1 PETER 1
1
Ɗek-tuwta hiɗi gi-deɓta
1Peter, apostolla vi Yesu Kristu, tam sa vilekay-goyna, sa meray goy pulu hay Pontus, hay Galatiya, hay Kapadokiya, hay Asiya, hay Bitiniya kaw, 2nisi sa vilekay goyo kuɗ wida vokomta vi Lawna Bumna, kuɗ lita-peldetta vi Ŋusta, tam hum-vunda kuɗ Kristu Yesu, kuɗ busuwna valamu ma porayawa. Slugota hiɗi toyta li tigi ŋol lige.
Cubta-sle'ta vi su'da
3gi-deɓta tam Lawna bum Bum-Sumuna vaya, Yesu Kristu, nam ma kuɗ lamanda valam ta ŋolda vuɗaya wuli lo, hay dayta-kulota vi Yesu Kristu jar sa mitina pa, kuɗ cubta-sle'ta ta mus iriya, 4tam vocota ta as buw goyɗi, ta as saŋ goyɗi, ta as yak goyɗi kaw, ta ka ŋayay kulo kigiya hay wuralawna. 5Tigi nigi sa donota vi Lawna ka ŋomgiya, kuɗ vida, tam su'da ta ka goboy kay vul tuwa' goy haraŋi hay liyn ma cawna.
6Ligi firi hay dikgiya, la wulini nigi fi zumalda ir liyn neeɗa kaw. Kay la linigekaw nigi ma fi wakka kuɗ jafa' mara'a mara'a. 7Kay vida vigiya ta waki wak, na' ŋaa suw or ma fi ɓulaka may waki wak hay kuta. A na' ma muɗ goy suburta, gajijita hiɗi sli-yamda kulota, hay li ma Bum-Sumuna vaya Yesu Kristu ma vul tuwam goy haraŋi. 8Nam ma nigi bay wumu, may nir na'ta kep nigi minimu. Nigi bay wum hiɗi irgiya tuwa. May nigi ka viy hayamu, nigi ka firi hayam ŋolo hay firita ŋolda ta suw asta hiɗi gajijita. 9Hay li ma nigi fi wurakŋa vi vida vigiya, kayni su'da vi ciwta vigiya.
10Sa jobta-Lawna sa di voksiya kay slugota ta nigi ka haya' wulinta, nisi gar caw su'da na'ta, nisi feka' cawa'a kaw. 11Nisi gar hiɗi diksi kaf kay fek caw buura hiɗi liyna, ma Ŋusta vi Kristu ta ay haysiya ɗeksi goy kalam jewe, liyn ma na' ɗeksi ala Kristu ma ci lasta, bugolda nam ma fi gajijita kaw. 12Dit ɗeki goy tisi ala, nisi di slen namna kayni may kisi nisi kay tuwsiɗi, may tigi nigiya, wulini labar namna diy tigiya hay vun nisi sa kus labar ma firin tigiya hiɗi Ŋusta-Peldetta, ta ga'ay kulo hay Wuralawn pa, Sunda-Wuralawn kaw gar a fek caw slen kayni.
Gatta kay lak peldete, lak jigere, lak hay minda kaw
13Kay na'ta muɗgi varta vigi dono'o, lakgi hay ŋalda, lakgi cub slugota ta nigi min fa'a, hay li ma Bum-Sumuna vaya Yesu Kristu min vul tuwam goy haraŋi. 14Ki guro sa hum gatta ŋaa'a nala, nigi ma tap kuɗ darta vigi ta jewta ki hay li ma nigi ay hay bay-wida naɗi, 15May ki nam ma yigiyawa ka peldete, nala nigi kaw ma muɗ peldete hay poyta vigi kafe. 16Kay ɗot di ala: Nigi ma lak peldete kay nam ka peldete.#1:16 Ɗuw Slv 19:2.
17Nam ma ka ir saɗina, ma ka kitat kay gige gigekaw kuɗ lopna valamu valamuna, la nigi yum ala Bugiya, nala nigi ma poy hiɗi narta hay li ma nigi ka gaa kay nagat tani. 18Kay nigi wi ala nigi buti goy kay poyta vigi ta joota, ta nigi fa'ay kuɗ sumaygi vocot kayni, may hiɗi sle ma vat goynɗi, hiɗi doorotɗi hiɗi orɗi kaw, 19may hiɗi busuw ma gus lop ŋolla vi Kristu, busuwna vi goor ɦu-dimina ma va ma ges may talamɗi, moy may talamɗi kaw. 20Nam ma ay ŋaɓay goy jewe, jew cawa'ta tunita vi nagati pa, may wulini hay dabaŋ-gu'ta vi liyna, nam vul tuwamawa goy haraŋi kigi nigiya. 21Kuɗum namu nigi vaawa hay Lawna ma dayamawa kulo'o jar sa mitina pa, ma vulum gajijitawa, kay vida vigiya hiɗi cubta-sle'ta vigiya ma lak hay Lawna.
22Hay li ma nigi li ciwta vigi goy peldete hay hum-vunda kuɗ gasita tam minda vi ɓosiyom-tuwgina jar tuwgi lina, mingi tuwgi jar-tuwgi hiɗi dikgi kafe, 23Nigi sa vuɗi wuliya, hiɗi jafna ma buw goynaɗi, may hiɗi jafna ma buw goyɗina, kuɗ yoboyn ma irina ma vat goyɗina vi Lawna; 24kay
Sliwna pet ki usna nala,
gajijita valamu pet ki ɓona vi usna nala,
usna so goyo, ɓona valam yak goyo,
25May yoboyna vi Bum-Sumuna mus ta-ta hay Vatɗita.#1:25 Ɗuw hay Es 40:6-8. Kayni mi yoboyn ma kusi tigiya hay labara ma firina.
Currently Selected:
1 PETER 1: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
