Éxodo 39

Sacerdotekunapaq pachakuna ruwasqankumanta

(Ex 28.1-43)

1Santuariopi servikunanpaqmi bordasqa pachakunata morado qaytumanta, grosella qaytumanta hinaspa guindo qaytumanta ruwarqaku. Ruwarqakutaqmi Aaronpa santuariopi servikunan pachankunatapas; chaykunataqa ruwarqaku imaynam Moisesman Tayta Diospa kamachisqanman hina.

2Efodtam qorimanta, morado qaytumanta, grosella qaytumanta, guindo qaytumanta hinaspa kawpusqa linomantam ruwarqaku. 3Qorita llaspayachispam qaytuta hurqorqaku hinaspam morado qaytuwan, grosella qaytuwan, guindo qaytuwan hinaspa llañu lino qaytuwan kuruyuqta awarqaku. 4Efodpa iskaynin hombronkunapim tirantenkunata huñunaspa hapinanpaq ruwarqaku. 5Efodpa hawanpi watakupas huk piezallamantam karqa: Qorimanta, morado qaytumanta, grosella qaytumanta, guindo qaytumanta hinaspa kawpusqa linomanta. Chaykunataqa Moisesman Tayta Diospa kamachisqanman hinam ruwarqaku. 6Ónice alhaja rumikunata labraspam Israelpa churinkunapa sutinta sellowan churachkaq hina qellqarqaku, hinaspam chay alhaja rumikunata qorimanta ganchoman hapichirqaku. 7Chay rumikunatam efodpa hombronman churarqaku, chaykunataqa churarqaku Israelpa mirayninkunata yuyarinankupaqmi. Moisesman Tayta Diospa kamachisqanman hinam ruwarqaku.

8Efodta ruwasqankuta hinam pectoraltapas ruwarqaku. Chaytaqa qorimanta, morado qaytumanta, grosella qaytumanta, guindo qaytumanta hinaspa kawpusqa linomantam ruwarqaku. 9Chay pectoralqa karqa cuadradom chawpinmanta iskayman patarasqa, tawan waqtankunam cuarto metrokama karqa. 10Chay pectoralpa hawanmanmi alhaja rumikunata tawa seqeta hapichirqaku. Punta kaq seqepim sardio, topacio hinaspa carbunclo alhaja rumikuna karqa. 11Iskay kaq seqepim esmeralda, zafiro hinaspa diamante alhaja rumikuna karqa. 12Kimsa kaq seqepim jacinto, ágata hinaspa amatista alhaja rumikuna karqa. 13Tawa kaq seqepiñataqmi berilo, ónice hinaspa jaspe alhaja rumikuna karqa. Chay alhaja rumikunam sapakama qorimanta corcheteman hapichisqa karqa. 14Israelpa chunka iskayniyuq churinkunapa sutinman hinam alhaja rumikunapas chunka iskayniyuq karqa. Sellowan churasqa hinam sapa ayllupa sutin huk rumipi qellqasqa karqa.

15Pectoralpa hawanpim qorimanta cadenakunata cordonta hina ruwarqaku. 16Ruwarqakutaqmi qorimanta iskay anillokunatawan iskay ganchonkunatapas, chay anillokunatam pectoralpa hanay patanpa esquinankunaman churarqaku. 17Hinaspam chay anillokunaman qorimanta iskay cadenakunata churarqaku. 18Iskaynin qori cordonkunapa puntantam efodpa tirantenkunapa ñawpaqninpi iskay ganchokunaman hapichirqaku. 19Qorimanta iskay anillokunatapas ruwarqakutaqmi, hinaspam pectoralpa iskaynin uran kaq esquinankunaman churarqaku, efodwan tupanakuq ukun law patanman. 20Ruwarqakutaqmi qorimanta iskay anillokunatapas, chaykunatam efodpa iskaynin tirantenkunapa ñawpaqninpi, uran kaq costurapa hichpanpi hinaspa efodpa watakunpa hananpi churarqaku. 21Hinaspam morado qaytumanta cordonwan pectoralpa anillonkunamanta efodpa anillonkunaman hapichirqaku, chaynapi pectoralqa efodpa watakunpa hawanpi kananpaq hinaspa efodmanta mana rakikunanpaq; chaynataqa ruwarqaku imaynam Moisesman Tayta Diospa kamachisqanman hina.

