Proverbios 18
18
1Kikillanpaq munaq runaqa
imatapas kikillanpaqmi maskan,
imataña nisqapas manam kasukunchu.
2Mana yachayniyuq runataqa
manam imapas qokunchu yachaymantaqa,
payqa yachaysapapaqmi hapikun.
3Penqakuyqa mana allin ruwaykunawan kuskam hamun,
penqaypi kayñataqmi hatun tukuywan kuska hamun.
4Runapa rimayninqa uku-uku yaku hinam,
yachayqa pukyumanta kallpaq yaku hinam.
5Manam allinchu mana allin ruwaqman sayapakuspa
mana huchayuqta sentenciaruyqa.
6Mana yachayniyuq runaqa
siminwanmi piñanakuyta hatarichin,
siminraykum maqachikunpas.
7Mana yachayniyuq runaqa
tuñichikunallanpaqmi riman,
rimasqallanwanmi waskata kunkanman churakun.
8Cuento qepi runapa rimasqankunaqa miskillañam,
tukuy ukukamaraqmi yaykukunpas.
9Mana llamkakuq runaqa
tuñichikuq runawanmi wawqella kanku.
10Tayta Diospa sutinqa
mana tuñichiy atina torre hinam,
allin runaqa chayman kallpaspam amparakun.
11Apuqa tukuy ima kapuqnintam
alto perqakunawan cercosqa llaqtata hina qawan.
12Tuñichisqa kayqa hatun tukuypa qepantam hamun,
hatunchasqa kayñataqmi uchuychakuypa qepanta hamun.
13Mana allinta uyarichkaspa contestayqa
penqakuypaq hinaspa mana yachayniyuq kaymi.
14Onqoqtaqa kallpanchakuyninmi hatarichinqa
ichaqa ¿pitaq hukmanyasqa runataqa hatarichinman?
15Yachayniyuqkunawan yuyaymanayniyuqkunaqa
yachay maskasqankutam tarinku.
16Regalowanqa ima punkupas kichakuykunmi,
munayniyuq runakunapa qayllanmanpas chayachikunmi.
17Puntata quejakuq runaqa
mana huchayuqpaqmi rikchakun,
contraparten hamuruspan
llullakusqanta niykunankama.
18Piñanakuytaqa Diosllam tanichin,
piñanakuqkunatapas payllam rakinan.
19Piñachisqa runaqa
cercosqa llaqta hina mana yaykuy atinam,
piñanakuyqa wawqentintapas rejillayuq punku hinam rakinan.
20Runaqa siminpa ruruntam mikunqa,
siminmanta lloqsiqwanmi saksanqa.
21Wañuypas kawsaypas
runapa rimayninpim tarikun,
chayta kuyaqqa ruruntam mikunqa.
22Warma yananta tariruq runaqa
allin kaqtam tarirun,
Tayta Diospa kuyakuynintam hayparun.
23Wakcha runaqa ruegakuspam riman,
apu runam ichaqa manchakuypaqta contestakun.
24Kanmi sasachakuyman pusakuq amigokuna,
kantaqmi wawqenmantapas aswan hapipakunapaq hina amigokunapas.
Currently Selected:
Proverbios 18: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012