2 TESALONIKŊA 3
3
Gatta kay lak hay siɗawta hiɗi lopna kaw
Rom 15:30-32
1Ma hinin kayni, ɓosiyonna, siɗawgi kuma'a, a yoboyna vi Bum-Sumuna fi mer goyo, fi gajijita kaw, ki nam ka li jargiya nala, 2a numa ma fi butta-goyta kay sumuna sa bay-yalla hiɗi sa jiw-zlata; kay nisi kaf say hiɗi vidaɗi.
3May Bum-Sumuna nam ɗigere, nam ma vulgi donota, ma ŋomgi kay ma joona kaw. 4Numa tun vida vuma' hay Bum-Sumuna kigi ala nigi ka li'e, nigi ma lum ɗawn kaw mi va ma numa gat kalamna.
5Bum-Sumuna ɗiger dikgiya tam minda vi Lawna hiɗi cubta ŋalda vi Kristu ɗigerge.
6Ɓosiyonna, numa gatgi hay semda vi Bum-Sumuna Yesu Kristu, a nigi ma vi haygi goy jam tam ɓasuyn gigekaw ma poy hay zulomda, ma may poy hay gijum-gijumta, may kuɗ data ta nigi fum kuɗma' paɗita, tapgi hiɗi namɗi. 7Nigi kay tuwgi kaw wi ir nanige nigi fi sli kuɗma'a, kay numa poy jargi kayni may hay gijum-gijumtaɗi; 8Numa may ti funa vi sana ɦawaɗi; may hay lop ma ɦiɓiyna, numa li lop henjeta hiɗi falayta kay numa min mak sa kep jargiɗi. 9May kayn ala numa nagay kay sa vulma vaɗi, may naɗi, may numa min kayn kay ɗek tuwma' goy tigiya kay nigi sli kuɗma'a. 10Kay hay li ma numa ay hiɗi nigiya, numa gatgiya ala: La sa min li lopɗi hinim tiɗi kaw.
11May numa ka hum ala sum sara jargiya ka poy hay gijum-gijumta, li va noŋɗi may slew tuwsi hay lawta vi segena may. 12Numa' di tam sum nisin kayni, numa' gatsi kaw hay Bum-Sumuna Yesu Kristu, ala nisi ma li lopna visi hiɗi ŋalda, tum mi funa visi kay tuwsiya kaw.
13Ɓosiyonna, ma figi nigin kayn ala hin tuwgi mak kay li slen ma ŋaanaɗi. 14La sa hum kuɗ va ma numa digita hay ɗerwelda kaynɗi, ɗuwgi san kayni ŋaa'a, tapgi hiɗi nam loɗi, kay nam ma fi muɗ zulo'o. 15Nigi ma ɗuwum ki sa ma gawta naɗi, may gatamu ki ɓasukin nala.
Gi-deɓta hiɗi bolda
16Bum-Sumuna vi toyta kay tuwamu vulgi toyta hay liya'a hiɗi hagata va' pet vulge! Bum-Sumuna li hiɗi nigi kaf lige!
17gi-deɓta kayni mays hay ɓan nan Paulus pa. Tun ɓan gaa kuɗ ɗerwelda van kaf kayni mi nanu; kayni ti ɗota vanu.
18Slugota vi Bum-Sumuna vaya Yesu Kristu li hiɗi nigi kafge!
Currently Selected:
2 TESALONIKŊA 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001