1 MULIYANA 7

Inda vi ziyna vi mulla Salomon

1Salomon in ziyn ma musta valam lo. Inda vi ziy namna li busat doogo yam ɦidi. 2Sem ma jewna nam in ziyda ta ya' ala «ziyda vi juruta vi Libaŋ», fiyokka va' ir goldoŋ kis, buɗukŋa va'a ir goldoŋ dok-vasl, fiyokŋa va' ma kulona ir goldoŋ dok-ɦidi. Na' tuni kay dolla vi gu-gamna, ma zlaray kuɗ tuwam ir luwam fiɗi, gu-gamna ma koti ki malla nala ka cuki kulo kalamu. 3Ziy ma kulo kay dolla nisi cuk gu-gamna kulo kalamu, nam tap pet dok-fiɗi yam vasl, ziy ta kepta hiɗi gu-gamna doogo yam vasl. 4Ziy ma jakay kulo kay tuwamna ka ɦidi, ziy namna kaf fenetrena valam ŋray dig tuwamu tuwamu. 5Vun-ziyna hiɗi cokoromna kaf koti hiɗi gu-malla ma gefem fiɗi kaf ŋraya, ziy ma ɦidin kaf kayni, vunam ma mal goyna ŋray dig tuwam kafe. 6Nam kot vun-galana vi dolla, fiyokka valamu ir goldoŋ dok-vasl, buɗukka valamu ir goldoŋ dok-ɦidi, hiɗi vun-ziy hena goy voko, dolla ka haya hiɗi diɓira kaw. 7Nam kot vun-galana vi zlamda-mulda, liyn ma nam ka kitat hayna, vun-galana vi kitata, nam ŋuyum tuwam hiɗi gu-gamna, tun caway gaa vi nagat pa ta-ta kulo dig-ziyda.

8Ziyna valam ma musta nam kotom ki kayn nala kaw, nam inim goy hay wur-daŋŋa mara'a, goy bugol vun-galana, lo nam kot ziy tara'a ta ki kayn nala kaw kay goota vi mulla Farawn, ta nam sla' cata.

9Kay inda vi ziy namna kaf kayni, nisi garam mi hiɗiy ma ŋaana, ceɗi kayni ŋray ki tuwam nala, haray hiɗi siina, hayam ma kalafna hiɗi ŋorom ma goyna kaw, tun caw tam bag-ziyn ma viy gaan pa ta-ta kulo tam dilara vi ziyna, goy jiya ta-ta hay wur-daŋ ma ŋolla kaw. 10Bag-ziyda ma viy gaana koti hiɗi hiɗiy ma ŋaana ma ŋulona, hiɗiy ma goldoŋ doogo hiɗi ma goldoŋ glafandina kaw. 11Kulo kalamu lo, hiɗiy ma ŋaana ma fiyokŋa ka'a, ma ŋraya, hiɗi gu-gamna kaw. 12Hay wur-daŋŋa ma ŋolla, hiɗiy ma fiyokŋa ka jakay kay tuwam ɦidi, gu-malla vi gamna ka jakay kay tuwam kepe, ki wur-daŋ ma kalafna vi ziyda vi Ma-Vatɗin nala, ki vun-galana vi ziyda nala kaw.

Jakŋa ma kalaf hay Tempella

2 Lml 3:15-17; 4:1-22; 5:1

13Sa mara hay Tirus kep yum Hiram,#7:13 Kayni may mi Hiram ma mullaɗi. mulla maramu. 14Namu mi goora vi cata-duhulta hay jafna vi Neftali, bulumu mi sa ma Tirusna, mi sa ma li lop kawayna. Hiram kayni hobay hob hiɗi yalla, hiɗi wida vi slena, hiɗi wida (mara'a mara'a) kaw kay li lop hiɗi kawayn kuɗ jafam kafe. Nam co kat mulla Salomon, nam li lopna valam kafe.

