1 PETER 2
2
1Kay na'ta hingi joota hiɗi ɗutta kaf goyo, hiɗi mileta hiɗi hunayta hiɗi yoboy ma joona kaf kaw. 2Ki guro sa vuɗi wulina nala, nigi ma dar miira vi Ŋusta ma bay ɗutta, kay nigi ma wul kulo'o hiɗi namu tam su'da. 3La nigi jugo ŋaata vi Bum-Sumunawana.
Yesu mi hiɗiy ma gef-ziyna
4Nigiyay goboy talamu, namu mi hiɗiyn ma irina, ma sumun gum goyna, may vilekay goyo, jifiy ŋolo kaw vok ir Lawna. 5Nigi nala kaw ki hiɗiyn ma irina nala, nigi ma wul kulo'o tam Tempella ma Ŋusta, kay nigi ma muɗ goy si sum sa li ɗifinna ma peldetna, ma kir Lawn ŋaa'a hay Kristu. 6Kay hay ɗota dit di ala:
Humgiya, nan tun hay Siyon hiɗiyn ma gef-ziyna,
vilekay goyo,
jifiy ŋolo,
sa ma vi hay namu ma muɗ goy zuloɗi.#2:6 Fi kayni hay Es 28:16.
7Nigi sa viyna, subur na'ta kayni figita, may kay sa bay-vina,
hiɗiyn ma sum sa in ziyn gum goyna,
muɗi mi hiɗiy ma ŋolla,
hiɗiy ma gef-ziyna,
hiɗiy ma ci dugum mi sa'a,
ma dab sem sa kaw.#2:7 Fi kayni hay Nul 118:22.
8Nisi dab sesi nala hay li ma nisi min hum kuɗ yoboynɗi, nisi ŋaɓay goyo kay kayni kaw.
9May nigiya, nigi mi jaf ma vilekay-goyna, muliyan-sa-ɗifinna, jaf-sum sa peldetna, sum sa gusina, kay nigi ma di goyo kay ŋaata vi nam ma yigi ay hay jufunda pa, tam haraŋa valam ma jifiy ŋolla. 10Nigi sa hay liyn ma kalayna ay si jaf-sum sa gasinɗi, may wulini nigi muɗawa si sumuna vi Lawna. Nigi sa bay fi slugota jewe, may wulini nigi fi slugotawa.
Irita vi sa viyna jar sa waana sa ŋom nagata, hiɗi mulaysina kaw
Rom 13:1-8
11Nigi sa hayan kigina, nan siɗawgi ala: Ki sum sa pulla hiɗi sum sa rogoyna nala, nigi ma tel tuwgiya kay darta vi sliwna ta dur hiɗi ciwta. 12Poygi ŋaa'a vok ir sa waana, kay hay li ma nisi ŋulgi ki sum sa li sle ma joo'o nala kaw, la nisi wi lopna vigi ma ŋaanawa, nisi ma subur Lawna hay li ma nam co ɗuwsiya.
13Kay na'ta humgi kuɗ gatta vi sa ŋom nagata hay semda vi Bum-Sumuna. La mi mulla, humgi kuɗum ki nam ma ŋolla nala; 14la mi guvernera, Lawna gumiya kay ka kitata kay sa li joota, kay subur nisi sa li ŋaata kaw; 15kay kayni mi minda vi Lawna, ala hay li ma nigi li ŋaata, nigi ma ziŋ bay-wida vi sa ɦay-ɦayna. 16Ki sum sa buti goyna nala, may butta-goyta na'ta ma bar yam joota vigiɗi, may ki sa sunda vi Lawna nala. 17Sligi yam sumun kaf kulo'o, mingi ɓosiyogina, ligi nar kuɗ Lawna, sligi yam mulla kulo'o.
18Nigi sa gorvona, humgi kuɗ mulaygina hiɗi narta kafe, humgi kuɗ sa ŋaana hiɗi sa lumaɗna tutaɗi, may kuɗ sa lawsi lop ŋolla kaw, 19la san ka ci lasta goy waa'a hiɗi yalam hotay gaa'a kuɗ Lawna ni, kayni muɗ goy slugota kalamu. 20Hay li ma nisi ka lasgiya kay nigi li suluku ni, gajijita mige nigi as fi kuɗ kayni? May la nigi fi lasta hay li ma nigi li ŋaata, kayni ti slugota kigiya vok ir Lawna. 21Kay nam yigiyawa kay kayni, kay mige Kristu kaw ci lastawa kigi nigiya, hini tigi nigi nala kaw kay nigi ma sli kuɗumu; 22nam may li sulukɗi, nam ma ɗutta may hay vunamɗi kaw. 23Namu ma hay liy ma nisi ŋulumu, nam hot ŋulda tisiɗi, hay li ma nisi lasamu, nam may gulutsiɗi kaw, may hin tuwam hay ɓam nam ma ka kitata ɗigerta. 24Nam ma ziy sulukŋa vayawa hay tuwamu kulo kay guna, kay nay sa miti tam sulukŋa ma muɗ iriya kuɗ ɗigerta; nam ma nigi kuɗ milla valamu fi yerta-goytawa. 25Kay nigi ay ki fok-dimina ma meray goyna nala, may wulini nigi hotiyawa tam sa ma ŋomda, nam ma ŋom ciwta vigiya.
Currently Selected:
1 PETER 2: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
