Génesis 43
43
Benjaminta Egiptoman pusasqankumanta
1Muchuymi Canaán allpapi llumpayña karqa. 2Chaymi Egiptomanta kawsaykuna apamusqanku tukuruptin Jacob nirqa:
Mikunanchikpaqyá huktawan kutispaykichik asllatapas kawsayta rantimuychik, nispa.
3Hinaptinmi Judá nirqa:
Chay runam chunkay-chunkayta nimuwarqaku: “Sullka wawqekichikta mana pusamuspaykichikqa amam rikurimuwankichikchu”, nispa. 4Sichum wawqeyku ñoqaykuwan riptinqa kutisaqkum kawsaykuna rantiq. 5Mana kachariptikiqa manam risaqkuchu. Chay runam nimuwarqaku “Sullka wawqekichikta mana pusamuspaykichikqa amam kutimuwankichikchu”, nispa.
6Chaymi Israel nirqa:
¿Imanasqataq kay mana allinta ruwaruwankichik? ¿Imapaqtaq sullka wawqekichikmanta willakaramurqankichik? nispa.
7Hinaptinmi paykuna nirqaku:
Chay runam ayllunchikkunamanta tapupayawarqaku kaynata: “¿Taytaykichik kawsanraqchu? ¿Kanraqchu huk wawqekichikpas?” nispan. Chaymi tapuwasqankuman hina willakurqaniku. Ichasmi nirqanikuchu “wawqekichiktam pusamunkichik” niwanankutaqa, nispanku.
8Chaymi taytan Israelta Judá nirqa:
Qampas, ñoqaykupas chaynallataq churiykupas mana wañunanta munaspaqa, Benjaminta kachariy ñoqaykuwan rinanpaq. 9Benjamintaqa ñoqam nanachikusaq, mana kutichimuptiyqa ñoqatam cuentata mañawanki, ñoqachiki wiñaypaq huchayuq kasaq. 10Mana harkawaptikikuqa iskayta riruspapas ñam kutiramuymankuña karqa, nispa.
11Chaymi taytanku Israel nirqa:
Chayna kaptinqa kaynatayá ruwaychik, chay runamanyá kay Canaán lawpi allinnin regalokunata apaychik: Aslla balsamota, mielta, miski asnaq perfumekunata, mirrata, nuezkunata hinaspa almendrasta. 12Apaychiktaqyá qollqetapas rantimunaykichikpaq, costalpi qollqe tarisqaykichiktapas kutichiychik, icha pantaspapas hinaramurqaku. 13Wawqekichikta pusaspa chay runaman kutiychik. 14Tukuy Atiyniyuq Diosyá chay runapa sonqonman qamkunapaq llakipayakuyta churaykuchun, chaynapi Simeontawan Benjaminta kacharimunanpaq. Churiykunata qechuruwaptinqa imanasaqtaq, mana churiyuqñachiki qepasaq, nispa.
15Chaymi Jacobpa churinkuna, regalokunata, qollqetapas ñawpaq apasqankumanta huk chaynatawanraq aparikuspa kutirqaku. Pusarqakutaqmi wawqenku Benjamintapas, chaymi Egipto nacionman rispanku Joseyman chayarurqaku, 16hinaptinmi Benjamintawan wawqenkunata José rikuykuspan wasinpi mayordomonta kaynata kamachirqa:
Kay runakunata wasiyman pusaykuy hinaspa novillota nakaspa mikuyta ruwamuy, kay runakunam chawpi punchawta ñoqawan mikunqaku, nispa.
17Chay mayordomom Joseypa kamachisqanman hina ruwaspan Joseypa wasinman chay runakunata pusaykurqa. 18Hinaptinmi chay runakunaqa llumpayta mancharikurqaku, Joseypa wasinman pusasqa kasqankurayku hinaspam ninakurqaku:
Punta hamuyninchikpi costalninchikpi qollqetachusmi tumpaykuwanchik, chaychusmi kaymanqa pusaykaramuwanchik, chaqnaruwaspanchik asnonchikkunatawan kuskata esclavontaña ruwawananchikpaq, nispanku.
19-20Chaymi Joseypa mayordomonman asuykuspanku wasipa punkunpi kaynata nirqaku:
Señorlláy, puntatam kawsay rantiq hamurqaniku. 21Kutisqaykupim tuta samana sitioman chayaruspayku costalniykuta kichaykurqaniku, hinaptinmi sapakamapa qollqeyku imam kaq pesoyuq kachkasqa, chaymi kutichimuchkaniku. 22Apamuchkanikutaqmi huk chayna qollqetapas kawsay rantinaykupaq, ichaqa manam yachanikuchu costalniykuman pim chay qollqe churarusqantaqa, nispanku.
23Hinaptinmi chay mayordomo nirqa:
Qamkunaqa hawkalla kaychik, ama manchakuychikchu, taytaykichikpa Diosninmi costalnikichikpi pakata hina qoykusurqankichik, qollqekichiktaqa imam kaqtam chaskirqani, nispa.
Chaymantam Simeonta paykunaman hurqoramurqa, 24hinaspam llapankuta Joseypa wasinman pusaykurqa. Yakuta paykunaman qoykuptinmi chakinkuta mayllakurqaku, chaynallataqmi asnonkumanpas qaraykurqaku. 25Paykunañataqmi Joseywan chawpi punchawpi mikunankuta yachaspanku regalokunata allicharqaku.
26Wasiman José chayaramuptinmi, regalokuna apamusqankuta qospanku qayllanpi qonqoranpa kumuykurqaku. 27Chaymi José imaynam kasqankumanta kaynata tapurqa:
“Yuyaqñam nisqaykichik taytaykichikqa” ¿imaynataq kachkan? ¿kawsachkanraqchu? nispa.
28Hinaptinmi paykuna nirqaku:
Serviqniki taytaykuqa kawsachkanraqmi, allinllam kachkan, nispanku.
Hinaspam qonqoranpa kumuykurqaku. 29Chaymantam taytanmantawan mamamanta wawqen Benjaminta qawarispan José tapurqa:
¿Paychu chay willawasqaykichik sullka wawqekichik kachkan? nispa.
Hinaspam Benjaminta nirqa:
Diosyá bendecisunki churilláy, nispa.
30Chaymi wawqenmanta waqanayay hapiruptin cuartonman yaykuruspan José waqakururqa. 31Waqasqanmanta upallaykuspanmi uyanta yakuwan upakuruspa hawaman lloqsimuspan nirqa:
Mikuyta qarakamuychik, nispa.
32Joseypaqmi servirqaku sapaq mesapi, wawqenkunapaqñataqmi sapaq mesapi, sapaq mesapitaqmi paywan kuska mikuq Egipto runakunapaqpas. Egipto runakunaqa hebreo runakunawanqa manam kuskaqa mikuqkuchu, paykunapaqqa millakuypaqmi karqa. 33Joseymi wawqenkunata chimpanpi tiyachirqa, piwimanta qallaykuspa sullkakama, chaymi wawqenkuna admirasqallaña qawanakurqaku. 34Hinaspam mesanmanta paykunaman mikuyta haywarqa, Benjaminmanñataqmi wawqenkunapamantapas aswan achkata qaraykachirqa. Chaymi Joseyqa wawqenkunawan kuska kusisqallaña tomarqaku.
Currently Selected:
Génesis 43: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012