Proverbios 7
7
Pierdekuq warmipa engañakuyninmanta
1Churilláy, yachachikuyniykunata kasukuy,
kamachikuyniykunata sonqoykipi waqaychay.
2Kamachikuyniykunata kasukuy,
yachachikuyniykunata ñawi ruruykita hina waqaychay,
hinaspaqa kawsankim.
3Dedoykikunaman watakuy,
tablapi qellqachkaq hina sonqoykipi qellqakuy.
4Yachaytayá niy: “Qamqa paniymi kanki” nispa,
yuyayniyuq kaytañataq niy: “Qamqa aylluymi kanki”, nispa.
5Paykunam qosanta engañaq warmimanta librasunki,
chayna warmipa miskillaña rimayninmantam waqaychasunki.
6Wasiypa ventananmanta qawarispaymi,
7jovenkunapa chawpinpim rikururqani
mana ancha yuyay hapiq joventa.
8Paymi callenta rispan chay warmipa wasin lawman esquinata muyuykurqa.
9Tardeykuruptinmi tutaykamurqaña.
10Hinaptinmi paywan tupananpaq
qonqayta huk warmi lloqsiramurqa,
chuchumikapa pachanwan pachasqa,
sakrillawan engañananpaq.
11Rimaysapa mana penqakuq warmi,
wasipi mana takyaq warmi;
12chayna warmiqa callekunapim, plazakunapim,
wichirachinanpaq purikuqkunata wateqachkan.
13Paymi chay joventa abrazakuykuspan muchaykurqa,
hinaspam mana penqakuspan nirqa:
14“Dioswan allinlla kasqaymanta ofrendata qonaypaqmi prometekurqani,
chaytam kunan cumpleramuni.
15Chayraykum qanwan tupaykuq lloqsimurqani,
uyayki qawaykuytam munarqani,
kayqaya tariykamuyki.
16Camaytam sumaqta allicharamuni,
Egiptomanta kaq lino colchakunawanmi qataramuni,
17miskillataña asnananpaqmi
mirrawan, aloewan, canelawan talliykamuni.
18Hakuchik, paqarinkama kuyanakuypi sinkakamusun,
achikyaqkama kuyanakuypi kusikamusun.
19Qosayqa manam hinapichu,
karutam illarun.
20Wayqapi qollqeta aparikuspam illarun,
payqa poqosqa killatañam kutimunqa”, nispa.
21Chaynata hikutaspanmi chay joventa wichiykachirqa,
sumaqllataña rimasqanwanmi sonqonta suwarurqa.
22Hinaptinmi chay joven,
nakanankupaq toro pusasqa hina,
toqllaman wichiykuq luwichu hina,
chay warmita qatikurqa.
23Sonqonta flecha parterunanta mana yachaspa
trampawan hapirachikuq urpitu hinam wichiykurqa.
24Chaynaqa, churillaykuna uyariwaychik,
rimasqaykunata allinta uyariychik.
25Chayna warmitaqa ama munapayaychu,
chayna warmipa ñanninmanqa ama wichiykuychu,
26payqa achkaqtañam wañunankama wichirachin,
kallpanpi runakunatam payqa wañurachin.
27Wasinpas wañuqkunapa kasqanman apakuq ñanmi,
wañuypa munaychakuyninman apakuqmi.
Currently Selected:
Proverbios 7: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012