Números 31
31
Madianitakunata wañuchisqankumanta
1Moisestam Tayta Dios nirqa:
2Israelpa mirayninkunata kamachiy madianitakunamanta vengakunankupaq, chaymantañam wañukunki, nispa.
3Chaymi llaqtata Moisés nirqa:
Wakiqnikichik guerrapaq allichakuspa madianitakunapa contranpi riychik, Tayta Diospa sutinpi paykunata vengakamuychik. 4Israelpa mirayninkunamantam sapa ayllu guerrapaq waranqa runakunata kachanqa, nispa.
5Chaymi sapa ayllumanta waranqa runakunata guerraman rinankupaq akllarqaku. Llapallan akllasqa runakunaqa chunka iskayniyuq waranqam karqa. 6Moisesmi sapa ayllumanta waranqa runakunata guerraman kacharqa. Sacerdote Eleazarpa churin Fineespas santuariopa servicionkunata hinaspa tocanapaq trompetakunata aparikuspam rirqa. 7Moisesman Tayta Diospa kamachisqanman hinam madianitakunawan peleaspa llapallan qarikunata wañuchimurqaku. 8Paykunatawan kuskatam Madianpa pichqa reyninkutapas wañuchimurqaku, chay reykunam karqa: Evi, Requem, Zur, Hur hinaspa Reba. Beorpa churin Balaamtapas espadawanmi wañurachirqaku. 9Israelpa mirayninkunam madianita warmikunatawan warmakunata presota aparqaku, animalninkutawan tukuy imankutapas apakurqakum. 10Yachasqanku llaqtakunatawan llapa campamentonkunatapas kañaykurqakum. 11Chaynapim warmikunata, wawakunata, animalkunata hinaspa tukuy ima qechumusqankutapas hapikuykurqaku. 12Hinaspam Moisesman, sacerdote Eleazarman, Israelpa mirayninkunaman aparqaku, Moab law pampakunapi otaq Jordán mayupa hichpan Jericó llaqtapa chimpanpi campamentopi kachkaptinku.
13Chaymi Moiseswan sacerdote Eleazar hinaspa llaqtapa kamachiqninkuna campamentomanta lloqsispa tariparqaku. 14Ichaqa Moisesmi piñakururqa guerramanta kutimuq tropakunapa kamachiqninkunapaqwan waranqa soldadokunapa chaynataq pachak soldadokunapa kamachiqkunapaq. 15Hinaspam paykunata nirqa:
¿Imanasqataq llapa warmikunata mana wañuchimurqankichikchu? 16#Nm 25.1-9.Chay warmikunam Balaampa umachasqan kaspanku Tayta Diospa contranpi Israelpa mirayninkunata hatarichirqaku, chaynapi Baal-peor idolotaña servinankupaq. Chayraykum Tayta Diosqa runankunata peste onqoywan wañuchirqa. 17Chaynaqa, kunanpuni llapallan qari wawakunatawan haykam qari reqsiq warmikunata wañuchiychik. 18Manaraq qari reqsiq sipaskunatam ichaqa ama wañuchinkichikchu aswanqa paykunam qamkunapaq kanqa. 19Qamkunamanta haykam runa wañuchiqkunaqa chaynataq wañusqa runapa ayanta llapcharuqkunaqa, qanchis punchawmi campamentomanta hawapi qepankichik. Hinaspam qamkunapas chaynataq presochamusqaykichik runakunapas kimsa kaq punchawpiwan qanchis kaq punchawpi chuyanchakunkichik. 20Chuyanchankichiktaqmi llapa pachakunatapas, qaramanta ruwasqa tukuy ima kaqkunatapas, cabrapa pelonmanta pachakunatapas hinaspa kullumanta serviciokunatapas, nispa.
21Guerramanta kutimuq soldadokunatam sacerdote Eleazar nirqa:
Moisesman kamachispanmi Tayta Dios kay kamachikuyta yachachirqa: 22“Qoritapas, qollqetapas, broncetapas, fierrotapas, estañotapas, tititapas 23chaynataq imapas ninapa mana rupanan kaqtaqa chuyanchanaykichikpaqmi ninapi chulluchinkichik, hinaspam chuyanchana yakuwan mayllankichik. Ninapa rupanan kaqkunatañataqmi yakullawan mayllankichik. 24Qanchis kaq punchawpim pachaykichikta taqsaspa chuyaña kankichik, chaymantañam campamentoman kutiykunkichik”, nispa.
