Proverbios 30
30
Agurpa yachachikuyninkunamanta
1Kaykunam Masá lawpi yachaq Jaquepa churin Agurpa yachachisqan simikuna. Agurmi Itieltawan Ucalta kaynata yachachirqa:
2Ñoqaqa lliw runamantapas
aswan mana yachayniyuqmi kani,
ñoqaqa mana tanteoyuqmi kani.
3Yachaytapas manam hayparqanichu,
manataqmi Diosmantapas yachanichu.
4¿Pitaq hanaq pachaman qespiruspa uraykamurqa?
¿Pitaq wayrakunata makinwan putqorqa?
¿Pitaq yakukunata latapawan wisirqa?
¿Pitaq kay pachapa linderonkunata churarqa?
¿Yachaptikiqa imataq paypa sutin hinaspa churinpa sutin?
5Diospa Chuya siminkunaqa cheqapmi;
Diosman hapipakuqkunataqa
paymi waqaychan.
6Paypa siminkunamanqa
amayá imatapas yapaychu,
chaynapi llullapaq hapisqa kaspa
mana qaqchachikunaykipaq.
7Diosnilláy, iskayllatam mañakuyki,
manaraq wañukuchkaptiyá qoykullaway:
8Engañotawan llullakuytayá
ñoqamanta sapaqchay,
ama qowaychu apuyayta nitaq wakchayaytapas,
aswanqa mikunaypaq kamaqllata qoykullaway.
9Yanqañataq saksanaykama mikuruspa
qamta qepanchaspay niyman:
¿Pitaq Tayta Diosqa? nispay;
otaq wakchayaspay suwakuyman,
hinaspay sutikita penqayman churayman.
10Huk esclavotaqa amayá
patronninpa qayllanpiqa acusaychu,
yanqañataq ñakasuptiki
castigasqa kawaq.
11Kanmi taytanta ñakaq miraykuna,
kantaqmi mamanta mana bendiceq miraykunapas.
12Kanmi mana huchayuqpaq hapikuruq runakuna,
huchankumantaqa manam chuyanchakunkuchu.
13Kanmi hatun tukuq runakuna,
runamasintapas winkullamanraqmi qawanku.
14Kanmi espada kiruyuq miraykuna,
kanmi cuchillo waqoyuq runakuna,
chaywan kay pachapi wakchakunata mikurunankupaq,
allin sonqoyuqkunata tukurunankupaq.
15 # 30.15 Sanguijuelaqa kuykaman rikchakuq urum. Sanguijuela urupa iskay wawankunaqa
“qoway, qoway” niyllatam yachanku.
Kimsam manaña haykapipas saksariqkuna,
tawa kaqpas manam ninchu “saksaruniñam” nispaqa:
16Chaykunam sepultura,
mana wachakuq warmi,
mana yakuta saksaq allpa,
chaynataq ninapas.
17Taytanta burlakuq runataqa,
mamanta mana kasukuq runataqa,
cuervokunayá ñawinta hurqoruchun,
ankakunayá mikuruchun.
18Kay kimsam mana yachasqay kaqkuna,
tawa kaqtapas manam reqsinichu:
19Alton pawaq ankapa yupinta,
qaqapi maqta urupa yupinta,
lamar qochapi barcopa yupinta
hinaspa warmiwan qaripa kakurusqanta.
20Qosanta engañaq warmiqa kaynatam ruwan:
Mikuruchkaspapas siminta pichakuruspam
“manam ima mana allintapas ruwanichu”, nisparaq.
21Kay kimsawanmi allpa katkatatan,
kay tawa kaqwanñataqmi ñakarin:
22Rey kayman huk esclavo chayaruptin,
mana yachayniyuq runa saksaruptin,
23wischupakusqa warmi huktawan casarakuruptin
patronanpa qosanta esclavan qechuruptin.
24Kantaqmi kay pachapi tawa taksa animalchakuna
paykunaqa llumpay yachaysapam kanku:
25Sisichakuna,
paykunaqa manam kallpayuqchu
ichaqa cosecha tiempopim
mikunankuta huñukunku.
26Vizcachakuna,
paykunaqa mana kallpayuq kaspapas
raqchikunapim wasinkuta ruwakunku.
27Aqaruwaykuna,
mana reyniyuq kaspapas ichaqa
tropa-tropam lloqsinku.
28Arañakuna,
makiwan hapiy atina kachkaspankupas
reypa palacionpiraqmi yachanku.
29Kay kimsañataqmi kuyayllapaqta purinku,
tawa kaqpas qarillañam purin:
30León, payqa llapallan animalkunamanta manchakuypaqmi
manam imatapas manchakunchu.
31Hatun tukuq utulu,
cabrakunapa yayannin chipu,
tropankunapa ñawpaqninta riq reypas.
32Sichum mana yachayniyuq hina hatunchakuspayki
mana allinta ruwanaykipaq tantearuspaykiqa
allinta tanteakuykuy.
33Pipas lecheta qaywispaqa
mantequillatam hurqonqa,
pipas kallpawan senqanta pichakuqqa
yawartam hurqokurunqa,
pipas runamasinwan piñanakuqqa
takanakuypim tukurunqa.
Currently Selected:
Proverbios 30: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012