Levítico 10
10
Nadabpa hinaspa Abiupa huchankumanta
1Aaronpa churin Nadabwan Abiuñataqmi sapakama incienso qontichinankuta hapiykuspanku chayman ninatawan inciensota hinaykurqaku, hinaspam Tayta Diospa qayllanpi, mana paypa kamachisqanman hinachu qontichirqaku. 2Chaymi Tayta Diospa qayllanmanta lenwachkaq nina lloqsiramuspan paykunata ruparurqa, chaynapim Tayta Diospa qayllanpi wañururqaku. 3Hinaptinmi Tayta Diospa imam nisqanta Aaronman Moisés kaynata nirqa:
Pipas asuykamuwaqniymanqa
chuya kasqaytam qawachisaq,
llapallan runakunapa qayllanpitaqmi
yupaychasqa kasaq, nispa.
Chaymi Aarón upallalla karqa.
4Chaymantam Uzielpa churin Misaeltawan Elzafanta Moisés qayaykurqa; paykunaqa Aaronpa tion Uzielpa churinkunam karqaku. Paykunatam nirqa:
Asuykuspa santuariopa ñawpaqninmanta castaykichikta hurqomuychik hinaspa campamentomanta hawaman apaychik, nispa.
5Chaymi asuykuspanku tunicankumanta hurqoramurqaku, hinaspam Moisespa kamachisqanman hina campamentomanta hawaman aparurqaku.
Sacerdotekunapa imam ruwanankumanta
6Aarontawan churin Eleazartawan Itamartam Moisés kaynata nirqa:
Amam mana ñaqchasqaqa kankichikchu, amataqmi lutokusqaykichikta qawachikunaykichikpaqpas pachaykichiktaqa llikipankichikchu, chaynata ruwaspaqa wañuruwaqchikmi; Tayta Diospa piñakuyninmi llapa huñunasqa runakunamanpas chayarunman. Aylluykichikmantaqa llapallan Israel castakunam waqanqaku, chaynatam Tayta Diospa kañarusqanmanta llakikunqaku. 7Amataqmi Diosman asuykuna carpapa punkunmantaqa lloqsinkichikchu, mana chayqa wañuruwaqchikmi. Qamkunaqa Tayta Diospa aceitenwan sapaqchasqam kachkankichik, nispa.
Chaymi paykuna Moisespa nisqanman hina ruwarqaku.
8Chaymantam Aaronta Tayta Dios nirqa:
9Ñoqaman asuykuna carpaman yaykuspaqa qampas otaq churikikunapas amam vinota nitaq poqosqa aqatapas upyankichikchu, yanqañataqmi wañuruwaqchik. Kay nisqayqa wiña-wiñaypaq kamachikuymi llapallan miraynikichikpaq kanqa. 10Upyaruspaqa manam yachawaqchikchu mayqanmi ñoqapaq sapaqchasqa kasqantapas otaq mana sapaqchasqa kasqantapas, manataqmi yachawaqchikchu mayqanmi mana chaskinay kasqantapas otaq imam chaskinay kasqantapas; 11nitaqmi yachawaqchikchu Israelpa mirayninkunaman Moiseswan ñoqa Tayta Diospa willachisqay llapallan kamachikuykunatapas, nispa.
12Aarontawan iskaynin puchuq churin Eleazartawan Itamartam Moisés kaynata nirqa:
Tayta Diospaq kañasqa kawsay ofrendapa puchunta mana levadurayuqta altarpa waqtanpi mikuychik. Chay ofrendaqa Tayta Diosllapaqña sapaqchasqa ofrendam. 13#Lv 6.14-18.Chaytaqa mikunkichik chaypaq sapaqchasqa sitiopim. Chayqa qampaqwan churikikunapaqmi kanqa hinaspa Tayta Diospaq kañasqa ofrendam. Chaynatam Tayta Dios kamachiwarqa. 14Tayta Diosman kuyuchispa ofrecesqa animalpa qasqontawan qamkunapaq sapaqchasqa piernataqa mikunkichik chaypaq sapaqchasqa sitiopim, qari churikikunawan hinaspa warmi churikikunawan kuska, chaykunaqa qanmanwan churikikunaman qosqam. Chaykunataqa Tayta Diosmi qosunkichik Israelpa mirayninkuna allinlla kasqanku ofrenda qosqankumanta. 15#Lv 7.30-34.Kañanapaq wira ofrendakunatawan kuskatam qamkunapaq sapaqchasqa piernanta apamunqaku chaynataq kuyuchispa Diosman ofrecenanku qasqontapas. Chaykunaqa wiñaypaqmi qampaqwan churikichikkunapaq kanqa, Tayta Diospa kamachisqanman hina, nispa.
16Chaymantam Moisés tapurqa hucharayku wañuchisqa chivatomanta, chaymi kañasqaña kasqanta yacharuspan Aaronpa churin Eleazarpa chaynataq Itamarpa contranpi piñakuruspan nirqa:
17 #
Lv 6.24-26. ¿Imanasqataq chay hucharayku ofrenda chivatotaqa mana mikurqankichikchu? chaytaqa mikuwaqchik karqa chaypaq sapaqchasqa sitiopim. Chayqa Tayta Diospaq sapaqchasqa ofrendam. Tayta Diosmi chay ofrendata qamkunaman qosurqankichik runakunapa huchankuna paypa qayllanpi pampachasqa kananpaq. 18Yawarnintapas chuya lugarman mana apaykuchkaspaqa, chay ofrendataqa mikuwaqchik karqa chaypaq sapaqchasqa sitiopim kamachisqayman hina, nispa.
19Hinaptinmi Aarón nirqa:
Kunanmi paykuna ofrecerunku Tayta Diosman hucha pampachanapaq kaq ofrendatawan lliw kañana ofrendata. Ñoqataqa kaynakunaqa ñam pasawanña, chaynaqa, sichum ñoqa mikuruyman karqa chay hucha pampachanapaq kaq ofrendata hinaptinqa Tayta Dios ¿chaskiwanmanraqchu karqa? nispa.
20Chayta uyariruptinmi Moisespa sonqon chayraq tiyaykurqa.
Currently Selected:
Levítico 10: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