Qechumusqankuta rakinakusqankumanta
25Moisestam Tayta Dios nirqa:
26Qanwan sacerdote Eleazarmi runakunapa kamachiqninkunapiwan pusamusqanku runakunata chaynataq animalkunatapas yupankichik. 27Iskayman rakiruspam hukninta guerrapi peleamuqkunaman qonkichik, huknintañataqmi wakin runakunaman. 28Guerrapi peleamuspa qechumusqankumantam, runakuna, vacakuna, asnokuna chaynataq ovejakuna kaptinpas ñoqa Tayta Diospaq sapa pichqa pachakmanta hukninta rakipuwanki. 29Chay ofrendakunataqa ñoqa Tayta Diospaqña kananpaqmi sacerdote Eleazarman qonkichik. 30Israelpa mirayninkunaman tupaqninmantam, runamanta, vacamanta, asnomanta, ovejamanta hinaspa ima animalmantapas, sapa pichqa chunkamanta hukta rakispa Leví ayllukunaman qonki, paykunaqa yachanay carpatam nanachikunku, nispa.
31Moiseswan Eleazarmi ruwarqaku imaynam Moisesman Tayta Diospa nisqanman hina. 32Guerraman rispa qechumusqankum karqa: Soqta pachak qanchis chunka pichqayuq waranqa ovejakuna, 33qanchis chunka iskayniyuq waranqa vacakuna, 34soqta chunka hukniyuq waranqa asnokuna. 35Manaraq qari reqsiq sipaskunañataqmi karqa kimsa chunka iskayniyuq waranqa. 36Iskayman rakinaruspa guerrapi peleamuqkunaman hukninta rakiptinkum ovejakunamanta tuparqa kimsa pachak kimsa chunka qanchisniyuq waranqa pichqa pachaknin ovejakuna. 37Tayta Diosman tupaqninñataqmi karqa soqta pachak qanchis chunka pichqayuq ovejakuna. 38Guerraman riqkunapaqmi karqa kimsa chunka waranqa vacakuna. Tayta Diospa tupaqninñataqmi karqa qanchis chunka iskayniyuq. 39Asnokunamantañataqmi kimsa chunka waranqa pichqa pachaknin. Tayta Diospaq tupaqninñataqmi karqa soqta chunka hukniyuq. 40Sipaskunamantam guerraman riqkunapaq karqa chunka soqtayuq waranqa. Paykunamantam Tayta Diospaq kimsa chunka iskayniyuqta rakirqaku. 41Moisesman Tayta Diospa kamachisqanman hinam Tayta Diospaq rakisqanku ofrendata sacerdote Eleazarman qorqaku.
42Chay iskayman rakisqanpa hukninta Israelpa mirayninkunaman Moisespa qosqanmi karqa: 43Kimsa pachak kimsa chunka qanchisniyuq waranqa pichqa pachaknin ovejakuna, 44kimsa chunka soqtayuq waranqa vacakuna, 45kimsa chunka waranqa pichqa pachaknin asnokuna, 46chunka soqtayuq waranqa sipaskuna. 47Israelpa mirayninkunaman rakisqankumantam sapa pichqa chunkamanta hukta Moisés chaskirqa, sipaskunamanta kaptin otaq animalkunamanta kaptinpas. Chay rakisqankunatam Tayta Diospa yachanan carpata nanachikuq Leví ayllukunaman qorqa. Chaynataqa ruwarqa imaynam Tayta Diospa kamachisqanman hina.
48Moisesmanmi rirqaku guerrapi peleamuqkunamanta waranqa soldadokunapa chaynataq pachak soldadokunapa kamachiqkuna. 49Hinaspam nirqaku:
Guerraman pusasqayku tropakunatam yuparuniku ichaqa manam chullallapas faltanchu. 50Chayraykum sapakama tarisqaykuman hina qori alhajakunamanta ofrendata Tayta Diosman apamuniku: Brazaletekunata, pulserakunata, anillokunata, aretekunata, collarkunata. Chaykunatam Tayta Diosman apamuniku huchayku pampachasqa kananpaq, nispanku.
51Chaymi Moiseswan sacerdote Eleazar chay qorimanta alhajakunata chaskirqaku. 52Waranqa soldado kamachiqkunapa hinaspa pachak soldado kamachiqkunapa Tayta Diosman qorimanta llapa alhajakuna qosqankum karqa pachak pusaq chunka tawayuq kilo masnin. 53Guerraman riq soldadokunapa imapas qechumusqankuqa kikinkupaqmi karqa. 54Chaynaqa, waranqa soldado kamachiqkunapa hinaspa pachak soldado kamachiqkunapa qosqanku qoritam Moiseswan sacerdote Eleazar chaskispanku Diosman asuykuna carpaman apaykurqaku, chaynataqa ruwarqaku Israelpa mirayninkunata Tayta Dios mana qonqananpaqmi.
Currently Selected:
Números 31: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
