Números 14
14
Tayta Diospa contranpi hatarisqankumanta
(Dt 1.26-33)
1Hinaptinmi Israelpa mirayninkuna qaparispanku tukuy tuta waqarqaku. 2Llapallankum Moisespa hinaspa Aaronpa contranpi rimaspa kaynata nirqaku:
Amalaya Egipto nacionpi otaq kay chunniqpipas wañuruchwan karqa. 3¿Imapaqtaq Tayta Dios kay allpaman pusamuwarqanchik guerrapi wañunanchikpaq? ¿Warminchikkunatapas chaynataq churinchikkunatapas enemigonchik qechuwananchikpaq? ¡Egipto nacionman kutikuyninchikmi allinqa kanman! nispanku.
4Hinaspam hukninkumanta hukninkuman ninakurqaku:
¡Kamachiwaqninchikta akllasunchik hinaspa Egiptoman kutikusunchik! nispanku.
5Moiseswan Aaronñataqmi Israelpa llapallan mirayninkunapa qayllanpi qonqoranpa pampaman kumuykurqaku. 6Josueywan Calebpas llakimantam pachankuta llikipakurqaku. Paykunaqa allpata qawaq riqkunapa partenmi karqaku. 7Hinaspam Israelpa mirayninkunata nirqaku:
Qawamusqayku allpaqa allin allpam kasqa. 8Tayta Diosmi yanapawaspanchik chayman pusawasunchik, hinaspam tukuy imapa kanan allpata qowasunchik. 9#Heb 3.16.Chaynaqa, ama Tayta Diospa contranpi hatariychikchu, nitaq chay allpapi runakunatapas manchakuychikchu, paykunataqa manam pipas yanapanchu, ñoqanchikwanmi ichaqa Tayta Dios kachkan, tantata mikuchkaq hinallam vencerusunchik, nispanku.
10Llapa runakunañataqmi paykunata rumiwan choqaparuyta munarqaku. Ichaqa Tayta Diospa atiyninmi Diosman asuykuna carpapi Israelpa mirayninkunaman rikuriykurqa. 11Hinaptinmi Moisesta Tayta Dios nirqa:
¿Haykapikamataq kay runakuna piñachiwanqa? ¿Haykapikamataq qayllankupi tukuy señalkunata ruwachkaptiypas mana creewanqakuchu? 12Paykunataqa peste onqoywanmi chinkarachisaq chay allpaman mana yaykunankupaq. Qampa miraynikimantañam paykunamantapas aswan achkata hinaspa atiyniyuq nacionta hatarichisaq, nispa.
13Chaymi Tayta Diosta Moisés nirqa:
Qanmi kay runakunata Egipto nacionmanta atiynikiwan hurqomurqanki. Paykunata imam ruwasqaykita Egipto nacionniyuq runakuna yacharuspankuchá 14kay allpapi yachaqkunaman willaykunqaku. Paykunapas yachankum runaykikunawan kasqaykitaqa chaynataq uya-uyapura paykunawan rimasqaykitapas. Yachankutaqmi paykunapa hawanpi puyuyki sayasqantapas chaynataq punchawpi sayaq puyupi hinaspa tutanñataq sayaq ninapi ñawpaqninkuta risqaykitapas.
15Kay llaqtata wañurachiptikiqa, qanmanta uyariq nacionkunachá contraykipi kaynata ninqaku: 16“Tayta Diosqa prometesqan allpaman mana chayachiyta atispanmi chunniqpi wañurachin”, nispanku.
17Chaynaqa, Diosnilláy, prometesqaykiman hina atiyniyuq kasqaykita reqsichikuy. Qamqa kaynatam nirqanki: 18#Ex 20.5-6; 34.6-7; Dt 5.9-10; 7.9-10.“Ñoqa Tayta Diosqa mana chaylla piñakuqmi hinaspa ancha hatun kuyakuqmi kani. Ñoqaqa mana allin ruwaqtapas, mana kasukuqtapas pampachanim, huchayuq runatam ichaqa castigani tayta-mamakunamanta qallaykuspa willkanpa willkankunakama”, nispayki.
19 #
Ex 32.11-14. Chaynaqa, Diosnilláy, hatun kuyapayakuynikiman hina kay runakunata mana allin ruwasqankumanta pampachaykuy, imaynam Egipto nacionmanta kunankama pampachasqaykita hina, nispa.
Israelpa mirayninkunata Tayta Dios castigasqanmanta
(Dt 1.34-40)
20Moisestam Tayta Dios nirqa:
Niwasqaykiman hinam paykunata pampachani. 21Chaywanpas kikiyrayku chaynataq tukuy kay pachata huntariq atiyniyraykum jurani: 22Egiptopipas, chunniqpipas atiyniytawan señal ruwasqaykunata rikuchkaspanku, achka kutikamaña pruebaman churawaqniykunaqa chaynataq kamachikuyniykunatapas mana kasukuqkunaqa, 23#Heb 3.18.manam mayqanninkupas ñawpaq taytankuman juraspa prometesqay allpataqa rikunqakuchu. Qepanchawaqniy runakunaqa manam mayqanninpas rikunqakuchu.
