Génesis 44
44
Joseypa vasonmanta
1Joseymi wasinpi mayordomonta kamachirqa:
Kay runakunapa costalninman kawsayta hinamuy apay atinankukama, qollqe apamusqankutañataq kawsay rantisqanku qollqetawan kuskata sapakamapa costalninman churamuy. 2Sullkankupa costalninmanñataqmi qollqemanta vasoytawan kawsay rantinanpaq qollqetawan kuskata churanki, nispa.
Chay mayordomom Joseypa imam nisqanta ruwarqa. 3Achkiramuptinmi chay runakunata asnonkunatawan aviarurqaku. 4Paykuna llaqtamanta lloqsiruspa manaraqpas karupi kachkaptinkum, mayordomonta José nirqa:
Utqayman chay runakunata qatiy, hayparuspaykim paykunata ninki: “¿Imanasqataq allin ruwasuqnikichikta mana allinwan kutirachinkichik? ¿Imanasqataq qollqemanta vasonta suwaramurqankichik? 5¿Manachu chay vasoqa señorniypa tomanan hinaspa adivinanan vaso? ¡Kaytaqa manam allintachu ruwarunkichik!” nispa.
6Paykunata hayparuspanmi Joseypa imam yachachisqanta hina chay mayordomo nirqa. 7Hinaptinmi paykunañataq nirqaku:
Señorllayku ¿imatataq kaytaqa niwankiku? Manam haykapipas ñoqaykuqa chaytaqa ruwaymankuchu. 8Qollqetaña costalniykupi tariruspapas Canaán lawmantaraqmi kutichimurqaniku. ¿Imaynataq patronnikipa wasinmantaqa qorintawan qollqentaqa suwakamuymanku karqa? 9Hukkaqniykupapi chay vasota tariruspaqa wañuchiyá, wakiqniykupas señorniykupa criadonyá kasaqku, nispanku.
10Chaymi mayordomo nirqa:
Nisqaykichikman hinayá kachun. Pipapipas tariruptiyqa payllam criadoyqa kanqa, wakiqnikichikqa mana huchayuqmi kankichik, nispa.
11Paykunañataqmi utqayman costalninkuta uraykachispanku sapakama kicharqaku. 12Chaymi piwi kaqmanta maskayta qallaykuspan sullka kaqpi tukurqa, hinaspam Benjaminpa costalninpi vasota tarirurqa. 13Tariruptinmi paykuna mana ima ruwakuyta atispa pachankuta llikiparqaku, hinaspam asnonkuman cargakuykuspa llaqtaman kutirqaku.
14Chayaruptinkum Joseyqa wasillanpiraq kachkasqa, chaymi Judaqa wawqenkunapiwan Joseypa ñawpaqninpi qonqoranpa kumuykurqaku. 15Hinaptinmi paykunata José nirqa:
¿Imatataq kayta ruwarunkichik? ¿Manachum yacharqankichik ñoqaqa adivinaq kasqayta? nispa.
16Chaymi Judá nirqa:
Manam imatapas nikikumanñachu nitaqmi negakuytapas atiymankuñachu. Mana allin ruwasqaykutam Dios rikurirachin. Chaynaqa, makikipiñam kaniku, vasoyki apaqpiwan kuska qamllataña servinaykupaq, nispa.
17Hinaptinmi José nirqa:
Manam chaynatachu ruwasaq, copa apaqllam criadoyqa kanqa, qamkunañataqmi taytaykichikpa wasinman hawkalla kutikunkichik, nispa.
Benjaminpa favorninpi Judá ruegakusqanmanta
18Chaymi Judaqa Joseyman asuykuspan nirqa:
¡Señorlláy! Ama hina kaspaykiyá kay serviqllaykipa rimariyninta uyariykullaway. Amayá piñakuykuychu, qamqa kanki rey Faraón hinam. 19Señorlláy, qanmi tapuwarqankiku: “¿Taytaykichik chaynataq wawqekichik kanraqchu?” nispayki. 20Hinaptinmi nirqaykiku: Arí taytaykuqa kawsakunraqmi, ichaqa yuyaqñam. Kantaqmi sullka wawqeykupas; paytam taytayku yuyaqyayninpiña churyakurqa. Nirqaykikutaqmi chay churintaqa taytaykupa ancha kuyasqantapas, anchataqa kuyan warmin Raquelpi iskaylla churinkuna kasqanraykum, chay iskaymantam mayor kaq wañukurqa, nispayku. 21Qamñataqmi kay serviqllaykikunata niwarqankiku: “Chay warmata pusamuwaychik reqsinaypaq” nispayki. 22Chaymi ñoqayku nirqaykiku: “Warmaqa manam taytanta saqemuyta atinmanchu, saqeramuptinqa wañurunmanchá” nispayku. 23Hinaptinmi kay serviqllaykikunata niwarqankiku: “Sullka wawqekichikta mana pusamuspaqa amam kutimuwankichikchu” nispayki.
24Taytaykuman chayaruspa niwasqaykikuta hina willaptiykum, 25taytayku niwarqaku: “Kutispayá ñoqanchikpaq asllatapas kawsayta rantimuychik” nispa. 26Ñoqaykuñataqmi nirqaniku: “Manam riymankuchu sullka wawqeyku mana ñoqaykuwan riptinqa, paywanmi ichaqa risaqku, mana riptinqa chay señormanqa manam rikuriymankuchu” nispayku. 27Chaymi taytayku niwarqaku: “Qamkunaqa yachankichikmi warmiy Raquelqa iskay wawayuqlla kasqanta. 28Hukninmi ladoymanta lloqsirqa hinaspam kunankama mana kutiykamunchu, ima purun animalchá llikiparurqa. 29Kunan huknintapas ladoymanta pusaruptikichik imapas pasaruptinqa qamkunapa hawaykichikpim waqachkaspalla yuyaqyayniypi wañurusaq” nispa.
30Chaynaqa, señorllayku, taytaykuqa warmanraykum kawsachkan. Kunan taytaykuman mana warmayuq kutiykuptiykuqa, 31watukuykuspachiki wañurunqa, ñoqaykuñataq huchayuq kasaqku yuyaq taytayku waqasqallanpi wañukuptinqa.
32Kay warmataqa ñoqa serviqllaykim taytanpa qayllanmanta pusamurqani, “mana kutichimuspayqa ñoqam wiñaypaq huchayuq kasaq” nispay. 33Chayraykum mañakuyki ñoqaña criadoyki hina qepanaypaq, warmañataqyá wawqeykunawan kutichun. 34¿Imaynataq mana warmantinqa taytayman kutiykuyman? Manam munaymanchu taytayta imapas pasarunantaqa, nispa.
Currently Selected:
Génesis 44: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012