Isaías 43
43
Israelta Tayta Dios librananmanta
1Jacobpa miraynin Israel llaqta,
unanchaqniki Tayta Diosmi kaynata nisunki:
Ama manchakuychu,
ñoqam libramurqayki
sutikimantam qayamurqayki,
qamqa ñoqapam kanki.
2Yakunta riptikipas, qanwanmi kasaq,
mayunta chimpaptikipas, manam apasunkichu,
nina ukunta pasaptikipas, manam rupasunkichu,
lenwachkaq ninapas manam kañasunkichu.
3Ñoqaqa salvaqniki Tayta Diosmi kani,
Israelpa Chuya Diosninmi kani.
Rantikipim Egipto nacionta pagarqani,
rantikipim Etiopía naciontawan Seba nacionta qoykurqani.
4Qamtaqa allinpaqmi qawayki
ancha kuyasqaymi kanki,
rantikipim runakunata pagarqani,
vidaykiraykum nacionkunata qoykurqani.
5Ama manchakuychu,
ñoqam qanwan kachkani;
ñoqam intipa qespimunan lawmanta,
hinaspa intipa seqaykunan lawmanta,
lliw miraynikikunata huñumusaq.
6Norte lawtam kamachisaq “paykunata kutichimuy”, nispa;
sur lawtam kamachisaq “ama paykunata harkamuychu”, nispa;
qaritapas warmitapas churiykunata
tukuy hinastinmanta pusamuy, nispa.
7Sutiywan sutichasqakunata,
hatunchasqa kanaypaq unanchasqaykunata,
ñoqallapaqña kananpaq ruwasqay runaykunatam pusamusaq, nispa.
8Ñawiyuq kachkaspa mana qawakuq llaqtata hurqomuychik,
rinriyuq kachkaspa mana uyarikuq llaqtata hurqomuychik.
9Llapa nacionkuna, lliw llaqtakuna huñunakamuychik.
¿Mayqantaq paykunamanta kaykunata willakurqa?
¿Mayqantaq ñawpaq kaqkunata kunan willakurqa?
Cheqap rimaq kasqankumanta testigonkuta pusamuchunku,
chaynapi uyarispanku cheqapmi kasqa ninankupaq.
10Tayta Diosmi kaynata nin:
Qamkunam testigoykuna kankichik,
serviwanaykichikpaq akllakusqaykunam kankichik,
reqsiwaspaykichik ñoqapi hapipakunaykichikpaq,
ñoqalla Dios kasqayta yachanaykichikpaq.
Ñoqamanta huk diosqa manam haykapipas kanqachu.
11Ñoqallam Tayta Diosqa kani,
ñoqamanta hukqa manam pipas salvakuqqa kanchu.
12Tayta Diosmi nin:
Ñoqam salvanaypaq willarqaykichik,
nisqayman hinam ruwarqani,
manam sapaq dioschu chaynataqa ruwarqa,
chay ruwasqaymantaqa testigom kankichik.
13Tukuy imapa qallariyninmantam ñoqalla Dios kani.
Ñoqapa makiymantaqa manam pipas qechuwayta atinmanchu,
ñoqapa ruwasqaytaqa manam pipas yanqachanmanchu.
14Qamkuna reclamaqnikichikmi,
Israelpa Chuya Diosninmi kaynata nin:
Qamkunaraykum punkunkunata kichanankupaq
Babilonia lawman runakunata kachasaq,
Caldea runakunatam alabakusqanku barcokunapi uraykachisaq.
15Ñoqa Tayta Diosqa,
Chuya Diosnikichikmi kani.
Israel unanchaq reynikichikmi kani.
16Tayta Diosmi,
lamar qochanta ñanta kichaqmi,
olallaña lamar qochapa ukunta ñanta kichaqmi,
17carretakunatawan caballokunata lloqsichiqmi,
tropakunatawan yanapaqninkunata lloqsichiqmi,
hinaspa manaña hatariy atinankukama wichichiqmi,
wañunayaq mechata hina paykunata saqeruqmi,
kaynata nin:
18Ñawpaq kaqkunataqa qonqaychikña,
amaña huktawanqa yuyaymanaychikchu.
19Ñoqam musoq kaqta ruwasaq,
hichpallañam kachkan rikurimunanpaq ¿manachu musyankichik?
Chunniqpim ñanta kichasaq,
chaki allpakunapim mayukunata kallpachisaq.
20Purun animalkunam yupaychawanqaku,
atoqkunawan avestruzkunam yupaychawanqaku;
yakukunata chunniqpi pawachisqayrayku,
mayukunata chaki allpapi kallpachisqayrayku.
Chaytam akllakusqay llaqtayman yakuta tomachinaypaq ruwarqani.
21Kay llaqtataqa kikiypaqmi unancharqani,
chaynapi hatunchasqa kasqayta willakunankupaq.
22Chaywanpas Jacobpa miraynin Israel llaqta,
manam ñoqatachu qayakuwarqanki,
aswanqa ñoqatam amiruwanki.
23Lliw kañanapaq ovejakunataqa manam apamuwarqankichu,
animalkunatapas yupaychawanaykipaqqa manam sacrificarqankichu,
kawsaykunamanta ofrendatapas aminaykikamaqa manam mañapayarqaykichu,
inciensotapas pisipanaykikamaqa manam mañakurqaykichu.
24Miski asnaq calamotapas qollqekiwanqa manam rantipuwarqankichu,
nitaqmi animalkunapa wirantapas saksanaykamaqa kañapuwarqankichu.
Aswanqa huchallikuspa tukuy mana allinkuna ruwasqaykiwanmi
paqwayta amichiwarqanki.
25Ñoqam ichaqa Diosniki kasqayrayku
lliw mana kasukuynikikunata pampachayki,
huchaykikunatapas manañam yuyasaqñachu.
26Contraypi imapas niwanayki kaptinqa
hamuy rimananchikpaq,
mana huchayuq kasqaykita niway,
ichapas yanqamanta tumpachkayki.
27Ñawpaq taytaykikunapas huchallikurqakum,
yachachiqnikikunapas manam kasuwarqakuchu.
28Chayraykum temploypi kamachikuqkunata penqayman churarqani,
Jacobpa miraynin Israel llaqtatapas,
ñakarichisqa hinaspa usuchisqa kanankupaqmi saqerurqani.
Currently Selected:
Isaías 43: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012