15Nam yor dol ma ma'na hiɗi kawaya. Ma jewna fiyokka valamu ir goldoŋ doogo yam glafandi, hiɗi zigew ma fiyokka valamu ir goldoŋ doogo yam ma', dol ma ma'na zigew ma ŋaɓam maram ma goyna goldoŋ doogo yam ma'. 16Nam yorom yalam ma dilarina ma' kay lakam kulo kay yam dolla; ma kepna fiyokka valam ir goldoŋ vasl, ma ma'na fiyokka valam ir goldoŋ vasl kaw. 17Nam kot rida-kawayna ma ŋray vun tuwamna, hiɗi jaɓna kaw cukum kulo kay sle ma dilar yam-dolla, siɗiya kay ma jewna, siɗiya kay ma ma'na kaw. 18Nam zlar sle ma kolo-kolon kuɗ tuwam ma' kat rida-kawayna ma kepna, kay burum kulo kat yam-dolla ma dilarina ma kepna, nam li ki kayn nala kaw hiɗi yam-dolla hena. 19Hay yam-dolla ma dilarina ma ka tuni kulo kay dolla, ma coli hay vun-galana, yam tayn ka kulo kalamu ir goldoŋ fiɗi. 20Yam-dolla ma tuni kulo kay dolla ma' ma' kafe, kolo-kolon ka ŋuyi talam kis-ma' hay gal ma kulona, goboy hiɗi galam ma horayna ma ka goy bugol rida-kawayna; yam-dolla ma hena kolo-kolon ka mokay talam kis-ma' kaw. 21Nam lak dolla hay vun-galana vi Tempella; dolla ma hay gal ma jufna nam colom kulo'o, tunum semda valam ala Yakin; bugolda nam col dolla ma hay gal ma gulla kulo'o, nam tunum semda valam ala Bowaz. 22Va ma ka kulo kalamna sli yam tayn nala. Inda vi sle ma tam dolla nam vat ki kayn nala.

23Nam kot ŋarakŋa ma yori hiɗi kawayna, wayam ŋaɓ goldoŋ doogo, ŋray goy vun tuwam hoɗoɗ, fiyokka valam ta kulota ir goldoŋ vasl, maram ma goyna ŋaɓ goldoŋ dok-ɦidi. 24Sle ma sli kurdi-viir nala ka ciy gaa kuɗ gaŋam ma dilarina, doogo ciy hay goldoŋ kep, ŋuyi goy hay gaŋ ŋarakŋa noŋ kafe, zlaray kuɗ kuɗ tuwam ma', nam yoray kuɗ tuwam kep hiɗi ŋarakŋa. 25ŋarak namna ka tuni kulo kay luwayn doogo yam ma'; luway ma ɦidina iram muɗi hay gal ma gaana, luway ma ɦidina iram muɗi hay gal ma vulatina, luway ma ɦidina iram muɗi hay gal ma kayamna, luway ma ɦidina iram muɗi hay gal ma kuɗuwna may; ŋarakŋa ka tuni kulo kalamu, ŋorom ka muɗi kalafi may. 26Diɓilikŋa valamu ŋray hiɗi buɗukŋa vi way-ɓamta, gaŋam dilari ki gaŋ tasat nala, koti ki yam tayn nala. Niy ma hayamna ir litir dok-glafandi.#7:26 Hay hebren di ala niy ma hayamna ir bat birim ma'.

27Nam yor kawayn gaa kuɗum doogo, ma kepna fiyokka valamu ir goldoŋ fiɗi, ɓuɗukka valamu ir goldoŋ fiɗi kaw, fiyokka valam ta kulota ir goldoŋ ɦidi. 28Kayni mi sle ma diram ma yori gaan koti hiɗi namna: Nam koti hiɗi kaway ma beɗayna, jaram jaɓay tam gefem hiɗi zugulayna ma gurayna. 29Kulo kay kaway ma beɗayna ma ka jar zugulay ma gurayna; zlona, luwayna hiɗi kerubena ka iniya, kulo kalamu hiɗi gaa kuɗumu zlon ka'a, luwayn ka kaw, zigew ma ɗoyna ka torɗay jar-tuwamu. 30Diram ma yoray gaana marige kaw ka hiɗi selem ma ligatna fiɗi fiɗi, murlaŋŋa valamu mi kawaya kaw. Selem ma fiɗin kaf pelem ka'a, gaa kuɗ kawayna ma yorayna, pelem hen ka yoriya, ɗiger vok zigew ma torɗay jar-tuwamna. 31Kaway ma yorayna, dikam ma kalafna vunam giy goy danani ir goldoŋ kep hay galam ma kulona vunam ma giy goy dananna nam ŋray hoɗoɗ sli sem kawayna ma kawayn coli kalamna nala, nam ir goldoŋ kep hiɗi gali; hay vunam ma giy goy dananna slen ma ceɗay ka'a kaw gefem ka fiɗi may hoɗoɗ'ɗi. 32Selem ma fiɗina ka gaa kuɗ kaway beɗayna, selem ma ligatna hiɗi murlaŋ-kawayna hiɗi sle ma talam kafe, sem kep kep kafe ka hiɗi fiyokka valamu ir goldoŋ kep hiɗi gali. 33Selem ma ligatna ŋray ca ki sem kekena nala, murlaŋ-kawayna hiɗi sle ma tam selemna kaf yoray mi kawaya. 34Kawayn namna gefem ma fiɗin kafe ka zlubaki kulo tam tuwamu ki kaway ma yori gaa kuɗumna nala. 35Galla ma ŋolla vi kawayna poŋi kulo'o ir goldoŋ kep hiɗi gali, nam hoɗoɗ' hay galam kafe, hay gal ma ŋolla vi kawayna, kaway ma ziyimna hiɗi kaway beɗayna, nam zlubaki tam tuwamu kaw. 36Kat tuwam ma beɗayna ma nam deŋay talamna, hiɗi kat kaway beɗayna vi kerubena kaw, nam ɗo kerubena, zlona, hiɗi gomona, ŋray dig liyn ma hini goy ɦawan kafe, galam kaf nam ɗom jifiy ŋolo. 37Ki kayn nala nam kotom diram ma doogo ma gaa kuɗumna; yoora valamu, ŋaɓta hiɗi jifna valamu ŋray ca ki tuwam nala.

