Isaías 60
60
Musoq Jerusalén llaqtamanta
1¡Jerusalén llaqta, hatarispa kanchariy!
achkiqnikim chayaramun,
Tayta Diospa achkiyninmi kanchariykusunki.
2Kay pachatam tutayay intuykun,
tutayaymi nacionkunata pampaykun;
qamtam ichaqa Tayta Dios kanchaykusunki,
achkiriyninmi hawaykipi qawachikunqa.
3Nacionkunapas achkiynikipim purinqaku,
reykunapas kanchaynikipim purinqaku.
4Muyuriqnikita qawariy:
Llapallankum huñunakuruspa qanman hamuchkanku,
qari churikikunam karukunamantaraq hamuchkanku,
warmi churikikunatam marqaypi apamuchkanku.
5Paykunata qawaykuspam uyaykipas kancharinqa,
sonqoykimanpas kusikuymi huntaykunqa;
llapa nacionkunapa kapuqninkunatam qanman apamunqaku,
lamar qochapa patanpi llaqtakunapa qori-qollqentam qosunki.
6Madián lawmantawan Efa lawmantam
achkallaña camellokuna huntaykamusunki.
Sabá lawmantapas qoritawan inciensotam apamusunki,
Tayta Diostam tukuy ruwasqankunamanta hatunchanqaku.
7Cedar lawpi llapallan uywakunam
qampaq huñumusqa kanqa,
Nebaiot lawpi carnerokunam qampaq kanqa,
chaykunam altarniypi sumaq ofrenda kanqa,
kuyayllapaq temploytam aswanraq sumaqyachisaq.
8¿Pikunataq waknaña puyu hina pawaqkunaqa,
wasinman kutiq palomakuna hina pawaqkunaqa?
9Lamar qochapa patanpi nacionkunam ñoqapi hapipakuspa hamuchkanku,
Tarsis lawmanta barcokunam ñawpamuchkanku,
miraynikikunata karumanta apamuspam hamuchkanku,
qori-qollqenkutawan kuskatam apamuchkanku.
Ñoqa Tayta Diosta yupaychaqmi hamuchkanku,
reqsisqataña ruwasuqniki Israelpa Chuya Diosninraykum hamuchkanku.
10Huklaw llaqtayuqkunam perqaykikunata hatarichinqa,
paykunapa reyninkunam serviqniki kanqa.
Piñakuspaymi ñakarichirqayki,
kunanñataqmi kuyapayasqayrayku llakipayasqayki.
11 #
Ap 21.25-26. Punkuykikunapas tukuy tiempom kicharayanqa,
nacionkunamanta qori-qollqeta apamusunaykipaqmi,
vencesqa reyninkunata pusamusunaykipaqmi,
tuta punchaw kicharayanqa.
12Mana servisuqniki nacionqa chinkachisqam kanqa,
chayna nacionqa pasaypaq purmachisqam kanqa.
13Temployta kuyayllapaqta ruwanankupaqmi,
sarupakunay temployta ancha reqsisqata ruwanankupaqmi,
Líbano orqopi cipreskunata, pinokunata,
bojes sachakunata qanman apamusunki.
14 #
Ap 3.9. Ñakarichiqnikikunapa churinkunam
uchuychakuspanku ñawpaqnikiman hamunqaku,
usuchisuqnikikunam ñawpaqnikipi qonqoranqaku,
paykunam sutichasunki:
“Tayta Diospa llaqtan,
Israelpa Chuya Diosninpa Sión llaqtan”, nispanku.
15Saqesqa, cheqnisqa hinaspa manaña pipapas purinan kanaykimantaqa,
wiñaypaq reqsisqatam ruwasqayki,
miraykunapa kusikunanpaqmi wiñaypaq churasqayki.
16Nacionkunam allinnin mikuyta qosunki,
reykunam qori-qollqenta apamusunki;
chaynapim reqsiwanki,
ñoqa Tayta Dios salvaqniki kasqayta,
Jacobpa Atiyniyuq Diosnin reclamaqniki kasqayta.
17Broncepa rantinpim qorita qosqayki,
fierropa rantinpim qollqeta qosqayki,
kullupa rantinpim bronceta qosqayki,
rumipa rantinpim fierrota qosqayki.
Hawkayaymi qamta pusasunki,
allinkunata ruwaymi qamta kamachisunki.
18Allpaykipiqa wañuchinakuypas manam uyarikunqañachu,
tuñichinakuywan purmachinakuypas manam kanqañachu.
Murallaykikunatam “Libraqniy” nispa sutichanki,
punkuykikunatam “Yupaychana” nispa sutichanki.
19 #
Ap 21.23; 22.5. Punchawpas manañam intichu kanchasuqnikiqa kanqa,
tutanpas manañam killachu achkisuqnikiqa kanqa,
aswanqa Tayta Diosllañam wiñaypaq achkirisunki,
Diosnikim wiñaypaq kancharisunki.
20Intikipas manañam seqaykunqachu,
killaykipas manañam chinkaykunqachu,
aswanqa Tayta Diosllañam wiñaypaq kanchasunki;
llakikipas waqaynikipas tukunqañam.
21Runaykikunapas llaqtantinmi allin ruwaqkunaña kanqaku,
wiñaypaqmi allpankupi yachanqaku.
Paykunam plantakusqaypa ikllipankuna kanqaku,
atiyniyta qawachikunaypaq makiywan ruwakusqaykunam kanqaku.
22Aschalla kaqkunam waranqaman mirarunqa,
taksa llaqtachamantam hatun nación hatarinqa.
Ñoqa Tayta Diosmi chaytaqa tiemponpi ruwasaq.
Currently Selected:
Isaías 60: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012