1 MULIYANA 16

1Ma-Vatɗina di yoboyn tam Yehu goora vi Hananiya, kay nam ma di tam Bayeska ala: 2Nan yawaŋay goy hay butuwn pa, nan tunaŋ ma ŋolla kay sumuna vanu sa Israyella; may kay naŋ tuɗ hay baŋal Yerobowam, naŋ kal sumuna van sa Israyella hay sulukŋa, kay ɓulakan dikanu hiɗi suluk ma nisi lumna, 3wulin kayni nan min ɦasaŋ goy hay ziyna vaŋu, nan min muɗ ziyna vaŋ ŋray ca ki ziyna vi Yerobowam goora vi Nebat nala. 4Sa ma hay jafna vi Bayeska ma mit vo hay hoyok-ziyn ɗawni, durnayn ma mutumu, sa ma hay jafna valamu ma mit goy hay fulda ɗawni, layayn ma dukalawna ma tumu may.

5Caw lopna vi Bayeska ma hinina, slen ma nam lum kafna, kursulita valamu kaw, kayni ka ɗoy hay ɗerwelda vi labar ma Liyna vi muliyana vi Israyel. 6Bayeska mitiya, nisi pum hay Tirsa, goora valamu Ela ti mulda hay baŋalamu. 7Ma-Vatɗina ɗek yoboyna valam goy hay vun sa ma jobta Yehu, goora vi Hananiya, kay nam ma law kat Bayeska hiɗi jafna valamu, kuɗ joon kaf ma nisi lum kir Ma-Vatɗina, hay li ma nisi ɓulakam dikamu hiɗi lop ma nisi lumna, hay li ma nisi muɗ tuwsi ŋray ca ki jafna vi Yerobowam nala, kay mige nam ci sum sa hay jafna vi Yerobowam.

Ela, mulla vi Israyel

8Co hay busata dok-ma' yam karkiyata vi Asa mulla vi Yuda kayni, Ela goora vi Bayeska ti mulda kay sa Israyella hay Tirsa. Nam ti mulda ir busat ma'.

9Sa ma sunda valam Zimri, ma ŋolla vi galla vi keke-ma-duura, fok kulo kalamu. Ela ay hay Tirsa hay na'ta, nam ka ci'e, ka ɦoy tuwam kaw hay ziyna vi Arsa, ma ŋolla hay ziyna vi mulla hay Tirsa. 10Zimri kal kalafi, nam calamu, cap cum goy mati, kayn hay busata dok-ma' yam siɗiyata vi Asa mulla vi Yuda, nam ti mulda hay baŋalamu may. 11Hay li ma nam muɗi mulu, musawa kay zlamda-mulda valamu kaw, sum sa vo hay ziyna vi Bayeska nam cisi goy kafe, sumuna vi Bayeska la mi sugolomu lebo la mi banamu kaw nam may hin mara goy kep noŋɗi. 12Zimri ɓulak ziyna vi Bayeska goy kafe, kuɗ yoboy ma Ma-Vatɗina dum kat Bayeska hiɗi del Yehu ma jobta-Lawna, 13kuɗ sulukŋa kaf ma Bayeska hiɗi goora valam Ela lumu, ma nisi kal sum sa Israyella hayamna, kay nisi bulak dik Ma-Vatɗina Lawna vi Israyel hiɗi lawayn ma waana visiya.

14Caw lopna vi Ela ma hinina, sle ma nam lum kafna, kayni ka ɗoy hay ɗerwelda vi Labar-Ma-Liyna vi muliyana vi Israyel.

Zimri, mulla vi Israyel

15Co hay busata dok-ma' yam siɗiyata vi Asa mulla vi Yuda kayni, Zimri ti mulda ir buur siɗiya hay Tirsa. Gibbeton nagata vi sum sa Filistin ay ŋuyi kisiya.

