Isaías 37
37
Judá nación librasqa kasqanmanta
(2 R 19.1-37; 2 Cr 32.20-23)
1Chayta uyariruspanmi rey Ezequías pachanta llikiparurqa, hinaspam qachqa pachawan churakuruspan Tayta Diospa templonman yaykurqa. 2Chaymantam mayordomo Eliaquimta, secretario Sebnata hinaspa yuyaq sacerdotekunata qachqa pachawan pachasqatakama, Amozpa churin profeta Isaiasman kacharqa. 3Paykunam nirqaku, Ezequiasmi kaynata nin:
Kunan punchawqa ancha llakisqa, ñakarichisqa, penqayman churasqam kachkanchik. Wachakunanpaq kachkaspan manaña kallpayuq warmi hinam kachkanchik. 4Ichapas Tayta Dios uyarirqa Asiria reypa kamachimusqan runapa Tayta Diosta kamisqanta, allincha kanman chay rimasqanmanta Tayta Dios puchukachiptinqa. Chaynaqa, Diostayá puchuq kaqkunapaq mañakuy, nispa.
5Rey Ezequiaspa serviqninkuna Isaiaspaman chayaruptinkum, 6Isaías nirqa:
Tayta Diospa nisqanta reynikichikman kaynata willamuychik: “Asiria reypa serviqninkunapa kamiwasqanwanqa ama manchakuychu. 7Kunanmi Asiriapa reyninta llaki noticiawan hukmanyarachisaq, hinaptinmi llaqtanman kutispa hukkaqninpa wañuchisqan kanqa”, nispa.
8Hinaptinmi chay kamachikuq uyarirurqa Asiria nacionpa reyninqa Laquis llaqtamanta asurikusqantaña. Kutispanmi Senaqueribta Libna llaqtayuqkunawan peleachkaqta tariykurqa. 9Chaypim rey Senaquerib uyarirurqa Etiopía nacionpa reynin Tirhaca contranpi hamusqanta. Chaymi rey Ezequiasman runankunata huktawan kacharqa, 10kaynata nimunankupaq:
Hapipakusqayki Diosnikim nichkan: “Asiria reyqa manam Jerusalén llaqtataqa munaychakunqachu”, nispa. Llullam chayqa. 11Qamqa uyarirqankim Asiria reykunapa llapa nacionkuna tuñichisqantaqa ¿Chaychu qamñataq ayqewaq? 12Manam Gozanta, Haranta, Resefta chaynataq Telasarpi yachaq Edén castan runakunatapas ñawpaq taytaykuna tuñichiptin diosninku librarqachu. 13¿Maypitaq tarikun Hamat llaqtapa, Arfad llaqtapa, Sefarvaim llaqtapa, Hena llaqtapa chaynataq Iva llaqtapa reyninkunaqa? nispa.
14Rey Ezequiasmi cartata chaskiruspan leeykurqa, hinaspam Tayta Diospa templonman apaykuspa, Diospa qayllanpi kicharayachkaqta churaykuspan, 15Tayta Diosta kaynata mañakurqa:
16 #
Ex 25.22. Querubinkunapa chawpinpi yachaq Israelpa Tukuy Atiyniyuq Diosnin, qamllam kanki llapallan nacionkunapi munaychakuqqa. Qanmi ruwarqanki hanaq pachatapas chaynataq kay pachatapas. 17Dios Taytalláy, qawariwaspa uyariykullaway, hinaspayá rey Senaqueribpa qam kawsaq Diosta kamisusqaykita uyariykuy. 18Dios Taytalláy, cheqaptam Asiria reykunaqa llapallan nacionkunapa allpankuta purmachirqaku. 19Idolonkutapas ninamanmi wischuykurqaku, runakunapa kullumanta rumimanta ruwasqan kasqanraykum chaykunataqa chinkarachirqaku. Cheqaptapunipas chaykunaqa manam dioschu. 20Kunanyá Dios Taytallayku, qamlla Dios kasqaykita kay pachapi llapallan nacionkuna reqsinankupaq rey Senaqueribpa makinmanta libraykuwayku, nispa.
21Hinaptinmi Amozpa churin Isaías, rey Ezequiasman kaynata nichimurqa; Israelpa yupaychasqan Tayta Diosmi kaynata nin:
Asiriapa reynin Senaqueribmanta mañakuwasqaykitaqa uyariykuykim.
