Proverbios 19
19
1Wakcha kaspapas allin sonqoyuq kaymi aswan allinqa
mana yachayniyuq kaspa yanqamanta tumpakuq kanamantaqa.
2Mana sumaqta tantearispa imapas ruwayqa
manam allinchu,
hawanpi-ukunpi imatapas ruwayqa
pantachikunmi.
3Mana yachayniyuq runaqa mana allin ñanman wichiykuspam
Tayta Diospaqraq piñakunpas.
4Apu runapaqqa achkallañam amigonkunapas,
wakcha runamantam ichaqa amigonkunapas karunchakunku.
5Mana allin testigoqa castigasqapunim kanqa,
llullallata rimaq runaqa manam lluptinqachu.
6Sumaq sonqo runamanqa achkam llunkukunku,
imallanpas qokuykuq runapaqqa lliwmi amigollan.
7Sichum wakcha runata wawqenkuna cheqniptinkuqa,
aswanraqchiki amigonkunaqa qepancharunqaku,
paykunamantaqa yanapakuytapas manam tarinqachu.
8Yachayniyuq runaqa
kikintam kuyakun,
yachayta waqaychaqqa
allin kaqtam tarirun.
9Mana allin testigoqa
castigasqapunim kanqa,
llulla rimaq runaqa
chinkanqapunim.
10Mana yachayniyuq runataqa
alhajakunapa chawpinpi kawsayninqa manam tupanchu,
reypa churinkunapi huk criadopa munaychakuyninpas
manam tupanchu.
11Pacienciakuyqa yachayniyuqpa ruwayninmi,
alabasqa kayqa runamasinpa pantarusqanta mana kaqpaq hapiymi.
12Reypa piñakuyninqa
malta leonpa qapariynin hinam,
kuyapayakuyninñataqmi
pastokunapi sulla hina.
13Mana yachayniyuq warmaqa
taytantam llakichin,
piñanakuyllata kuyaq warmiñataqmi
parapi sutuq wasi hina.
14Wasiwan qori-qollqeqa tayta-mamapa herencia qokuyninmi,
yachayniyuq warmiñataqmi Tayta Diospa qokuynin.
15Qellakuyqa miskillatañam puñuchikun,
qella runaqa yarqaymantam ñakarinqa.
16Kamachikuyta kasukuqqa
vidantam waqaychakun,
Tayta Diospa yachachikuyninta wischupakuqmi ichaqa wañunqa.
17Wakchaman prestaspaqa Tayta Diosmanmi prestachkan,
chay qosqantaqa Tayta Diosmi kutichipunqa.
18Warmaykitaqa manaraq imamanpas chayaruchkaptinyá corregiykuy,
wañuyman chayaruptin ama ñakakunaykipaq.
19Chaylla piñakuruq runaqa castigasqam kanqa,
piñakuyninmanta hawkayachiqqa
aswantam piñachin.
20Consejasusqaykita uyarikuy,
rimapayasusqaykita chaskikuy,
hinaspaqa yachayniyuqmi rikurinki.
21Runapa sonqonpiqa tukuy rikchaq piensaykunam tarikun,
chaywanpas Tayta Diospa munasqallanmi takyanqaqa.
22Runamantaqa suyanchik
hapipakunapaq hina kanantam,
llulla runamantaqa wakcha runam aswan allinqa.
23Tayta Diosta kasukuyqa
kawsaymanmi apakun,
Dioswanqa pipas hawkam kawsakunqa
manam ima sasachakuypas chayanqachu.
24Qella runaqa makintam platoman haywarin,
ichaqa manam imallatapas siminman apaykunchu.
25Burlakuq runata castigaptikiqa
mana yuyayniyuqpas yuyaytam hapinqa,
yachayniyuqta qaqchaptikiqa
aswan yachayniyuqmi rikurinqa.
26Taytanpata suwaspa, mamantañataq qarqoruq warmaqqa
penqakuypaq mana allin warmam.
27Churilláy, corregisqa kayta mana munaspaykiqa
allin yachachikuykunamantapas sapaqchakurunkim.
28Mana allin testigoqa
justiciamantapas asikunmi,
mana allin runapa siminqa
millakuypaq kaqkunallatam riman.
29Burlakuq runapaqqa
castigopas listom kachkan,
mana yachayniyuqpa wasanpaqpas azotem kachkan.
Currently Selected:
Proverbios 19: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012