Números 35
35
Leví aylluman qonanku llaqtakunamanta
1Moab nacionpa pampankunapi otaq Jordán mayupa hichpan Jericó llaqtapa chimpanpi kachkaptinkum Moisesta Tayta Dios nirqa:
2Israelpa mirayninkunata kamachiy, tupaqninku allpa chaskisqankupi Leví aylluman llaqtakunata chaynataq echaderonkunatapas qonankupaq, chay llaqtakunapim paykuna yachanqaku. 3Chaykunapi yachaptinkum echaderonkunapas llapallan animalninkupaq kanqa. 4Llaqtapa muyuriqninpi Leví aylluman qosqaykichik echaderokunaqa tawa pachak pichqa chunka metrom kanqa, chaynaqa llaqtapa murallanmanta hawa lawmanmi kanqa. 5Llaqtapa hawa lawnin intipa qespimunan lawpim isqon pachak metrota tupunkichik, sur lawmanpas isqon pachak metrotataq, hina chaynallatam intipa seqaykunan lawmanpas chaynataq norte lawmanpas tupunkichik. Chaynaqa, chay llaqtapa muyuriqninpi echaderonkunam paykunapaq kanqa.
6Leví aylluman qosqaykichik llaqtakunamantam soqta llaqtakuna amparakuna kanqa. Chay llaqtakunaqa runa wañuchiqpa lluptikuspan amparakunanpaqmi kanqa. Chay soqta llaqtakunatawan kuskatam tawa chunka iskayniyuq llaqtakunatapas qonkichik. 7Leví ayllumanmi tawa chunka pusaqniyuq llaqtakunata sapakama echaderontintakama qonkichik. 8#Jos 21.1-42.Chaskisqaykichik llaqtakunamanta Leví aylluman qoptikichikqa, achkata chaskiqmi achkata qonqa, asllata chaskiqñataqmi asllata qonqa. Sapa ayllu hayka llaqtam chaskisqaykichikman hina Leví aylluman qonkichik, nispa.
Amparakunanku llaqtakunamanta
(Dt 19.1-13. Jos 20.1-9)
9-10Israelpa mirayninkunaman ninanpaqmi Moisesta Tayta Dios nirqa:
Jordán mayuta chimparuspa Canaán allpapiña kaspaykichikmi, 11#Jos 20.1-9.amparakuna llaqtakunata akllankichik, chaynapi pipas qonqaymanta runamasinta wañurachispanqa chayman lluptikunanpaq. 12Chay llaqtakunam kanqa wañuqpa ayllunkuna vengakurunanmanta lluptikunanpaq, chaynapim chay wañurachiq runaqa mana wañunqachu runakuna huñunakuspa wañuchisqanmanta juzganankukama. 13Llaqtakuna qosqaykichikmantam soqta llaqtakuna amparakunapaq kanqa. 14Jordán mayupa kaylawninpim kimsa llaqtakuna kanqa, Canaán allpapipas kimsataqmi kanqa. 15Chay soqta llaqtakunam amparakuna llaqtakuna kanqa Israelpa mirayninkunapaq, huklaw llaqtayuqkunapaq chaynataq samapakuq runakunapaqpas, chaynapi pipas qonqaymanta hukkaqninta wañurachiq runaqa lluptispa chaypi amparakunanpaq.
16Pipas runamasinta fierrowan wañurachispanqa runa wañuchiqñam rikurirun, chaynaqa wañuchisqapunim kanqa.
17Pipas runamasinta rumita hapiykuspa wañurachispanqa, runa wañuchiqñam rikurirun, chaynaqa wañuchisqapunim kanqa.
18Pipas runamasinta kaspiwan wañurachispanqa, runa wañuchiqñam rikurirun, chaynaqa wañuchisqapunim kanqa. 19Chay wañuqpa hichpa ayllunmi runa wañuchiqta maypipas tupasqanpi wañuchinqa.
20Pipas runamasinta cheqnisqanrayku tanqaykuspanqa otaq wateqaspa imatapas hawanman wañunanpaq wischuykuspanqa, 21mana chayñataq cheqnisqanrayku makinwan maqachkaspalla wañurachispaqa, runa wañuchiqñam rikurirun; chaynaqa wañuqpa hichpa ayllunmi maypipas tupasqanpi paytapas wañuchinqa.
22Sichum pipas mana cheqnikuchkaspan pitapas tanqaykuptinqa otaq mana wateqaspa imatapas qonqaymanta hawanman wichiykachiptinqa 23otaq mana enemigon kachkaspan qonqaymanta hawanman rumita wichiykachiptin wañuruptinqa, 24runakunam huñunakuruspanku kay kamachikuykunaman hina allin arreglota ruwanqaku qonqaymanta wañurachiq runapaqwan vengakuy munaqpaq. 25Wañuqpa vidanmanta vengakuy munaqmantam huñunasqa runakuna qonqaymanta wañurachiqta libraspanku amparakuna llaqtaman kutichinqaku, chay runamasin wañurachiq runaqa chay llaqtapim yachanqa aceitewan tallispa sapaqchasqa sumo sacerdotepa wañunan punchawkama.
26Sichum chay runa amparakusqan llaqtamanta lloqsiruptinqa, 27wañuqpa vengakuq ayllunmi wañurachinqa, wañurachispanqa mana huchayuqmi kanqa.
28Chayraykum chay runamasin wañuchiq runaqa amparakusqan llaqtapi sumo sacerdote wañukunankama yachanqa, chaymantañam llaqtanman kutikunqa. 29Kay kamachikuykunam qamkunapaq chaynataq hamuq miraynikichikpaq maypiña yachaptikichikpas kanqa.
Testigokunapaq kamachikuykunamanta
30 #
Dt 17.6; 19.15. Pipas runamasinta wañuchiqqa, rikuqninkunapa nisqanman hinam wañunqa, huk testigopa nisqallanwanmi ichaqa mana pipas wañunqachu.
31Runa wañuchiqta libranapaq qollqetaqa amam chaskinkichikchu, chay runaqa wañunqapunim.
32Amparakuna llaqtamanta lluptiruspa llaqtanman kutikunanpaq qollqeta pagayta munaptinqa amam chaskinkichikchu, sumo sacerdote wañukunankamam amparakuna llaqtapi yachanqa.
33Yachasqaykichik allpataqa runa wañuchiykunawanqa amam millakuypaqtaqa ruwankichikchu, runa wañuchiyqa allpatam millakuypaqta ruwan. Chay allpaqa chuyanchasqa kanqa runa wañuchiqta wañurachiptillankum.
34Yachanaykichikpaq allpataqa amam millakuypaqta ruwankichikchu, chay yachanaykichik allpapiqa ñoqapas yachasaqmi. Ñoqa Tayta Diosqa Israelpa mirayninkuna ukupim yachani, nispa.
Currently Selected:
Números 35: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012