Levítico 9
9
Sacerdote kayninta Aarón qallarisqanmanta
1Pusaq kaq punchawpim Aarontawan churinkunata chaynataq Israel casta ancianokunatapas Moisés qayarqa. 2Hinaspam Aaronta nirqa:
Hucha pampachana ofrendapaqmi huk sano malta torota pusamunki, pusamunkitaqmi lliw kañana sacrificiopaq sano carnerotapas, Tayta Diosman ofrecenaykipaq. 3Israelpa mirayninkunata niy hucha pampachanapaq kaq chivatota pusamunankupaq, pusamuchunkutaq malta torotawan malta carnerotapas. Chaykunaqa lliw kañanapaq huk watayuq sano animalkunam kanqa. 4Pusachimuytaq huk torotawan huk carnerotapas. Chaykunataqa Dioswan allinlla kasqankumanta ofrendapaqmi Tayta Diospa qayllanpi wañuchinqaku. Apamunqakutaqmi kawsaykunamanta aceitewan chapusqa ofrendatapas. Tayta Diosmi kunan qamkunaman rikurisunkichik, nispa.
5Chaymi paykuna Moisespa kamachisqanman hina aparqaku Tayta Diosman asuykuna carpapa punkunman; hinaspam Israelpa mirayninkuna chaypi huñunakuruspanku Tayta Diospa qayllanpi sayarqaku. 6Hinaptinmi Moisés nirqa:
Chayta ruwanaykichikpaqmi Tayta Dios kamachikun, chayta ruwaptikichikmi paypa atiynin rikuriykusunkichik, nispa.
7Chaymantam Aaronta Moisés nirqa:
Altarman asuykuspa hucharayku ofrendaykita chaynataq lliw kañanapaq animaltapas ofrecey, chaynapi huchaykipas chaynataq runakunapa huchanpas pampachasqa kananpaq. Runakunapa ofrendantapas ofreceytaq huchanku pampachasqa kananpaq, ofrecenkiqa Tayta Diospa kamachisqanman hinam, nispa.
8Chaymi altarman Aarón asuykurqa, hinaspam malta torota wañuchispan huchan pampachasqa kananpaq ofrecerqa. 9Aaronpa churinkunañataqmi yawarta apamurqaku, chaymi Aarón yawarman dedonta challpuykuspan altarpa waqrachankunaman llusirqa, puchuq yawartañataqmi altarpa sikinman talliykurqa. 10Chaymantam hucha pampachanapaq animalpa wirankunatawan rurunninkunata chaynataq kichpanninpi wiratapas altarpi kañarqa, chaynataqa ruwarqa imaynam Moisesman Tayta Diospa kamachisqanman hinam. 11Aychantawan qarantañataqmi campamentomanta hawaman hurqospa kañarurqa.
12Aaronqa wañuchirqataqmi lliw kañanapaq animaltapas, hinaptinmi yawarta churinkuna apamurqaku, chaymi altarpa waqtankunaman Aarón challarqa. 13Chaymantañataqmi Aaronman chay lliw kañana animalta apamurqaku, chaytaqa apamurqaku umantawan kuskatam taksa-taksatakama kuchusqata, hinaptinmi altarpi kañarqa. 14Chaymantam chunchulninkunatawan piernankunata mayllarqa, hinaspam altarpi lliwta kañarurqa.
15Aaronqa llaqtapa ofrendantapas ofrecerqataqmi huchanku pampachasqa kananpaq; chivatota hapiykuspanmi wañurachirqa hinaspam ofrecerqa imaynam kikinpaq ofrecesqan ofrendata hina. 16Lliw kañanapaq animaltapas Diospa kamachisqanman hinam ofrecerqa. 17Ofrecerqataqmi kawsaykunamanta ofrendatapas. Chay ofrendamantam huk aptayta hapiykuspa altarpi kañarqa, tutapayta lliw kañanapaq animaltawan kuskata.
18 #
Lv 3.1-11. Aaronqa torotawan carnerotapas wañuchirqataqmi, chaykunaqa Dioswan allinlla kasqankumanta llaqtapa ofrendanmi karqa. Churinkuna yawarta apamuptinkum altarman chaynataq altarpa muyuriqninmanpas challarqa. 19Apamurqakutaqmi toropa hinaspa carneropa wirankunata, chupanta, chunchulninpi wirankunata, rurunninta chaynataq kichpanninpi wirankunatapas. 20Aaronñataqmi animalpa qasqonkunapa hawanman chay wirakunata churaspan altarpi kañarurqa. 21Qasqonkunatawan alleq piernankunatañataqmi kuyuchisqa ofrendata hina Tayta Diosman ofrecerqa. Chaykunataqa ruwarqa imaynam Moisesman Tayta Diospa kamachisqanman hina.
22 #
Nm 6.22-26. Aaronmi runakuna lawman makinta hoqarispan paykunapaq Tayta Diospa bendicionninta mañakurqa, hinaspam hucha pampachanapaq animalta, lliw kañana animalta hinaspa Dioswan allinlla kasqankumanta animalta ofreceruspan altarmanta uraykamurqa. 23Chaymantam Moiseswan Aarón, Diosman asuykuna carpaman yaykurqaku, lloqsiramuspankuñataqmi runakunapaq Diospa bendicionninta mañakurqaku, chaymi Tayta Diospa achkiriynin llapallan runakunaman rikuriykurqa. 24Hinaptinmi Tayta Diospa qayllanmanta lenwachkaq nina lloqsiramurqa, hinaspam lliw kañana animaltawan altarpi wirakunata ruparurqa.
Chayta llapallan runakuna qawaykuspankum kusikuymanta qaparispa pampaman pakchakuykurqaku.
Currently Selected:
Levítico 9: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
