Isaías 36
36
Judapa contranpi rey Senaquerib hamusqanmanta
(2 R 18.13-37; 2 Cr 32.1-19)
1Chunka tawayuq wataña Ezequías rey kachkaptinmi, Asiria nacionpa reynin Senaquerib Judá nacionpi llapa murallasqa llaqtakunapa contranpi hamururqa, hinaspam munaychakururqa.
2Asiriapa reynin Senaqueribmi Laquis llaqtamanta tropankuna kamachiq #36.2 Rabsaces, hebreo simipi Rabsacesqa achka tropakuna kamachiq ninanmi.Rabsacesta achkallaña tropayuqta Jerusalenpi rey Ezequiasman kachamurqa; hamuspankum hanay law estanqueman hamuq yarqapa hichpanpi, “Taqsaq runapa chakran” sitioman riq ñanpa hichpanpi churakururqaku.
3Hinaptinmi Hilciaspa churin reypa mayordomon Eliaquimwan, secretario Sebna hinaspa Asafpa churin escriba Joa chaskiqninku lloqsimurqaku. 4Paykunatam rey Ezequiasman willananpaq Rabsaces kaynata nirqa:
Asiria nacionpa ancha reqsisqa reyninmi kaynata nin: ¿Imapi hapipakuspataq hawkallaña kachkanki? 5Qanmi nichkanki: “Ñoqapaqqa consejaqniypas chaynataq guerrapaq allinnin qari-qari soldadoykunapas kachkanmi”, nispa; yanqam chayqa. ¿Piman hapipakuspaykitaq contraypi hatarirunki?
6¿Pakisqa soqos tawna hina Egipto nacionpichu hapipakuchkanki? Chay soqos tawnaqa, tawnapakuqninpa makintapas pakikuruspanmi qellparunqa. Chay hinallam Egiptopi rey Faraonpas lliw paypi hapipakuqninkunapaqqa. 7Sichum niwanki: “Ñoqaykuqa Tayta Diosniykupim hapipakuniku”, nispa, hinaptinqa ¿manachum chay Diospa capillankunatawan altarninkunatapas lliwta Ezequías chinkarachirqa? Payqa Judapi chaynataq Jerusalenpi yachaqkunatam nirqa: “Kay altarpa ñawpaqllanpiñam yupaychankichik”, nispa.
8Kunanyá Asiriapa reyniywan allinyanakuy, ñoqañataqmi iskay waranqa caballokunata qosqayki, yaqachus iskay waranqa sillakuqkunata tarirunki. 9Egipto nacionpa carretankunapiña hinaspa sillada tropankunapiña hapipakuspapas ¿imaynataq reyniypa serviqnin capitankunamanta eqonniq kaqllawanpas peleayta atiwaq? 10Kunan kay llaqtata tuñichiq hamunaypaqqa kikin Tayta Diosmi kachamuwarqa, wak llaqtaman rispa tuñichimuy, nispa.
11Hinaptinmi chay kamachikuqta Hilciaspa churin Eliaquimwan Sebna hinaspa Joañataq nirqaku:
Mañakuykikum, muralla hawanpi runakuna uyarichkaptinqa amayá hebreo simipiqa rimapayawaykuchu, Aram nacionniyuq runakunapa rimayninpi rimapayawaykuqa, ñoqaykuqa entiendesaqkum, nispanku.
12Chay kamachikuqñataqmi nirqa:
Reyniyqa manam kachamuwarqa reynikichikmanwan qamkunallaman willanaypaqchu, aswanqa muralla hawanpi kaq runakunaman willanaypaqmi, paykunam uyarinankuqa, paykunapas qamkunawan kuskam hatun ispayninkuta mikunqaku, chaynataqmi yaku ispayninkutapas tomanqaku, nispa.
13Chaynata niruspanmi sayaykuspan hebreo simipi qaparispan nirqa:
Asiria nacionpa ancha reqsisqa reyninpa nisqanta uyariychik: 14Ama rey Ezequiaswan engañachikuychikchu, ñoqamantaqa manam payqa librasunkichikmanchu.
15Sichum Ezequías nisunkichik: “Tayta Diospi hapipakusun, payqa waqaychaykuwasunmi, llaqtanchiktaqa manam Asiria nacionpa reyninmanqa qonqachu nispa”, 16hinaptinqa ama kasuychikchu. Asiriapa reyninmi kaynata nin: Ñoqawan allinyanakuspa qayllaypi uchuychakuychik. Chaynata ruwaspaqa sapakamam uvasnikichikpa higosnikichikpa rurunta mikunkichik, sapakamataqmi pozoykichikpi yakutapas tomankichik. 17Hamuspay kay yachasqaykichik hina allpaman, kawsaypa, vinopa, mikuypa, uvaspa kanan allpaman pusanaykama.
18Ezequiaswanqa amayá engañachikuychikchu, Tayta Diosmi waqaychawasun nisuptikichikpas. Wakin nacionkunapa diosninkunaqa ¿yaqachu mayqanllanpas nacionnin librayta atirqa Asiria nacionpa reyninmanta? 19¿Maypitaq Hamatpa, Arfadpa hinaspa Sefarvaim llaqtakunapa diosninku kachkan? ¿yaqachu atirqaku Samaria llaqtata ñoqamanta librayta? 20Chay nacionkunapa llapallan diosninkunamanta ¿mayqannintaq ñoqamanta nacionnin librayta atirqa? Chaynaqa, ama niychikchu Tayta Diospas Jerusalén llaqtata ñoqamanta waqaychanantaqa, nispa.
21Uyariqnin runakunañataqmi upallalla kaspanku mana imatapas nirqakuchu. Reymi paykunata kamachirqa:
Amam kutipakunkichikchu, nispa.
22Hinaptinmi Eliaquimwan secretario Sebna hinaspa escriba Joañataq pachankuta llikiparuspanku rey Ezequiasman kutispanku chay kamachikuqpa rimasqankunata willarqaku.
Currently Selected:
Isaías 36: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012