24 #
Jos 14.9-12. Serviqniy Calebtam ichaqa kallpanchakuspan nisqaykunata kasukusqanrayku, qawamusqan allpaman yaykuchisaq, chay allpam mirayninkunapaq kanqa. 25Amalec runakunawan cananeokunam chay qechwapiqa yachachkanku, chaynaqa kutiychik hinaspa chunniqninta paqarin punchaw kutiychik Puka lamar qocha lawman, nispa.
26Moisestawan Aarontam Tayta Dios nirqa:
27Kay Israelpa mana allin mirayninkunapa contraypi rimasqanta ¿haykapikamataq uyarisaq? Contraypi mana allinkuna rimasqankutam uyariruni.
28Chaynaqa, ñoqa Tayta Dios juraspa nisqayta kaynata nimuy: Imam pasasunaykichikpaq rimasqaykichikta hinam ñoqa qamkunawan ruwasaq.
29 #
Heb 3.17. Llapallan contraypi rimaqkunam iskay chunka watayuqmanta hanayman yupasqakuna wañunqaku, chaymi cuerponkupas chunniqpi wischurayanqa. 30Yachanaykichikpaq juraspay qonay allpamanqa manam mayqannikichikpas yaykunkichikchu. Jefonepa churin Calebwan Nunpa churin Josueyllam yaykunqaku.
31Qamkunam nirqankichik: Churinchikkunataqa enemigonchikkunachá qechuruwasun, nispaykichik. Aswanqa paykunatam wischupakusqaykichik allpaman yaykuchisaq, paykunam chay allpapi yachanqaku. 32Qamkunam ichaqa kay chunniqpi wañunkichik.
33 #
Hch 7.36. Churikichikkunam kay chunniqpi ovejakunata michistin tawa chunka wata muyunqaku. Paykunam qepanchawasqaykichikmanta ñakarinqaku, kay chunniqpi llapallaykichik wañunaykichikkama.
34Tawa chunka punchawmi chay allpata qawamurqankichik, chayna tawa chunka watataqmi ñakarichisqaykichikpas. Huk punchawmantam huk wata castigo kanqa. Chaynapim contraypi hatarisqaykichikqa yanqapaq kasqanta yachankichik.
35Ñoqa Tayta Diosmi nini: Chaynatapunim ruwasaq contraypi huñunakuq mana allin runakunataqa. Kay chunniqpim wañunqaku, kaypitaqmi puchukanqakupas.
Chunka qawamuqkunata Tayta Dios wañurachisqanmanta
36-37Allpata qawamunankupaq Moisespa kachasqan runakuna kutiramuspanku mana allin willakuykunawan chay allpapa contranpi llaqtata rimachiqkunatam, Tayta Diosqa peste onqoywan wañurachirqa. 38Chay allpa qawamuq runakunamantaqa Josueywan Calebllam mana wañurqakuchu.
Israelpa mirayninkuna Hormapi vencechikusqankumanta
(Dt 1.41-46)
39Tayta Diospa nisqanta Israelpa mirayninkunaman Moisés willaykuptinmi anchallataña llakikurqaku. 40Chaymi paqarinnintin tutapayta hatarispanku orqoman rirqaku kaynata nispanku:
Kaypiñam kachkanchik chaynaqa Tayta Diospa prometewasqanchik allpaman hakuchik. Cheqaptapunipas huchallikurunchikmi, nispanku.
41Hinaptinmi Moisés nirqa:
¿Imanasqataq Tayta Diospa nisqanta mana kasukurqankichikchu? Chaynaqa, kay ruwasqaykichikpas manam allinchu kanqa. 42Amaña orqomanqa riychikchu, Tayta Diosqa manañam qamkunawanchu kachkan, yanqañataq enemigoykichik venceramusunkichikman. 43Amalecitakunawan cananeokunam ñawpaqnikichikpi kachkanku peleaspa wañuchisunaykichikpaq. Tayta Diosta manaña qatisqaykichikraykum payqa mana yanapasunkichikñachu, nispa.
44Chaywanpas mana kasukuspankum orqoman rirqaku. Tayta Diospa Arcanwan Moisesmi ichaqa campamentomanta mana lloqsirqakuchu. 45Hinaptinmi orqopi yachaq amalecitakunawan cananeokuna lloqsiramuspanku chay orqoman riq runakunata pasaypaqta venceramurqaku hinaspam Horma lawkama qatiramurqaku.
Currently Selected:
Números 14: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
