1 MULIYANA 6

Inda vi Tempella

2 Lml 3

1Hay busata kis-fiɗi hiɗi diram dok-glafandi bugol kal-goyta vi gurona vi Israyel hay Egipte pa; kayni ti busata ta Salomon in ziyna mi Ma-Vatɗina. Hay busata fiɗita vi mulda valamu kay sa Israyella, hay til ma ma'na, kayni mi tilla vi Ziv. 2Ziyda ta Salomon ina' mi Ma-Vatɗinta fiyoka' ir goldoŋ dok-karkiya, buɗukŋa va' ir goldoŋ dok-ma', fiyoka' ta kulota ir goldoŋ dok-ɦidi. 3Jiwler ma vun Tempella vunam ma kuɗ fiyokka valamu hini goy ir goldoŋ dok-ma', ŋray dig buɗukŋa vi ziyda, fiyokka valam ma kuɗ buɗukka vi ziyna ir goldoŋ doogo.

4Mulla Salomon kot fenetrena hiɗi kaway-ciliyna ma donona. 5Nam in ziy ma jakay kulo kay tuwamna kat ŋor ziyd ma goyna, nam ka ŋuyi tam gulmunna vi ziyda hiɗi Tempella hiɗi liyn ma peldetna; ziy guray ma nam kotomna ka ŋray kulo kat ziyda. 6Ziy ta goota buɗukŋa va' ir goldoŋ vasl, ta jata ir goldoŋ karkiya, ta ɦidita ir goldoŋ siɗiya, kay vun-ziyd ma goy jiyna nam hotom kalaf neeɗa neeɗa, kay vun guna ma kal goy hay ir-ziydɗi. 7Hay li ma nisi ka kot ziyd kayni, nisi jakam kulo kayn mi hiɗiy ma ceɗayn kaf, hay li ma ziyd ka in kayni, marto lebo ceɗna lebo kaway mara'a kaw sa may humum tiy kalaf hay ziyd noŋ ne'ɗi. 8Ziy ma jakay kay tuwam ɦidina vunam ma kal hayamna ka hay gal ma jufna vi ziyda, a jik hay ziyda goota ta kulo kamda kayni, va ma jikŋa ma ligatna ka'a, tun caw hay ta kulota, ta jaata ta-ta hay ta ɦidita. 9Hay li ma Salomon vat inda vi ziyn vatna, nam cuk hoɗokŋa hiɗi malla ma koti hiɗi gu-gamna kulo ka'a. 10Ziy ma jakay kay tuwam tam ziyda ŋolda nam kotom kayni fiyokom ir goldoŋ vasl vasl, nam junum kulo kat ziyda hiɗi gu-gamna.

11Ma-Vatɗina di yoboyn tam Salomon ala: Naŋ ka inan ziyd zawni. 12La naŋ poy kuɗ gatta vanu, la naŋ li kuɗ dita vanu, la naŋ ŋom vun-ma-gatna van kafe, tap kuɗumu kaw, slen ma nan dum mi buŋu David nan ma lum taŋu. 13nan ma li ziy jar gurona vi Israyel, sumuna vanu sa Israyella nan ma hinsi goy noŋɗi.

14Hay li ma Salomon vat inda vi ziyd vatna, 15nam cuk ɦoɗokŋa vi gu-gamda hay dig-ziyd ma kalafna, tun caw ay gaa vi nagat pa ta-ta kulo dig-ziyda; hay ziyd ma kalafna nam cuk gun haya ki kayn nala, nam cuk gu-siprena hay ziyd ma gaana. 16Nam cuk ɦoɗokŋa vi gu-gamna ir goldoŋ dok-ma' hay ziyd ma gaa kuɗuwna, tun caway gaa kay nagat pa ta-ta kulo tam tuw-ziyda, liy namna nam ŋomomu kay kot liyn ma peldetna haya, kayn mi liyn ma suwi peldetna. 17Goldoŋ ma hini goy vok dok-fiɗina hini kayni kay hay-ziyda, kayn di ala Tempella. 18Gu-gamna ma kalaf hay ziyda yalam ceɗay ki vuɗna vi kurdi-viir nala, yalam kulo'o ki yam tayn nala; kaf kayni mi gu-gamna, sa as wi hiɗiy kep noŋɗi.

