Gálatas 3
3
Iñiyllawan salvasqa kanamanta
1¡Yaw, Galacia lawpi kaq mana yuyayniyuqkuna! ¿Pitaq umacharusurqankichik cheqap kaqta mana kasukunaykichikpaq? Qamkunamanqa willarqaykikuñam Jesucristo chakatasqa kasqanmanta. 2Kay tapusqay contestawanaykichiktam munani: ¿Chuya Espiritutaqa chaskirqankichik leyta kasukuspachu, icha Jesucristomanta allin noticiata willakuptinku iñiywan uyarispachu? 3¿Paqway mana yachayniyuqchu rikurirunkichik? Espirituman hina qallarispachu, kunanqa aychaman hinaña tukurunkichik. 4¿Yanqapaqchum tukuy imata ñakarirqankichik? ¡Amayá yanqapaqqa kachunchu! 5Diosmi Espiritunta qosunkichik hinaspa qamkuna ukupi milagrokunata ruwan ¿imanasqataq kaykunata ruwan? Manam leyta kasukusqaykichikraykuchu, aswanqa Jesucristomanta uyarispa payman iñisqaykichikraykullam.
6 #
Gn 15.6; Ro 4.3. Diosman iñispallam Abrahamqa mana huchayuqpaqña chaskisqa karqa. 7#Ro 4.16.Chaynaqa, yachaychikyá, Diosman iñispa hapipakuqkunaqa Abrahampa cheqap mirayninmi kanchik. 8#Gn 12.3.Qellqapiqa rimarqañam iñikuptillanku mana judío kaqkunatapas mana huchayuqpaqña Diospa chaskisqan kanankumanta. Chaynapim ñawpaqmantaraq kay allin noticiakunata Abrahamman Diosqa nirqaña:
Kay pachapi llapallan nacionkunam qamrayku bendecisqa kanqa, nispa.
9Chaynaqa, haykam Abraham hina iñikuqkunaqa paywan kuskam bendecisqa kanqaku.
10 #
Dt 27.26. Haykam leyman hapipakuqkunaqa ñakasqam kachkanku. Chuya Qellqam nin:
“Pipas kay qellqapi leyta mana lliwta kasukuqqa Diospa ñakasqanmi kanqa”, nispa.
11 #
Hab 2.4. Chaynaqa, Diosqa pitapas mana huchayuqpaqqa chaskin, manam leyta kasukusqankuraykuchu. Chuya Qellqapim kaynata nin:
“Allin ruwaq runaqa iñisqanraykullam kawsanqa”, nispa.
12 #
Lv 18.5. Leyqa manam iñiymantachu qallarimurqa, aswanqa kaynatam nin: “Pipas leyta cumpliqqa, chayraykum kawsanqa”, nispa.
13 #
Dt 21.23. Leypa ñakawasqanchikmantam Cristo librawarqanchik. Paymi ñoqanchikrayku ñakasqa karqa. Chuya Qellqapim kaynata nin:
“Qerupi warkusqa wañuq runaqa ñakasqayá kachun”, nispa.
14Kaykunaqa pasakurqa Abrahamman Diospa prometesqan bendicionta mana judío kaqkunapas Jesucristontakama chaskinankupaq, chaynapi Diospa promesanman hina iñiyllawan Chuya Espirituta llapallanchik chaskinanchikpaqmi.
Leymantawan promesamanta
15Wawqe-panillaykuna, runapa vidanwan tupanachispam yachachisqaykichik: Sichum huk runa contratota ruwaruspa firmaruptinqa manañam pipas imatapas yapanmanchu nitaq yanqachanmanchu. 16#Gn 12.7.Diosmi Abrahammanwan, mirayninman prometekurqa. Chay promesakunapiqa manam “miraynikikunaman” ninchu aswanqa “miraynikiman” ninmi. Manam achka runakunamantachu rimachkan, aswanqa huk runallamantam, payqa Cristom. 17#Ex 12.40.Kaynatam niyta munaykichik: Diosqa Abrahamwan pactota ruwaspanqa cumplinanpaqmi prometekurqa. Chayraykum tawa pachak kimsa chunka watamantaña Moisesman ley qosqanqa, Diospa ñawpaq prometekusqantaqa mana yanqachanmanchu. 18#Ro 4.14.Sichum Dios salvanman runakunata kamachikuykunata kasukuptillanku hinaptinqa manach promesa hinañachu kanman. Diosqa promesanman hinam Abrahammanqa tukuy imata qorqa, manam imatapas ruwasqanraykuchu.
19Hinaptinqa ¿imapaqtaq leyqa servinman? Leytaqa qepatañam qowarqanchik, llapa runakunapa mana kasukuq kasqanta qawachinanpaq. Chay leyqa karqa, prometekusqanman hina Abrahampa miraynin Jesús hamunankamallam. Diosmi angelnintakama Moisesman leyta qorqa, chaynapim Moisesqa Diostawan runakunata allinyanachiq karqa. 20Allinyanachiq runaqa manam hukllatachu allinyanachin aswanqa iskaytam. Diosmi ichaqa huklla.
Moisespa leyninqa imapaqmi kasqanmanta
21Moisespa kamachisqankunaqa ¿Diospa promesanpa contranpichu kachkan? ¡Manapunim! Manam ima leypas kanchu chayta kasukuspanchik wiñay kawsananchikpaqqa. Chayna kaptinqa, chaywanchiki cheqapta mana huchayuqpaqña Dios chaskiwachwan karqa. 22Qellqapa nisqanman hinaqa, lliwmi huchapa chaqnasqan kachkanchik. Chaynapim Diospa promesantaqa Jesucristoman iñiqkunalla chaskinchik.
23Iñiy manaraq hamuchkaptinqa, Moisespa leyninmi presota hina hapirayawarqanchik, chaynaqa karqanchik Cristoman iñikunanchikpaq reqsichiwananchikkamam. 24Warmakunata pusachkaq hinallam leyqa Cristoman pusawarqanchik, chaynapi payman iñikuspallanchik mana huchayuqpaqña Diospa chaskisqan kananchikpaq. 25Kunan iñiy chayaramuptinmi ichaqa manaña Moisespa leyninñachu pusawanchik.
26Jesucristoman iñikuspaqa llapallaykichikmi Diospa churinña kankichik. 27Jesucristoman hukllawakuspa llapallan bautizakuqkunaqa payman rikchakuqñam kachkankichik. 28Jesucristopiqa hukllañam kanchik, manam imananchu judío kaypas otaq mana judío kaypas, esclavo kaypas otaq mana esclavo kaypas, qari kaypas otaq warmi kaypas. 29#Ro 4.13.Jesucristopaña kaspaqa, Abrahampa miraynin hinañam kankichik, chayraykum Abrahamman Diospa prometesqan herenciatapas chaskinkichik.
Currently Selected:
Gálatas 3: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