16Sum sa ŋuy nagatna hum labara ala: Zimri fok lawtawa, nam ci mullawa noŋo. Hay buur na'ta kayni nisi tun Omri kisi mulu hay kaŋŋa. Namu mi ma ŋolla vi sojena visiya. 17Omri hiɗi sum sa kuɗumna kaf yaways hay Gibbeton pa, nisi ŋuy Tirsa. 18Hay li ma Zimri wi ala hoyok-ziyn sliya, nam kal mus goy hay ziyna vi mulla, nam ŋal ziyna vi mulla gaa kalamu. 19Ki kayn nala nam mita, kuɗ joo ma nam lumna hay li ma nam li slen ma kir Lawn joo'o, kay nam tuɗ hay baŋal Yerobowam, kal tuwam hay suluk ma Yerobowam lumna hay li ma nam kal sum sa Israyel hay sulukŋa.

20Caw lopna vi Zimri ma hinina, law ma nam fokomna, kayni ka ɗoy hay ɗerwelda vi labara ma Liyna vi muliyana vi Israyel.

21Hay na'ta kayni sumun irsi ɓuraw gaa ma', gal hena min tunum mul mi Tibni goora vi Ginat, gal hena minim mi Omri may. 22Sa min Omrina donota visi suw kay sa min Tibni goora vi Ginatna. Tibni mita, Omri ti mulda may.

Omri, mulla vi Israyel

23Co hay busata dok-ɦidi yam kepta vi Asa mulla vi Yuda kayni, Omri ti mul kay sa Israyella. Nam ti mulda ir busat doogo yam ma'. Bugol nam ti mul ir busat karkiya hay Tirsa tina, 24nam gus hiɗiyta vi Samariya hay ɓam Semer ir gurjuta talente ma'; nam in ziyn kulo kay hiɗiyna, hoyok-ziy ma nam inimna nam tunum selem ala Samariya, ŋray hiɗi sem Semer mul hiɗiyta.

25Omri li sle ma joo'o kir Ma-Vatɗina, nam li joo suw nisi sa ay jewemna kafe. 26Nam tuɗ hay hagata vi Yerobowam goora vi Nebat, kal tuwam hay suluk ma Yerobowam kal gurona vi Israyel hayamna. Nisi ɓulak dik Ma-Vatɗin Lawna hiɗi lawayn ma waana visiya.

27Caw lopna vi Omri ma hinina, slen ma nam lumna, kursulita valamu, kayni ka ɗoy hay ɗerwelda vi Labara ma Liyna vi muliyana vi Israyel. 28Omri mitiya, nisi pum hay Samariya. Akab goora valamu ti mulda hay baŋalamu may.

Akab mulla vi Israyel, nam sli Yesabel goota vi mul ma Sidonna

29Akab goora vi Omri ti mulda hay Israyel, kayni hay busata dok-ɦidi yam galfandita vi Asa, mulla vi Yuda. Akab goora vi Omri ti mulda ir busat dok-ma' yam ma' kay sa Israyella hay Samariya. 30Akab goora vi Omri li slen ma joo kir Ma-Vatɗina, suw nisi sa ay jewemna kafe. 31Kay li suluk ki Yerobowam goora vi Nebat nala kayni kiram kiɗay ɦawa, nam kaliya sli Yesabel ca'a, na'a ti goota vi Etbaal mul ma Sidonna, nam kalay sun Baal, girif gaa vokomu kaw. 32Nam kot giwin-ma-ɗifinna mi Baal hay ziyna vi Baal ma nam kotom hay Samariyana, 33nam ceɗ lawayn ma waana Astarte. Akab li joo suw muliyana vi Israyel sa ay jewemna lo, nam ɓulak dik Ma-Vatɗina, Lawna vi Israyel.

34Hay liy namna kayni, Hiyel ma Betella in Yeriko; nam va' baga' gaa kayni, hiɗi busuw goora valam ma ŋolla Abiram jak vun-galana hiɗi busuw goora valam ma joriyona Segub. Kuɗ yoboy ma Ma-Vatɗin dum hiɗi vun Yosuwa goora vi Nun.#16:34 Ɗuw hay Yos 6:26.

Currently Selected:

1 MULIYANA 16: Massana

Highlight

Copy

Compare