38Nam kot doway-firina doogo ma yori hiɗi wayna, doway-firi kep kayni litir hayam birimi hiɗi kis-karkiya, doway-firi kep goldoŋ fiɗi fiɗi kaw ka tuni kay kaway ma yorayn kep kep. 39Nam lak doway-firi ma vaslna hay gal ma jufna vi ziyda, doway-firi hena ma vaslna nam lakam hay gal ma gulla vi ziyda may; ŋarakŋa ma ŋolla nam tunum hay gal ma jufna vi ziyda, hay gal kayami kot gal kuɗuw neeɗa may. 40Hiram kot ŋarak ma yaw butuw-kuna, pella hiɗi ŋalina may. Ki kayn nala Hiram vat lopna ma mulla Salomon vulumti hay ɓalamu, kay kot ziyda vi Ma-Vatɗina.

41Dolla ma ma'na, yam dolla ma dilarina ma ŋray hoɗoɗ' kay lakam kulo kay dolla, kaway-ciliyna ma ma'na, kay lakam kulo kay va ma dilar yam dolla; 42sle ma kolo-kolona kis-fiɗi kay kaway-ciliyna ma ma'na, sle ma kolo-kolon zlaray kay tuwam ma' kat kaway-ciliyn kep kep, kay lakam kulo kay va ma dilar yam dolla ma ka kulo kay dolla; 43kaway ma yoray gaa kuɗum doogona, hiɗi doway-firina ma lakay kalamna. 44Ŋarak ŋolla, hiɗi luway ma ini gaa kuɗum doogo yam ma'na, 45ŋarakŋa ma ko butuw-kun hayna, pella hiɗi ŋalayna. Slen namna kaf ma Hiram lum mi Salomon kay ziyna vi Ma-Vatɗina kayni nam koti hiɗi wayna ma wilena. 46Mulla tuɗ yorom goy hay fulda vi Yordan hay naga ma dirginna, jar Sukkot hiɗi Sartan. 47Jak namna kaf Salomon hinim nala bay ŋa nekka valamu, kay nam kayni suwi ŋol zututu.

48Salomon kot sle hena kaf lo kay ziyna vi Ma-Vatɗina; giwin-ma-ɗifinna ma ora, tablena ma ora, kay lak tin ma vuli goyn kalamu; 49va ma tun fitilla ma koti hiɗi or ma bay-rigasna, vasl hay gal gulu, vasl hay gal jufu, ɗiger vok liyn ma peldetna, hiɗi ɓalamu, fitilla hiɗi sle ma do kuna ma ora; 50doway-firina, kewna, ŋalay ma ŋulona, tasa ma gurayna, hiɗi ganuna ma koti hiɗi or ma bay-rigasna, hiɗi cokoromna vi vun-ziy ma kal kalaf hay ziy ma suwi peldetna, hiɗi vi vun-ziyna ma kal kalaf hay Tempella. 51Ki kayn nala lopna ma mulla lum kay ziyna vi Ma-Vatɗin vatawa. Bugol kayni nam mar doorota, ora, hiɗi jakŋ kafe ma bulum David vulum goyo mi Ma-Vatɗina. Nam lakam kalaf jar faray hena hay ziyna vi Ma-Vatɗina.

Currently Selected:

1 MULIYANA 7: Massana

Highlight

Copy

Compare