Nahúm 3
3
1Yaw, runa wañuchiq llaqta,
suwakuypa llullakuypa huntarisqan llaqta,
¡imallapiraq rikukunki!
Suwakuynikiqa mana tukuqmi.
2Latigokunapa toqyayninwan,
ruedakunapa qapariyninwan uyarikuchkan;
caballokunapa kallpayninwan
carretakunapa kallpayllanñam uyarikuchkan.
3Sillada tropakunam kallpachkan,
espadakunawan lanzakunam llipityachkan,
waranqantin-waranqantinmi tuksisqa kuchusqa,
wañuqkunapas manaña yupay atinam,
runakunam kallpasqankupi chaykunawan urmachkanku.
4Chaykunam pasakuchkan,
kuyakuq tukuq chuchumika warmikunapa
llumpa-llumpay qanrakuyninkurayku.
Paykunam sumaqllata engañaspanku,
qanrakuyninkuwan nacionkunata tuñichirqaku,
layqa kayninkuwanñataqmi runakunata wichichirqaku.
5Tukuy Atiyniyuq Tayta Diosmi nin:
Qampa contraykipim kachkani,
pachaykita uyaykikama qempiruspaymi
nacionkunaman hinaspa munaychakuqkunaman
penqaynikita qawachisaq.
6Millakuypaq kaqwan pachachispaymi
penqayman churasqayki.
7Lliw rikusuqnikikunam
qanmanta ayqerikuspa ninqaku:
“Nínive llaqtam purmarun,
¿Pitaq payta llakipayanman?
¿Maypitaq consuelaqnin tarikunman?” nispanku.
8¿Nilo mayupa patanpi Tebas llaqtamanta aswan atiyniyuqchu qam kanki?
Chay llaqtaqa yakupa chawpinpim tarikurqa,
muyuriqninpi yakum harkarqa,
Nilo mayuwan lamar qocham
chay llaqtapa waqaychaqnin perqa hina karqa.
9Etiopía nacionwan Egipto nacionmi karqa
Tebaspa mana tukuq kallpankuna,
Fut nacionwan Libia nacionñataqmi
hukllawakuspa yanapaqninkuna karqa.
10Chaywanpas Tebastaqa presotam aparqaku,
warmankunapas callekunapa esquinankunapi waqtasqam wañurqaku.
Ancha reqsisqa runankunatapas
suerteta choqaspam rakinakurqaku,
kamachiqninkunapas cadenasqam karqaku.
11Nínive llaqta,
manchakuymantam sinka hina katkatatanki,
pantaypi tarikuspam enemigoykimanta pakakunki.
12Palacioykikunapas poqosqa higosta taspiykuptinku
mikuqpa simillanmanña wichirimuq hinam wichirimunqa.
13Tropaykikunapas qampaqqa warmikuna hinam.
Llaqtaykipa punkunkunapas
enemigoykikunapaqmi chaylla kichakuykunqa,
punkuykipa candadonkunatapas ninam rupanqa.
14Chaynaqa, yakutayá alistakuy
enemigoykikuna inturusuptiki tomanaykipaq,
harkasuqniki perqakunatayá raktachay,
mituta saruspayá ladrillota ruway.
15Chaypim qamtaqa nina rupasunki,
chaypitaqmi espadapas wañuchisunki,
aqaruwayta hinam pasaypaqta chinkachisunki.
Aqaruway hinayá miray,
chilliku hinayá miray.
16Negociantekikunatapas
cielokunapi chaskakunata hinañam mirachirqanki.
Aqaruwayqa qaranta mudaruspanmi pawakun.
17Kamachiqnikikunapas aqaruwaykuna hinañam,
capitannikikunapas chillikukuna hinañam,
aqaruwaykunaqa chiri punchawkunapim perqakunaman tiyarunku,
ichaqa rupaykamuptinmi chinkarunku,
maymanmi risqankutaqa manam pipas yachanchu.
18Asiria nacionpa reynin,
michiqnikikunam miskita puñurunku,
tropaykipa capitanninkunam puñurunku,
tropaykikuna montepi cheqeruptinmi
mana pipas huñuqnin kanchu.
19Nanaynikipaqpas manam hampi kanchu,
heridaykiqa mana hampiy atinam.
Tuñisqaykimanta uyariqkunam taqllakuspa kusikunku.
¿Pitataq mana ñakarichiqchu kanki mana allin ruwaynikikunawan? nispa.
Currently Selected:
Nahúm 3: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012