22Chaynaqa, ñoqa Tayta Diosmi kaynata nini:
Yaw, rey Senaquerib,
Sión llaqtaqa sipas hinam qanmanta asikun,
Jerusalén llaqtaqa qepaykipim umanta aywin.
23¿Pitataq kamirqanki?
¿Pitataq ñakarqanki?
¿Pitataq kutiparqanki?
¿Pitataq hatunchakuspa qawarqanki?
¡Israelpa Chuya Diosninpa contranpim
chaykunataqa ruwarqanki!
24Serviqnikikunawanmi Señorta kamichirqanki,
hinaspam nirqankiraq:
“Nana-nanaq carroykunawanmi orqokunapa puntanman qespirusaq,
Líbano orqo waqtatam qespirusaq,
hatun cedro sachakunatam kuchumusaq,
sumaq ciprés sachakunatam kuchurusaq,
karu-karu orqonkunamanmi chayarusaq,
sachankamallaña montenkunamanmi chayarusaq.
25Huklaw nacionpim pozokunata toqospay yakunta tomarqani;
saruspaymi Egiptopa mayunkunatapas chakichisaq”, nispa.
26¿Manachu yacharqanki ñawpaqmantaraq ñoqa Dios chaykuna ruwasqayta?
¿Ñawpaq punchawkunapiraq ñoqa tanteasqayta?
chaykunatam kunan ruwani qanwan,
hinaptinmi murallasqa llaqtakunata tuñichispa purmachimurqanki.
27Chaymi runankunapa kallpankupas manchakuymanta chinkarirqaraq,
paykunaqa rikurirunku manaraq wiñayta tukuchkaspa chakiruq qorakuna hinam.
28Yachanim tukuy ima ruwasqaykitapas,
tukuy imapi purisqaykitapas,
hinaspa ñoqapaq piñakusqaykitapas,
29uyarinim ñoqapaq piñakuspa hatun simikiwan kamiwasqaykitapas,
chayraykum argollata senqaykiman churaspay,
frenota simikiman churaspay,
maymi hamusqayki ñanninta kutichisqayki, nispa.
30Chaymi rey Ezequiasta Isaías nirqa:
Kaymi imam pasakunanmanta señal kanqa:
Kunan watapas chaynataq hamuq watapas kikillanmanta wiñaq trigotam mikunkichik.
Kimsa kaq watapiñataqmi tarpuspa cosechankichik.
Uvastapas plantaspam rurunta mikunkichik.
31Judá llaqtapi puchuqkunam takyasqa sacha hina kanqaku,
sapichakuspam allinta rurunqaku.
32Jerusalén llaqtamantam miranqaku,
lluptiqkunapas Sión llaqtamantam miranqaku.
Tukuy Atiyniyuq Tayta Diospa kuyakuyninmi chaynata ruwanqa.
33Asiriapa reyninmantam Tayta Dios kaynata nin:
“Kay llaqtamanqa manam yaykumunqachu,
flechankunapas manam chayamunqachu,
escudontapas manam hapinqachu,
allpatapas murallapa qepanmanqa manam montochinqachu.
34Maymi hamusqan ñannillantam kutinqa,
kay llaqtamanqa manam yaykumunqachu.
Tayta Diosmi chaynata nin.
35Ñoqam kay llaqtata waqaychasaq
kikiyraykum chaynata ruwasaq.
Serviqniy Davidta kuyasqayraykum chaynata ruwasaq”, nispa.
36Chay tutam Tayta Diospa angelnin Asiria soldadokunata pachak pusaq chunka pichqayuq waranqata hina campamentollanpi wañurachirqa. Achikyaruptinmi llapallanku wañusqaña kachkasqaku. 37Hinaptinmi Asiriapa reynin Senaquerib, Nínive llaqtaman kutikuspan chaypi yacharqa. 38Huk punchawmi Nisroc idolonta templonpi yupaychachkarqa, hinachkaptinmi Adramelecwan Sarezer espadawan wañurachirqaku, hinaspam Ararat lawman lluptikurqaku, paykunaqa churinkunam karqaku. Chaymi rey Senaqueribpa rantinpi churin Esar-hadonña munaychakurqa.
Currently Selected:
Isaías 37: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012