1 MULIYANA 17

Sa ma jobta Eliyas, di vun-jobta kay koɓorona ma li'e Eliyas ka goboy hiɗi niy-ma-riŋŋa vi Kerit

1Eliyas ma Tikbina, sa ma ziyam hay Galaadna, di tam Akab: Ma-Vatɗin ka iriya, Lawna vi Israyel ma nan ka sunumna. Humaŋu, jar busat cani maɗayn ma giɗi, niyn ma siɗi, ta-ta din mi nanu. 2Ma-Vatɗina di yoboyn tam Eliyas ala: 3Fokaŋis tan pa, tuɗaŋ hay gal ma kuɗuwna, ŋayaŋ tuwaŋ jar niy-ma-riŋŋa vi Kerit, ma ka ɗiger vok Yordan. 4Naŋ ma ci niyna hay niy-ma-riŋŋa waŋŋi, nan vul hagata tam gaw-gawna kay vulaŋ tina hay liy namna may. 5Nam kaliya, li ki Ma-Vatɗin dum nala, nam kaliya mus goboy hiɗi niy-ma-riŋŋa vi Kerit, ma ka ɗiger vok Yordan. 6Gaw-gawna ka maram funa hiɗi sliwna hay graw culumta, maram funa hiɗi sliwna hay vulatita kaw. Nam ka ci niyna hay niy-ma-riŋŋa. 7May co hay liyn mara neeɗa niy-ma-riŋŋa so goyo, kay niy may si hay nagat noŋɗi.

Eliyas co vo vi cata duhulta hay Sarepta

8Ma-Vatɗina di yoboyn tam Eliyas ala: 9Fokaŋ kulo'o, tuɗaŋ hay Sarepta, ta ka hay Sidon, musaŋ ɗawni. Humaŋu, nan vul hagat tam cat ta duhulta kay na' vulaŋ tina. 10Nam fokay kulo'o, kalay hay Sarepta. Hay li ma nam co hay vun-galana vi hoyok-ziyn kayni, nam ŋaf hiɗi cata-duhulta kep, na' ka yaw guna. Nam ya'a, ka di ta' ala: Nan siɗawagu kay nak ma tuɗ garan niy ma ci'ay neeɗa hay dowayta, kay nan min ci'e. 11Na' kalay garam niyna. Nam ya' mara lo ka di ta' ala: Nan siɗawagu kay nak ma maran dir fu kag ne'. 12Na' ka hotom dit ala: Hay sem Lawna vaŋ ma irina, fu may yiy kanɗi, nan ka hiɗi futuw ne' ɦawa hay dowayta, mul ne' ɦawa hay doŋolayta may. Ɗuwaŋ tige, nan ka vilek gu cekcelem ma', bugolda nan ma kal vo'o, nan ma kot tin kanu hiɗi goora vanu; numa ti funa, bugolda numa cub mitta. 13Eliyas da'a: Lag narɗi, tuɗag vo'o, nak ma li'e ki nak di nala. May kawni, nak ma yaw kuɗum ne' kay kotan hambul ma goor neɗe, nak maranta; bugolda nak ma kot hena kag naku hiɗi goora vagu. 14Kay Ma-Vatɗina Lawna vi Israyel di ala: Futuw ma ka hay dowayta ma kiɗa goy noŋɗi, mul ma hay doŋolayta ma hot gaa'a noŋɗi kaw, ta-ta hay buur ma Ma-Vatɗina ma hin niyn si gaa kay nagata. 15Na' kaliya, na' li ki Eliyas di nala. Na' fi tina va'a ir liyn ŋolo, na'a hiɗi sum sa vo va'na, hiɗi Eliyas kaw. 16Futuw ma hay dowayta may vat goy noŋɗi, mul ma hay doŋolayta may hot gaaɗi kaw, kuɗ yoboy ma Ma-Vatɗin dum hiɗi vun Eliyasna.

17Bugol slen kayni, goora vi cata duhulta ta sum ziyna tuwam li moyo, moyn lum ŋolo ta-ta muɗ kayni suk may hin hayam noŋɗi. 18Na' di tam Eliyas ala: Sana vi Lawna, va ma ka jaran nan hiɗi naŋu mi mige? Naŋ co hay ziyna van kayni kay ziy jiw-zlata van kulo'o, a goora vanu ma mita su? 19Nam hota' dita: Vulan goora vagu. Nam slum hay dig sulumu, jik hiɗi namu hay ziyda-kulo ta nam Eliyas ka musi haya'ta. Nam burum gaa kay va ma buura valamu. 20Bugolda nam siɗaw Ma-Vatɗina di'e: Ma-Vatɗina, cat kayni van vo hay ziyna va'a. Ki rogoyna va' nala. Wulin kayni naŋ min ala goora va' ma mita kay na' ma kal hay yorta su? 21Nam meɗ tuwam goy gaa kay goor sem ɦidi, siɗaw Ma-Vatɗina di'e: Ma-Vatɗina Lawna vanu, nan siɗawaŋu, hin ciwta vi goor kayni hotay hayam hotge. 22Ma-Vatɗina hum del Eliyas, ciwta vi goor kayni hotay hayamu, nam hot muɗ iriya may. 23Eliyas sli goora, jikim gaa'a, vulum mi sulumu. Eliyas di cata: Ɗuwagu, goora vag ka iriya. 24Cat di tam Eliyas: Wulin kayni nan wi ala naŋ mi sana vi Lawna, yoboyna vi Ma-Vatɗina ma hay vunaŋŋa kayni ti gasita kaw.

Currently Selected:

1 MULIYANA 17: Massana

Highlight

Copy

Compare