Números 13
13
Canaán allpata qawamuqkunamanta
(Dt 1.19-25)
1Moisestam Tayta Dios kaynata nirqa:
2Israelpa mirayninkunaman qonay allpata qawamunankupaq runakunata kamachiy; kamachinkiqa sapa ayllupi kamachikuqtam, nispa.
3Chaymi Parán chunniqmanta Moisés kacharqa, Tayta Diospa nisqanman hina. Kachasqankunaqa llapallankum Israelpa mirayninkunapi kamachikuqkuna karqaku. 4Sutinkum kaykuna: Rubén ayllumanta Zacurpa churin Samúa. 5Simeón ayllumanta Horipa churin Safat. 6Judá ayllumanta Jefonepa churin Caleb. 7Isacar ayllumanta Joseypa churin Igal. 8Efraín ayllumanta Nunpa churin Oseas. 9Benjamín ayllumanta Rafupa churin Palti. 10Zabulón ayllumanta Sodipa churin Gadiel. 11Joseypa churin Manasés ayllumanta Susipa churin Gadi. 12Dan ayllumanta Gemalipa churin Amiel. 13Aser ayllumanta Micaelpa churin Setur. 14Neftalí ayllumanta Vapsipa churin Nahbi. 15Gad ayllumanta Maquipa churin Geuel.
16Paykunatam allpata qawamunankupaq Moisés kacharqa. Nunpa churin Oseastam Josueywan Moisés suticharqa.
17Canaán allpata imaynam kasqanta qawamunankupaq kachaspanmi paykunata Moisés nirqa:
Kaymantam Neguev lawman rinkichik, hinaspañam orqoman qespinkichik. 18Imaynam allpa kasqantam qawamunkichik, chaypi yachaq runakunapas kallpasapachu icha manachu, paykunaqa asllachu icha achkachu kanku, 19imaynataq yachasqanku allpakuna, allinchu icha manachu; yachasqanku llaqtakunaqa campamentokunallachu icha murallasqa llaqtakunachu. 20Chay allpaqa kawsaykunapa qespinanchu icha manachu, sachayuqkunachu icha manachu. Kallpanchakuspam chay allpapa rurunta apamunkichik, nispa.
Chay wateqamusqanku punchawkunaqa uvaspa punta rurunkuna rikurimunan tiempom karqa. 21Rispankum allpata wateqamurqaku, Zin sutiyuq chunniqmanta qallarispa Hamat llaqtaman yaykuna Rehob llaqtakama. 22Neguev lawman rispankum Hebrón llaqtakama chayarurqaku. Chaypim yacharqaku Ahimán, Sesai hinaspa Talmai; paykunaqa karqaku Anacpa mirayninkunam. Hebrón llaqtaqa hatarichisqa karqa Egipto nacionpi Zoán llaqtapa qanchis wata ñawpaqnintaraqmi. 23#13.23 Hebreo simipi Escol ninanqa “racimo” ninanmi.Escol wayqokama chayaruspankum, uvasta kallmantinta chaymanta pallamurqaku, chaymi iskay runakuna kaspipi hombromurqaku; apamurqakutaqmi granadakunatawan higoskunatapas. 24Chay sitiotam Escol wayqowan suticharqaku, chaynataqa suticharqaku Israelpa mirayninkuna chaymanta kallmantin uvasta pallamusqankuraykum.
25Allpa qawamusqankumantam tawa chunka punchawmanta kutimurqaku 26Parán chunniqpi Cades lawkama. Chaypim Moisesman, Aaronman hinaspa Israelpa llapallan mirayninkunaman willaspanku allpapa ruruntapas qawachirqaku. 27Willakuspankum nirqaku:
Kachawasqaykiku allpamanmi chayarurqaniku, cheqaptapunipas chay allpaqa, tukuy imapa kanan allpam kasqa. ¡Kayqaya chay allpapa rurunkuna! 28Ichaqa chay allpapi yachaq runakunam kallpasapakuna kasqaku, llaqtankupas hatun murallayuqkamam kasqa, hatunkaray Anacpa churinkunatapas chaypim rikuramuniku. 29Neguev lawpim amalecitakuna yachasqaku, orqo lawpiñataqmi heteokuna, Jebuseokuna hinaspa amorreokuna; lamar qochapa hichpanpiñataqmi cananeokuna, hina paykunataqmi Jordán mayu lawpipas yachasqaku, nispanku.
30Calebñataqmi, runakunata upallachispan Moisespa qayllanpi nirqa:
Rispanchik chay allpata hapimusunchik, chaypi yachaq runakunataqa vencesunchikmi, nispa.
31Riqmasinkunam ichaqa nirqaku:
Manam chay runakunawan peleaqqa richwanchu, paykunaqa ñoqanchikmantapas aswan kallpasapakunam, nispanku.
32Paykunam allpa qawamusqankupa contranpi rimaspanku Israelpa mirayninkunata nirqaku:
Qawamusqayku allpaqa chaypi yachaq runankunatapas mikusqam, chay llaqtakunapiqa runakunapas hatunkaray runakunam kasqaku. 33#Gn 6.4.Anacpa miraynin hatunkaray runakunatapas rikuramunikum, paykunapa qayllanpiqa aqaruway hinallam karqaniku, chayna sayayllatataqmi paykunapas qawawarqaku, nispanku.
Currently Selected:
Números 13: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
