Isaías 65
65
Mana kasukuqkuna ñakarinankumanta
1 #
Ro 10.20. Tayta Diosmi kaynata nin:
Mana mañakuqniykunam maskawarqaku,
mana maskaqniykunam tariwarqaku.
Mana qayakuqniy nacionkunatam nirqani:
“Kaypim kachkani”, nispay.
2 #
Ro 10.21. Mana kasukuspa llutanpi kawsaq llaqtamanmi,
sonqonpa munasqallanpi puriq llaqtamanmi,
makiykunata sapa punchaw haywarirqani.
3Kay llaqtaqa chaylla-chaylla piñachiwananpaqmi
animalkunata idolonkuman huertakunapi ofrecenku,
ladrillo altarkunapim inciensota kañanku.
4Paykunaqa sepulturakunapim tiyanku,
pakasqa machaykunapim achikyanku,
kuchi aychatam mikunku,
mankankupipas millakuypaq caldokunatam yanunku.
5Paykunam ninku: “Chayllapi sayay,
ama asuykamuwaykuchu;
ñoqaykuqa llumpay chuyam kaniku”, nispanku.
Chay runakunaqa senqayta qonchiq qosni hinam,
tukuylla punchaw rataq nina hinam.
6Tukuy kaykunaqa qayllaypim qellqasqa kachkan,
manam qasillallachu kasaq,
ruwasqankuman hinam paykunamanqa kutichipusaq.
7Mana allinkuna ruwasqaykichikmantam,
ñawpaq taytaykichikkunapas
orqokunapi inciensota kañaspa piñachiwasqankumantam,
pagapusqaykichik, nispa.
Musoq Jerusalenmanta
8Tayta Diosmi kaynata nin:
Runam yakusapa uvasta tarispa nin:
“Ama kaytaqa usuchisunchu,
kachkanraqmi yakun”, nispa.
Chaynatam ñoqapas serviqniykunata kuyasqayrayku ruwasaq,
paykunataqa manam pasaypaqtachu chinkachisaq.
9Jacobpa churinkunatam mirachisaq,
Judapa mirayninkunam orqoykunata hapikuykuspanku chaypi yachanqaku,
akllakusqaykunam chay allpata chaskinqaku,
serviqniykunam chaypi yachanqaku.
10 #
Jos 7.24-26. Sarón pampapas ovejakunapa huntasqanñam kanqa,
Acor qechwapas uywakunapa mikunanñam kanqa,
maskaqniy runakunapaqmi chayna kanqa.
11Qamkunatam ichaqa,
ñoqamanta karunchakurusqaykichikrayku,
sapaqchasqay orqoyta qonqarusqaykichikrayku,
“suerte qokuq”, nispa Gad idoloman,
“allin destino qokuq”, nispa Meni sutiyuq idoloman,
mikuytawan vinota qosqaykichikrayku,
12guerrapi wañunaykichikpaq citaykichik,
qonqoraykachispam kunkaykichikta kuchusunkichik.
Qamkunaqa qayaptiypas manam uyariwarqankichikchu,
rimapayaptiypas manam kasuwarqankichikchu;
aswanqa qawachkaptiymi mana allinkunata ruwarqankichik,
mana munasqay kaqkunatam akllarqankichik, nispa.
13Chayraykum ñoqa Tayta Dios kaynata nini:
Serviqniykunaqa mikusqam kanqaku,
qamkunañataqmi yarqaymanta kankichik;
serviqniykunam yakuta tomanqaku,
qamkunañataqmi yakumanta ñakarinkichik;
serviqniykunaqa kusisqam kanqaku,
qamkunañataqmi penqaypi tarikurunkichik.
14Serviqniykunaqa sonqonkupi kusisqam takinqaku,
qamkunam ichaqa llaki sonqoyuq qaparkachankichik,
ñakarispam llakipi tarikuspa waqankichik.
15Akllakusqaykunaqa sutikichiktapas yuyarinqaku
runakunata ñakanallankupaqñam:
“Paykunata hinayá Tayta Dios wañuchisunki”, ninankupaq.
Serviqniykunatam ichaqa musoq sutiwan sutichasaq.
16Pipas kay nacionpi bendicionta mañakuspanqa
cheqap Diosmantam mañakunqa,
pipas kay allpapi juraspaqa
hapipakunapaq Diosraykum juranqa.
Ñawpaq ñakariykunaqa qonqasqañam kanqa,
qayllaymanta chinkachisqañam kanqa.
17 #
Is 66.22; 2 Pe 3.13; Ap 21.1. Hanaq pachatawan kay pachatam musoqmanta unanchasaq,
ñawpaq kaqkunaqa qonqasqañam kanqa,
manañam pipas yuyarinqañachu.
18Aswanqa unanchasqaykunawanmi
wiñaypaq kusikunkichik,
Jerusalenmanwan runankunaman kusikuyta apamusqayraykum
wiñaypaq kusikunkichik.
19 #
Ap 21.4. Ñoqapas Jerusalenraykum anchata kusikusaq,
chaypiqa waqaypas manañam uyarikunqañachu,
llakimantapas manañam qaparinqakuñachu.
20Chayllaraq naceq wawakunapas
chaypiqa manañam wañunqakuchu,
yuyaqkunapas unaytam kawsakunqaku;
pachak watayuq kachkaspa wañukuyqa
warmallanpiraq wañukuy hinam kanqa;
pachak watanman manaraq chayachkaspa wañukuyñataqmi
ñakasqapaq hapisqa kanqa.
21Wasikunatam hatarichinqaku
hinaspam chaypi yachanqaku,
uvaskunatam plantanqaku
hinaspam rurunta mikunqaku.
22Wasikunata hatarichisqankupiqa
manañam sapaq runakunaqa yachanqakuñachu,
Uvas plantasqankutapas
manañam sapaq runakunaqa mikunqakuñachu.
Runaykunaqa sachakuna hinam
una-unay watakunata kawsanqaku.
Akllakusqaykunaqa llamkasqankupa ruruntam mikunqaku.
23Llamkasqankupas manam yanqapaqchu kanqa,
churinkupas manam chayllaqa wañunqakuchu,
paykunapas chaynataq mirayninkupas,
Tayta Diospa bendecisqan miraykunam kanqaku.
24Manaraqpas mañakamuwachkaptinkum
paykunataqa contestasaq,
manaraqpas rimayta tukuchkaptinkum
paykunataqa uyarisaq.
25 #
Is 11.6-9. Atoqwan malta ovejapas kuskankum mikunqaku,
leonpas toro hinam pajataña mikunqa,
maqta urupas allpatañam mikunqa.
Chuyanchasqay orqopiqa
manañam ima mana allin ruwanakuypas kanqañachu, nispa.
Currently Selected:
Isaías 65: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012