22Efodpa ukunpi kaq tunicatapas morado qaytumantam awarqaku; 23uma ustuchinapaq chawpinpi uchkuyuqta, mana llikikunanpaqñataqmi ribetesqa karqa. 24Chay tunicapa muyuriq patanpim granadaman rikchakuq adornokunata churarqaku. Chaykunataqa morado qaytumanta, grosella qaytumanta, guindo qaytumanta hinaspa kawpusqa linomantam ruwarqaku. 25Ruwarqakutaqmi qorimanta campanillakunatapas, hinaspam tunicapa patan muyuriqninpi churarqaku granadawan chawpichasqata. 26Servicio ruwanapaq tunicapa lliw patanmanmi huk granadata churarqaku qepanmanñataqmi huk campanillata, chaypa qepanmanñataqmi granadata, chayna qatinastam lliw muyuriqninpi churarqaku, imaynam Moisesman Tayta Diospa kamachisqanman hina.

27Aaronpaqwan churinkunapaqmi llañu lino qaytumanta tunicakunata awarqaku. 28Mitratapas, uma watakunatapas hinaspa calzoncillokunatapas kawpusqa linomantam ruwarqaku; 29chumpitapas sumaq kuruyuqta, kawpusqa linomanta, morado qaytumanta, grosella qaytumanta hinaspa guindo qaytumantam ruwarqaku, imaynam Moisesman Tayta Diospa kamachisqanman hina.

30Ruwarqataqmi sacerdoteta sapaqchananpaq qorimanta letrerotapas. Chay letreropim sellowan hina qellqarqaku “Tayta Diospaq sapaqchasqa”, niqta. 31Hinaspam morado qaytumanta huk cordonta churarqaku chaywan mitrapa hawanman watanankupaq, imaynam Moisesman Tayta Diospa kamachisqanman hina.

Santuario ruwayta tukusqankumanta

(Ex 35.10-19)

32Israelpa mirayninkunam santuario ruwayta tukururqaku, imaynam Moisesman Tayta Diospa kamachisqanman hina. 33Ruwayta tukuruspankum Moisesman entregarqaku: Santuariota, servicionkunata, corchetenkunata, tablankunata, listonninkunata, pilarninkunata, toqoyuq tiyanankunata, 34carneropa pukaman teñisqa qalasninmanta qatanta, fino qalaskunamanta qatanta, “Chuyay-chuyay” lugarmanta “Chuya” lugarta rakinaq velota, 35Diospa pacto ruwasqan Arcata, varillankunata, Arcapa tapanta, 36mesata servicionkunatawan, Diosman ofrecesqa tantata, 37qorimanta candelabrota seqella mecheronkunatawan, llapallan servicionkunata, achkipaq aceiteta, 38qorimanta altarta, Diospaq sapaqchaspa tallinapaq kaq aceiteta, miski asnaq inciensota, santuariopa punkunpaq cortinata, 39broncemanta altarta, broncemanta rejillanta, varillankunata, llapallan servicionkunata, lavatoriota, lavatoriopa tiyananta, 40patiopa cortinankunata, pilarninkunata, toqoyuq tiyanankunata, patiopa punkunpaq cortinata, waskakunata, estacankunata hinaspa Diosman asuykuna carpapi servichikunapaq llapallan serviciokunata. 41Qorqakutaqmi santuariopi servikunanpaq awasqanku pachakunatapas. Sacerdote Aaronpa chuya pachankunatawan churinkunapa pachankunatapas.

42Tukuy chaykunatam Israelpa mirayninkuna ruwarqaku imaynam Moisesman Tayta Diospa kamachisqanman hina. 43Tukuy chaykunata, Tayta Diospa kamachisqanman hina ruwarusqankuta qawaykuspanmi Moisés bendeciykurqa.

Currently Selected:

Éxodo 39: RCHQ2

Highlight

Copy