Cantares 4
4
Qarim nin:
1¡Kuyakusqalláy, mayna kuyayllapaqmi qamqa kanki!
¡Llumpay kuyayllapaqmi qamqa kanki!
Ñawikikunapas veloykipa qepanpi
pakakuq palomakuna hinaraqmi,
chukchaykipas Galaad law orqonkunapi
pawaykachaq cabrakuna hinaraqmi.
2Kiruykikunapas,
millwanta ruturuspa chayllaraq bañarusqa ovejakuna hinaraqmi,
iskaytakama wachakuq oveja hinaraqmi;
manam kanchu hukllapas qolluqqa.
3Simikipas puka qaytu kaqlla pukay-pukaymi,
rimaynikipas miski taki hinaraqmi,
veloykipa qepanpi uyaykikunapas
iskayman partesqa granada kaqlla pukay-pukaymi.
4Kunkaykipas, suma-sumaq rumikunamanta
Davidpa ruwachisqan torre hinaraqmi;
chaypim waranqa escudokuna warkurayachkan,
chay escudokunaqa, qari-qari soldadokunapa
guerrapi peleanan escudokunam.
5Ñuñuykikunapas paris luwichukuna kaqllam,
amanqay waytakunapa chawpinpi
mikuq luwichukuna hinam.
6Pacha achikyamuchkaptinmi,
manaraq inti qespimuchkaptinmi,
mirrapa kasqan monteman risaq,
inciensopa kasqan moqoman pasasaq.
7Kuyakusqalláy ¡mayna kuyayllapaqmi kanki!
manam qampiqa imapas mana allinqa kanchu.
8Warma yanachalláy,
Líbano orqomantayá uraykusunchik,
Líbano orqomantayá kuskanchik uraykusun.
Amana sutiyuq orqopa puntanmantayá qawariy,
Senir orqomantayá, Hermón orqomantayá qawariy;
leonkunapa, leopardokunapa uchkunmantayá qawariy.
9Kuyakusqalláy, sonqoytam suwaruwanki,
huk qawariyllawanmi sonqoyta suwaruwanki,
kunkaykipi collarnikiwanmi wataruwanki.
10¡Mayna sumaqmi kuyakuynikiqa, kuyakusqalláy!
kuyakuynikiqa vinomantapas aswan miskillañam,
perfumekipas miski olorkunamanta aswan miskillañam.
11Warma yanachalláy,
rimaynikipas abejakunapa miskin hinaraqmi,
qalluykipa ukunpipas
lechewan abejapa miskinmi kachkan.
Pachaykikunapa asnariyninpas
Líbano orqo hinaraqmi asnarimun.
12Warma yanachalláy, qamqa kanki:
Cercosqa huertam,
wichqasqa qocham,
pakasqa pukyum.
13Qamqa kanki
miski ruruq granadakunapa ikllirinan huertam,
azafrán waytapa, nardo waytapa wiñanan huertam,
14nardo waytapa, azafrán waytapa,
miski asnaq cañapa, canelapa,
incienso sachakunapa, mirra sachakunapa,
áloe sachakunapa, miski asnaq sachakunapa
tarikunan huertam.
15Qamqa kanki:
Huertakunapa paqarinanmi,
kawsaq yakukunapa paqarinanmi,
Líbano orqomanta uraykamuq yakum.
Warmim nin:
16Hanay lawmanta pukumuq wayra ¡hatariy!
uray lawmanta pukumuq wayra ¡kallpamuy!
Miskillaña asnaynikichikta huertaypi pukuriychik.
Kuyakusqalláy, huertaykimanyá hamukuy,
miskillaña rurunkunatayá mikuykuy.
Currently Selected:
Cantares 4: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012