yita vi Ester. 6Mulla hiɗi Haman co'o hay tina ma Ester kotomna. Hay li ma nisi ka ci vinna, mulla di tam Ester: Jobta vagu mi mige? Nan min humagu. Nak siɗawam mi mige? La ti gal mulda kaw nan min vulakga. 7Ester hot dita: Jobta vanu, va ma nan minimna? 8Mulla, la nan fi slugotawa vok iraŋu, naŋ ma hum jobta vanu hiɗi va ma nan mina, kayn ala jifini lo, naŋ hiɗi Haman ma co ti tina ma nan kotom kigina, nala nan ma daŋ va ma nan minimna.
9Hay li ma Haman kalay goyo hay buur na'ta, dikam hobay hiɗi firita, hiɗi suburta, iram cuk kay Mardose ma ka coli hay faatana vi mulla. Mardose min fok kuloɗi, min vi tuwam goy vokomɗi kaw. Nala Haman dikam ɓulak ŋolo kat Mardose. 10May nam ɗek ɦiyda valam goyɗi, kalay vo valamu. Nam cuk sumuna kay gar boniyomna hiɗi cata valam Zerek. 11Haman ɗeksi goy kay ŋolda vi farayna valamu, hiɗi gurona valamu sa dak-dakŋa, hiɗi mu'da ma mulla muɗum kulo ŋolo suw nuriyom sa yerimana hiɗi sa sunda vi mulla. 12Nam disiya: Lo, ca-mulda Ester yanti mi nan kepe kay nan ma tuɗ hiɗi mulla kay ti tin ma na' kotomna, grawta lo, na' yanu kay nan ma tuɗ ti hiɗi mulla. 13May hay slen kayni kaf, la iran ka cuk kay Mardose, hay faatana vi mulla dok-doko, hayan may sle'ɗi. 14Cata valamu Zerek hiɗi boniyomna kaf di talamu: Nay ma pi gun kulo fiyoko ir goldoŋ dok-vasl, jifini hay graw culumta, naŋ ma di tam mulla kay ɓal Mardose talamu. Nala naŋ ma tuɗ hiɗi firita hay yuldeta vi mulla. Lawt kayni cuk kuɗ hay Haman, nam pi gun kulo'o.
BIBALDA TA PELDETTA © L'Alliance Biblique du Cameroun, 2001