Proverbios 17
17
1Fiestakunata ruwaspa
peleollapi kawsaymantaqa,
chaki tantallatapas mikuspa
hawka kawsakuymi aswan allinqa.
2Taytanta penqayman churaq warmapiqa
yachayniyuq criadonmi munaychakunqa,
chay warmapa wawqenkunawan kuskam
herenciatapas chaskinqa.
3Crisolpim qollqetaqa chulluchinku,
hornopim qoritaqa chulluchinku,
Diosñataqmi runapa sonqonta chuyanchan.
4Mana allin ruwaq runaqa mana allin runapa rimasqantam uyarin,
llulla runañataqmi llullamasinpa rimasqanta uyarin.
5Wakcha runamanta burlakuq runaqa
unanchaqninpa contranpim hatarin,
sasachakuypi tarikuqmanta asikuqqa
castigachikunqapunim.
6Yuyaqkunapa coronanqa willkankunam,
wawa-churikunapa hatunchakuyninñataqmi tayta-maman.
7Allin rimaykunapas
mana yachayniyuqpa siminpiqa manam tupanchu,
llullakuypas kamachikuqpa siminpiqa manam tupanchu.
8Sayniyuman amañasqa runapaqqa
sayniyu chaskiypas hampi hinaraqmi,
chayna runaqa mayman risqanpipas
allinraqmi lloqsin.
9Pampachay yachaq runaqa
kuyakuytam maskan,
mana pampachay munaqmi ichaqa
kuyaqninwanpas cheqnirachikun.
10Yachayniyuq runaqa
qaqchaykusqam yuyayta hapin,
mana yachayniyuq runam ichaqa
pachak kutikama azotesqapas mana uyarikuq.
11Mana kasukuq runaqa peleollatam maskan,
ichaqa huk punchawmi
mana llakipayakuq runawan tuparunqa.
12Wawankunata suwarachikuq ukumariwan
tuparuymi aswan allinqa,
tanteasqallanpi hapipakuq
mana yachayniyuq runawan tuparuymantaqa.
13Allin ruwaqninta mana allinwan kutichipuqpa wasinmantaqa,
sasachakuypas manam asurinqachu.
14Qocharayaq yakuta kachaykuq runa hinam
piñanakuyta qallarichiq runaqa,
manaraq imapas kachkaptin chaymantaqa ayqekuy.
15Mana allin runata mana huchayuqpaq hapispa
inocente runatañataq huchayuqpaq hapiqtaqa
Diosmi anchata cheqnin.
16¿Imapaqtaq mana yachayniyuq runata
qollqe servinman yachayta rantinanpaq
mana entiendeq kachkaptinqa?
17Cheqap amigoqa tukuy tiempom kuyakun,
sasachakuy tiempopipas cheqap wawqen hinam.
18Mana yachayniyuq runaqa
runamasinpa rantinpim sayaykun,
hinaspam hukpa debekusqanta qepikurun.
19Maqanakuylla kuyaq runaqa
huchatam kuyan,
badulaki runaqa kikillanmi tuñichikuchkan.
20Mana allin ruwaq runaqa
manam haykapipas allin kaqtaqa tarinqachu;
llulla runaqa tuñinqapunim.
21Mana yachayniyuq warmapa taytan kayqa
llakikuytam apamun,
mana yachayniyuqpa taytanqa
manam kusikuyta tarinchu.
22Kusisqa sonqoqa allin hampim,
llakikuymi ichaqa runata onqochin.
23Mana allin ruwaq runaqa
allin arreglota qewinanpaqmi
pakasqallapi sayniyachikun.
24Yachayniyuq runaqa yachayniyuq kaytam maskan,
mana yachayniyuqmi ichaqa maypi tukuruytapas mana yachanchu.
25Mana yachayniyuq warmaqa
taytantam piñachin
mamantañataqmi rabiachin.
26Mana huchayuq runata sentenciayqa manam allinchu,
allin kawsakuq runata azoteypas manam allinchu.
27Aslla rimayqa yachayniyuq kaymi,
yachayniyuq runaqa controlakuytam yachan.
28Mana yachayniyuq runapas upallakuspanqa
yachayniyuqpaq hapisqam,
siminta wichqakuq runam ichaqa
allin tanteakuq.
Currently Selected:
Proverbios 17: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012