Isaías 59
59
Huchamantawan castigomanta
1Tayta Diospa atiyninqa manam pisirunchu
mana salvawananchikpaq hinaqa,
rinrinpas manam upayarunchu manaña uyarinanpaq hinaqa.
2Ichaqa mana allinkuna ruwasqaykichikmi Diosmanta rakirusunkichik,
huchaykichikraykum mana uyarisunkichikchu.
3Qamkunaqa runa wañuchiqmi kankichik,
millakuypaq mana allinkuna ruwaqmi kankichik,
simikichikmantapas llullakuywan mana allinkunallam lloqsimun.
4Juzgadonmanmi llullakuspa quejakuq rinkichik,
juezkunamanpas manam cheqap kaqwanchu rinkichik.
Aswanqa yanqakunallapim hapipakunkichik,
yanqakunallatam rimankichik,
mana allin ruwaykunapa huntasqanmi kachkankichik,
chayraykum millakuypaq kaqkunallata rikurichinkichik.
5Qamkunaqa maqta urupa runtuntam oqllachkankichik,
arañapa llikankunatam awachkankichik;
pipas chay runtuta mikuruspanqa wañurunqam,
chay runtu toqyaruptinqa maqta urum lloqsiramunqa.
6Chay awasqaykichik llikawanqa
manam pipas pachataqa ruwanqachu,
chaykunawanqa manam pipas pachakunqachu;
qamkunapa ruwaynikichikqa ñakarichiyllam,
makikichikwanpas ñakariyllatam hatarichinkichik.
7Mana allin ruwaymanmi kallpankichik,
mana huchayuqta wañuchiqmi kallpankichik;
tukuy mana allin ruwaykunallapim yuyaymanankichik,
maymanpas ñakarichiq hinaspa purmachiqllam rinkichik.
8 #
Ro 3.15-17. Hawkalla kawsaytaqa manam reqsinkichikchu,
qamkunaqa manam allin ruwayta yachankichikchu.
Ñan purisqaykichikpas pantayllam,
pipas chayninta puriqqa manam hawka kawsaytaqa tarinqachu.
9Chayraykum mana piman sayapakuspa allin arreglo ruwaypas
ñoqanchikmanta karunchakurun;
kanchaytam suyarqanchik,
ichaqa tutayayllam chayaramuwanchik;
achkiytam suyarqanchik,
ichaqa tutayayllapim purichkanchik.
10Ñawsa hinam perqakunaman tawnapakuspa purichkanchik,
chawpi punchawpipas tutayaypi hinaraqmi mitkakuchkanchik,
kallpallanchikpiraq kachkaspapas wañusqa hinañam kachkanchik.
11Ukumarikuna hinaraqmi waqachkanchikpas,
paloma hinaraqmi llakikuypaq qoqoqyanchikpas;
librasqa kaytam suyarqanchik,
ichaqa manam tarinchikchu;
salvasqa kaytam suyarqanchik,
ichaqa ñoqanchikmantam karunchakurun.
12Dios Taytallayku,
llumpay mana kasukuqmi kaniku,
huchallaykum ñoqaykuta acusawanku,
mana kasukusqaykutam reqsikuniku,
mana allinkuna ruwasqaykutam reqsikuniku.
13Mana kasukuspam qepancharqaykiku,
iskay uya kaspaykum traicionarqaykiku;
contraykipim hatarirqaniku,
runamasiykuta ñakarichinaykupaqmi rimarqaniku,
engañanaykupaqmi sonqoykupipas tantearqaniku.
14Mana pimanpas sayapakuspa allin arreglo ruwaymi karunchakurun,
allin ruwaymi chinkarun,
plazakunapipas cheqap kaqtaqa manam rimankuñachu,
cheqap rimaq runapas manam kanñachu.
15Cheqap rimaymi chinkarun,
mana allinmanta rakikuqpatam tukuy imanta suwarunku.
Allin ruway manaña kasqanta rikuspanmi
Tayta Dios piñakurun.
16 #
Is 63.5. Tukuy chaykunata allichaq mana kasqanmantam
Tayta Dios hukmanyarurqaraq,
chaymi kikinpa atiyninwanña salvarqa,
allinkuna ruwasqanwanmi takyachirqa.
17 #
Ef 6.14. #
Ef 6.17; 1 Ts 5.8. Allinkuna ruwasqanwanmi qasqonta hinaspa wasanta harkachikunawan hinaraq churakurqa,
salvaq kasqanwanmi cascowan hinaraq churakurqa,
vengakuyninwanmi pachawan hina churakurqa,
piñakuyninwanmi mantonwan hina capakurqa.
18Sapakamamanmi ruwasqankuman hina pagapunqa,
enemigonkunatam payqa ñakarichinqa.
Cheqniqninkunamanmi payqa kutichipunqa,
lamar qochapa patanpi kaqkunamanmi pagapunqa.
19Intipa qespimunan lawpi kaqkunam
Tayta Diosta manchakunqaku,
intipa seqaykunan lawpi kaqkunam
atiyninta hatunchanqaku.
Payqa lloqlla hinaraqmi hamunqa,
Diospa pukuyninpa kallpachimusqan mayu hinaraqmi hamunqa.
20 #
Ro 11.26. Tayta Diosmi kaynata nin:
Sión llaqtapa libraqninmi hamunqa,
Jacobpa mirayninmanta wanakuqkunata libraqmi hamunqa, nispa.
21Tayta Diosmi nin:
“Qamkunawanmi pactota ruwani.
Espirituymi qamkunamanta mana rakikunqachu,
simikiman churasqay palabraykunam
qamkunamanta nitaq miraynikikunamantapas
wiña-wiñaypaq mana chinkanqachu”.
Ñoqa Tayta Diosmi chaynata nini.
Currently Selected:
Isaías 59: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012