Nahúm 2
2
1Nínive llaqta, chinkachisuqnikim hamuchkan.
Harkasuqniki perqakunapiyá vigilaqkunata churay,
yaykumunan ñantayá wateqay,
espadatayá weqawnikiman watakuy,
tropaykikunatayá peleanaykipaq huñuy.
2Tayta Diosmi Jacobpa hatun kayninta huktawan hatarichinqa,
Israelpa hatun kaynintam Tayta Dios kutichipunqa,
suwakuna tukuy imanta suwaruspa
mana kallmayuq uvasta hinaña saqeruchkaptinkupas.
3Tropankunapa escudonpas pukam,
tropankunapas puka pachawan pachasqam,
carretankunapas rawraq nina hinam,
guerrapaq allichakuruptinkuqa
sachakunapas katkatatanraqmi.
4Carretakunam plazakunaman kallpanku,
qapariywanmi callenta kallpanku,
lenwachkaq nina hinaraqmi rikchayninkupas,
llipya hinaraqmi kallpachkankupas.
5Capitanninkunatam rey qayachkan,
paykunañataqmi sarunakustin kallpachkanku llaqtata harkaq perqapa kasqanman defiendekunankupaq.
6Mayukunapa punkunkunam kichakuykun,
palacioñataqmi tuñiykamun.
7Reinatam presota apachkanku,
criadankunam waqaspa qatichkanku,
qasqonkuta takakuspam
palomakuna hinaraq waqachkanku.
8Nínive llaqtaqa, yakunta mana takyachiq
raqrasqa qocha hinam.
¡Ama ayqeychikchu! ¡Kutimuychik!
nispa qayachkaptinkupas,
manam pipas kutimunchu.
9¡Qori-qollqeta suwakuychik!
Nínive llaqtapa tukuy ima kapuqninqa mana tukuymi.
10Nínive llaqtaqa purmachisqa chunniq mana imayuqmi qeparun.
Sonqonkupas manchakuymantam hukmanyarun,
moqonkupas pasaypaqtam katkatatarun,
lliwmi mana kallpayuqña qeparunku,
uyankupas pasaypaqtam ayayarun.
11¿Imataq pasarun leonpa machayninta
hinaspa uña leonkunapa uchkunta?
Chaypiqa leonpas wawankunawan kuskam
mana pipa manchachisqan hawka yachakuqku.
12Leonqa mikunanpaq hapiruspanmi
chinanmanwan uñankunaman rakinaq.
Machaynintapas suwakamusqanwanmi
anchallataña huntachiq.
Nínive llaqta chinkachisqa kananmanta
13Tukuy Atiyniyuq Tayta Diosmi kaynata nin:
Nínive llaqta, contraykipim kachkani,
guerrapaq carretaykikunatam kañaykuspa qosnita hina chinkarachisaq;
uña leonnikikunatam espadawan wañuchisaq,
suwakuytapas chawpikimantam chinkachisaq,
willasuqnikikunapa rimasqanpas manañam uyarikunqañachu.
Currently Selected:
Nahúm 2: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012