Proverbios 6
6
Imatapas yachaywan ruwanamanta
1Churilláy, runamasikita garantizaspaykiqa,
otaq hukpa rantinpi palabraykita qospaykiqa,
2kikikipa rimasqallaykiwanmi
toqllawan hina watarachikunki.
3Chaynaqa, churilláy,
runamasikipa makinman wichiykusqaykimanta librakunaykipaqyá kayta ruway:
Rispayki qayllanpi uchuychakuspa garantizanaykipaq rimasqaykita chinkachimuy.
4Amayá puñuytapas tariychu,
nitaq ñawikitapas wichqaykuychu;
5lazoqninmanta lluptichkaq luwichu hinayá lluptikuy,
trampamanta lluptiruq urpi hinayá ayqekuy.
Qella runapaq yachachikuymanta
6Yaw, qella runa, sisita qaway,
imam ruwasqanta qawaspa yachayta chaskiy.
7Sisiqa mana capitanniyuq kachkaspapas,
mana kamachiqniyuq kachkaspapas,
8rutuy tiempopim mikunanta huñukun,
cosecha tiempopim mikunanta taqekun.
9Yaw, qella runa,
¿ima horakamataq puñunki?
¿Haykapitaq puñusqaykimanta hatarinki?
10Puñunaykikamam,
puñuywan hapichikunaykikamam,
makikita oqllapakuykuspa samanaykikamam,
11 #
Pr 24.33-34. yanqa purikuq qella runa hina wakchayay chayaramusunki,
armayuq suwa hinam yarqaypas hayparamusunki.
Mana allin runamanta
12Mana allin runaqa,
millakuypaqta ruwaq runaqa,
llullakunallata willakachakustinmi purin;
13engañananpaqmi ñawinkunata qemchityachin,
chakinkunawanmi señaschan,
dedonkunawanmi tuksin;
14sonqonpipas mana allinkunallam tarikun,
mana allinllatam tukuy tiempo yuyaymanan,
cheqninakuyllatam hatarichin.
15Chayraykum qonqaymanta sasachakuypi tarikunqa,
qonqaymantam pasaypaqta puchukarunqa.
Imakunatam Tayta Dios millakusqanmanta
16Soqta huchakunatam Tayta Dios cheqnin,
qanchis kaqtañataqmi pasaypaqta millakun:
17Hatun tukuyta, llullakuyta,
mana huchayuq runa wañuchiyta,
18mana allinkunallata tanteaq sonqota,
mana allin ruwayman chaylla kallpaqta,
19llulla rimaq testigota,
wawqentinta peleanachiqta.
Qosan engañaq warmimanta
20Churilláy, taytaykipa kamachisusqaykita kasukuy,
mamaykipa yachachisusqaykita ama qonqaychu.
21Sonqoykipi waqaychay,
collarta hina kunkaykiman wallqakuy.
22Chaykunam puriptikipas pusasunki,
puñuruptikipas waqaychasunki,
rikchariptikipas rimapayasunki.
23Kamachikuykunaqa mechero hinam,
yachachikuykunaqa achkiy hinam;
anyasqa kaywan consejasqa kayñataqmi
kawsayman pusakuq ñan hina.
24Chaykunam mana allin warmimanta waqaychasunki,
qosanta engañaq warmipa miskillaña rimayninmantam harkaykusunki.
25Amayá kuyayllapaq kaynintaqa munapayaychu,
amataq qawasusqaykiwanpas sonqoykita suwarachikuychu.
26Chuchumika warmiqa
tantanraykullam qarita munapayan,
qosanta engañaq warmim ichaqa
qaripa vidanta maskan.
27¿Yaqachu pipas ninata qasqonpi rupachiptin pachan mana kañakurunman?
28¿Yaqachu pipas nina sansa hawanta puriptin chakin mana pusllukurunman?
29Runamasinpa warminwan puñuruq runaqa,
cheqaptapunim castigasqa kanqa.
30Yarqayninta tanichinallanpaq suwakuq runataqa
manam pipas imananchu;
31chaywanpas suwakusqanpi hapirachikuspaqa
qanchis kuti mastam paganqa,
wasinpi lliw kapuqninwanmi paganqa.
32Hukpa warminwan huchallikuq runaqa
mana yachayniyuq runam;
chayta ruwaq runaqa
kikillanmi tuñichikuchkan.
33Chayna runaqa maqachikuspam tukuyta nichikunqa,
penqayman wichisqanqa manam haykapipas chinkanqachu.
34Celoso runaqa lenwachkaq nina hinam,
vengakuyta munaspaqa manam pampachanqachu.
35Imataña qoptinpas manam chaskinqachu,
imataña pagaptinpas manam pampachanqachu.
Currently Selected:
Proverbios 6: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012