Levítico 20
20
Mana kasukuqkuna castiganamanta
1-2Israelpa mirayninkunata ninanpaqmi Moisesman Tayta Dios kaynata nirqa:
Sichum Israel runakunamanta otaq paykunawan yachaq huklaw llaqtayuqkunamanta churinta Moloc idoloman ofrecespanqa wañuchisqam kanqa. Chayna runataqa llapa runakunam rumiwan chamqaparunqa. 3Ñoqapas chay runapa contranpi sayarispaymi llaqtanmanta chinkarachisaq, Moloc idoloman churinta ofrecespan santuarioytapas chaynataq chuya sutiytapas penqayman churasqanrayku. 4Sichum chay nacionpi runakuna mana kaqpaqpas hapispanku, churinta chay runa Molocman ofrecechkaptin mana wañuchiptinkuqa, 5kikiypunim chay runapa contranpi chaynataq ayllunpa contranpipas sayarirusaq, hinaspam runamasinkunamanta chinkarachisaq, chinkarachisaqtaqmi paywan kuska chuchumika warmi hina Molocta yupaychaspa huchallikuqkunatapas. 6Sichum pipas almakunata qayaqkunaman otaq qatipaqkunaman rispaqa, chuchumikapa ruwaynintam ruwan, hinaptinqa chay runapa contranpi sayariruspaymi llaqtanmanta chinkarachisaq.
7Chuyanchakuspayá ñoqallapaqña sapaqchakuychik, ñoqa Tayta Diosmi Diosnikichik kani. 8Kasukuspayá kamachikuyniykunata ruwayman churaychik, ñoqa Tayta Diosmi qamkunata ñoqapaq sapaqcharqaykichik.
9 #
Ex 21.17; Mt 15.4; Mr 7.10. Pipas tayta-maman ñakaqqa wañuchisqam kanqa. Tayta-maman ñakasqanmanta wañuspanqa kikinmi huchayuq kanqa.
10 #
Ex 20.14; Lv 18.20; Dt 5.18. Sichum pi qaripas runamasinpa warminwan waqllikuruptinqa iskayninkum wañuchisqa kanqaku.
11 #
Lv 18.8; Dt 22.30; 27.20. Pipas taytanpa warminwan kakuqqa taytantam penqayman churachkan, chaynaqa iskayninkum wañuchisqa kanqaku, wañuspankuqa kikinkum huchayuq kanqaku.
12 #
Lv 18.15. Pipas llumchuyllanwan kakuqqa iskayninkum wañuchisqa kanqaku chay millakuypaq kaqta ruwasqankumanta, wañuspankuqa kikinkum huchayuq kanqaku.
13 #
Lv 18.22. Sichum pipas qarimasillanwan warmiwan hina puñukuqqa iskayninkum wañuchisqa kanqaku, millarikuypaq kaqta ruwasqankumanta wañuspankuqa kikinkum huchayuq kanqaku.
14 #
Lv 18.17; Dt 27.23. Sichum pipas huk warmita casaranqa mamantinta hinaspaqa millarikuypaqtam ruwachkan, chayna ruwaqtaqa kawsachkaqllatam kimsankuta kañanqaku, chaynapi chay millakuypaq ruway qamkuna ukupi mana kananpaq.
15Pi qaripas warmiwan hina animalwan qachakuqqa wañuchisqam kanqa, animaltapas wañuchinkichikmi.
16 #
Ex 22.19; Lv 18.23; Dt 27.21. Pi warmipas qariwan hina animalwan qachakuqqa wañuchisqam kanqa, animaltapas wañuchinkichikmi; wañuspankuqa kikinkum huchayuq kanqaku.
17 #
Lv 18.9; Dt 27.22. Pipas taytanmanta otaq mamanmanta panillanwan kakuptinqa, chay millarikuypaq kaqta ruwasqankuraykum llaqtamasinkunapa qawasqanta wañuchinqaku, wañuspankuqa kikillankum huchayuq kanqaku.
18 #
Lv 18.19. Killanwan onqochkaq warmiwan kakuruq runaqa warmipa yawarpakuynintam rikurun, chaynataqmi warmipas yawarpakuywan kasqanta rikurachikun, hinaptinqa iskayninkum llaqtanmanta chinkachisqa kanqaku.
19Mamaykipa ñañanwanqa otaq taytaykipa paninwanqa amam kakunkichu, chayta ruwaqqa ayllullanwan kakusqanraykum iskayninku ñakasqa kanqaku.
20 #
Lv 18.12-14. Pipas tionpa warminwan kakuqqa tiotam penqayman churachkan, chaynaqa iskayninkum castigasqa kaspa mana wawa-churiyuq wañunqaku.
21 #
Lv 18.16. Wawqenpa warmillanwan kakuq runaqa wawqentam penqayman churachkan millarikuypaq kaqta ruwaspan, chaynaqa iskayninkum mana wawa-churiyuq kanqaku.
22Kamachikuyniykunatawan decretoykunata kasukuspa ruwayman churaychik, yanqañataq yachanaykichikpaq pusasqay allpa atqochkaq hina wischuramusunkichikman. 23Qayllaykichikmanta qarqonay runakunapa millarikuypaq ruwayninkunataqa amam ruwankichikchu, paykunataqa tukuy chaykuna ruwasqankumantam millakuruniña. 24Chayraykum nikichik: Qamkunam paykunapa allpanpi munaychakunkichik, kikiypunim qosqaykichik tukuy imakunapapas kasqan allpata.
Ñoqam wakin nacionkunamanta rakiqnikichik Tayta Dios kani, nispa. 25Qamkunaqa reqsiychikyá mikunapaq kaq otaq mana mikunapaq kaq animalkunatapas, mikunapaq kaq otaq mana mikunapaq kaq alton pawaq animalkunatapas. Amam chay animalkunawanqa qachachakunkichu, nitaq raprayuq animalkunawanpas, nitaq qasqonpa puriq animalkunawanpas. Chaykunataqa millakuypaq kasqanraykum sapaqchani. 26Qamkunaqa chuyayá kaychik ñoqa Tayta Diospas chuya kasqayrayku, ñoqam wakin nacionkunamanta sapaqcharqaykichik ñoqallapaqña kanaykichikpaq.
27Qaripas warmipas wañuqkunapa almanta qayaq kaptinqa otaq qatipaq kaptinqa rumiwan chamqapaspam wañuchinqaku, wañuspankuqa kikinkum huchayuq kanqaku, nispa.
Currently Selected:
Levítico 20: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