19Salomon kot liyn ma peldetna kalaf hay ziyda, kay tun timgilla vi bonota vi Ma-Vatɗin haya. 20Liyn ma peldetna fiyokka valam ir goldoŋ dok-ma', buɗukka valamu ir goldoŋ dok-ma', fiyokka valam ta kulota ir goldoŋ dok-ma' kaw. Salomon korom tuwam hiɗi or ma bay-rigasna, nam kot giwin-ma-ɗifinna goy vok liyn ma peldetna hiɗi gu-gamna, korom tuwam hiɗi ora. 21Hay ziyd ma kalafna nam kotom hiɗi or ma bay-rigasna, nam kal sligar-gaɓayna hay jaɓ ma ka vok liyn ma peldetna, nam korom tuwam hiɗi ora. 22Nam kor tuw ziyd kaf hiɗi ora, ziyd noŋ kafe, giwin-ma-ɗifinna ma ka vok liyn ma peldetna nam korom tuwam hiɗi or noŋ kafe.

23Nam kot keruben ma' hiɗi gu-olive ma fulla, fiyokka valam ta kulota ir goldoŋ doogo, nam lakam kalaf hay liyn ma peldetna. 24Keruben namna ma ma'n kayni ma kepna fiyokka vi gilaŋatam ta kepta ir goldoŋ vasl, tun caw tam vun gilaŋat ma kepna ta-ta tam vun hena tap goldoŋ doogo. 25Keruben ma hena gilaŋatam tapay ir goldoŋ doogo kaw, keruben ma ma'na kafe koti ŋray ca ki tuwam nala. 26Keruben namna, ma kepna fiyokka valam ta kulota ir goldoŋ doogo, ma ma'na nala kaw. 27Salomon lak keruben goy hay way-ziyda, haya' kalafi. Gilaŋatna vi kerubena ka mali goyo, gilaŋatna vi ma kepna joy tam tuw-ziyd hena, gilaŋatna vi ma kep hena lo joy tam tuw-ziyd hena may. Vun-gilaŋatsi joy tam tuwamu kalaf hay way-ziyda. 28Salomon kor tuw keruben hiɗi ora.

29Kat tuw Tempella kaf kayni, kalafi hiɗi goy jiya, nam ceɗ kerubena hiɗi gu-gomona, hiɗi ɓona#6:29 hum lopo kay hay Hebren kaw nam may goy haraŋɗi. 30Yam nagana ma kalaf hay ziyda nam korom hiɗi or ma bay-rigasna, kalafi hiɗi goy jiya kaw.

31Hay vun liyn ma peldetna nam kot vun-ziyda hiɗi cokorom haya' ma' koti hiɗi gu-olive ma fulla; jaram ma ŋrayna hiɗi naga ma inina as ir gal ma vaslna vi tuw-ziyda. 32Cokorom ma ma'na koti hiɗi gu-olive ma fulla, nam ceɗ kerubena hiɗi gu-gomona hiɗi ɓona, nam korom tuwam hiɗi ora, nam kor ora kat kerubena hiɗi gomona kaw. 33Nam kot vun-ziyna vi Tempella ki kayn nala kaw, kotom hiɗi gu-olive ma fulla, nam ŋray ca hay gal ma fiɗina vi tuw-ziyda, hiɗi cokorom ma ma'na koti hiɗi gu-siprena. 34Cokorom ma kepna koti hiɗi ɦoɗokŋa ma hormosin talam ma', hena nala kaw. 35Nam ceɗ kerubena hiɗi gu-gomona hiɗi ɓona, korom tuwam hiɗi ora, nam meɗem kulo'o kay va ma ceɗayna.

36Bugolda nam kot wur-daŋŋa ma kalafna; jak hiɗiy ma fiyokŋ kulo kay tuwam ɦidi may, jak ɦodokŋa vi gu-gamna kulo kay tuwam kepe may.

37Hay busata fiɗita, hay tilla vi Ziv, bag-ziyda vi Ma-Vatɗina vaawa gaa'a; 38hay busata doogo yam kepta vi tilla vi Bul, kayni mi til ma glafandina, inda vi ziyda hiɗi sle ma ta'na kaf vatawa ki kotta va' ma li nala. Salomon in ziy na'ta kayni ir busat siɗiya.

Currently Selected:

1 MULIYANA 6: Massana

Highlight

Copy

Compare