Números 36
36
Warmikunaman qonanku allpamanta
1Joseypa churinmi karqa Manasés, Manasespañataqmi karqa Maquir, Maquirpañataqmi karqa Galaad, Galaadpa mirayninkunamanta kamachikuqkunam Moisesmanwan Israelpa mirayninkunapa kamachiqninkunaman asuykuspanku 2#Nm 27.7.kaynata nirqaku:
Moisés, qamtam Tayta Dios kamachisurqanki Israelpa mirayninkunaman sorteaspa allpata partenaykipaq. Kamachisurqankitaqmi aylluyku Zelofehadpa allpantapas warmi churinkunaman partenaykipaq. 3Sichum chay warmikuna Israelpa wakin ayllukunamanta kaq qarikunawan casarakuruptinkuqa, chay tupaqnin allpam aylluykupa allpanmanta rakisqa kanqa, hinaspam casaraqnin runapa allpanmanña yapakurunqa, hinaptinchá suerteman hina tupawasqanku allpayku menosyarunqa. 4Israelpa mirayninkunapaq jubileo sutiyuq wata chayaramuptinqa chay warmikunapa allpanmi qosankupa allpanmanña wiñaypaq yapakurunqa, chaynapim mana aylluykupa allpanñachu kanqa, nispanku.
5Hinaptinmi Tayta Diospa kamachisqanman hina Israelpa mirayninkunata Moisés nirqa:
José ayllumanta kaq runakunaqa allintam nichkanku. 6Chaynaqa, Zelofehadpa warmi churinkunatam Tayta Dios kaynata nin: “Munasqaykichikman hinayá casarakuychik, ichaqa taytaykichikpa ayllunmanta kaqkunallawanmi casarakunkichik, 7chaynapi Israelpa mirayninkunapa allpan mana huk ayllukunaman pasananpaq; aswanqa sapakamam taytankupa ayllunpa allpanwan dueño kanqaku. 8Sichum Israelpa mirayninmanta kaq warmi tupaqnin allpata chaskiruspanqa, taytanpa ayllumanta kaq qarillawanmi casarakunqa, chaynapim Israelpa mirayninkunaqa sapakama ayllunkuman tupaq allpawan dueño kanqaku. 9Chaynapim chay allpaqa mana huk ayllumanchu pasanqa; Israelpa mirayninmanta kaq ayllukunaqa sapakamam allpankuwan dueño kanqaku”, nispa.
10Chaymi Zelofehadpa warmi churinkunaqa Moisesman Tayta Diospa kamachisqanman hina ruwarqaku. 11Paykunam casarakurqaku taytankupa wawqenpa churinkunawan; chay warmikunam karqa: Maala, Tirsa, Hogla, Milca hinaspa Noa. 12Chaynapim Joseypa churin Manasés ayllumanta kaq warmikunapa allpankuqa hinalla ñawpaq taytankupa allpan ukupi qeparqa.
13Kay kamachikuykunatawan yachachikuykunatam Israelpa mirayninkunaman ninanpaq Moisesman Tayta Dios kamachirqa, kaykunataqa qorqa Moab nacionpa pampankunapim otaq Jordán mayupa hichpan Jericó llaqtapa chimpanpim.
Currently Selected:
Números 36: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012