Éxodo 38

Bronce altarta ruwasqankumanta

(Ex 27.1-8)

1Bezaleelqa ofrenda kañana cuadrado altartapas acacia tablamantam ruwarqa, tawan lawninmi iskay metro cuartonkama karqa, sayayninñataqmi huk metro cuarton karqa. 2Chay altarpa tawan esquinanpim waqrachakunata ruwarqa. Altartawan waqrachankunataqa huk piezallanmantam ruwarqa. Chay altartam broncewan llusirqa. 3Ruwarqataqmi uchpa hoqarina mankankunatapas, palankunatapas, tazonninkunatapas, trinchenkunatapas chaynataq ninapaq kallanankunatapas. Chay serviciokunataqa lliwtam broncemanta ruwarqa. 4Malla hina rejillastapas broncemantam ruwarqa, chay rejillastam altarpa uku chawpinpi churarqa. 5Rejillaspa puntankunaman varillakunata ustuchinanpaqmi chulluchisqa broncemanta tawa anillokunata ruwarqa. 6Chay varillakunataqa acacia kaspimantam ruwarqa hinaspam broncewan llusirqa. 7Chay varillakunatam altarpa waqtanpi kaq anillokunapa ukunta pasachirqa, chaykunawan altarta apanankupaq; altarpa ukunqa uchkum karqa hinaspa tablamanta ruwasqam karqa.

Broncemanta lavatorio ruwasqanmanta

(Ex 30.18)

8 # Ex 30.18. Diosman asuykuna carpapa punkunpi servikuq warmikunapa bronce espejonkunamantam huk lavatoriota Bezaleel ruwarqa, chay lavatoriopa tiyananpas hina broncellamantam karqa.

Santuariopa muyuriqninpi patiomanta

(Ex 27.9-19)

9Bezaleelqa ruwarqataqmi carpapa #38.9 Kay patiopa huknin sutinmi karqa “Atrio”.pationtapas. Chay patiopa alleq lawninpi cortinankunatam kawpusqa linomanta tawa chunka pichqayuq metro sayayniyuqta ruwarqa. 10Iskay chunka pilarninkunatawan iskay chunka toqoyuq tiyanankunatapas broncemantam ruwarqa, pilarkunapa ganchonkunatawan varillakunatañataqmi qollqemanta ruwarqa. 11Ichoq lawninpi patiopa cortinankunatapas tawa chunka pichqayuq metro sayayniyuqtam ruwarqa. Iskay chunka pilarninkunatawan toqoyuq tiyanankunatapas broncemantam iskay chunkata ruwarqa. Pilarkunapa ganchonkunatawan varillankunatapas qollqemantam ruwarqa. 12Carpapa qepan law otaq intipa seqaykunan law pationtañataqmi iskay chunka iskayniyuq metro parten sayayniyuqta ruwarqa. Cortinankunatapas hina chayna sayayniyuqllatam ruwarqa. Pilarninkunatawan toqoyuq tiyanankunapas chunkatakamam ruwarqa, pilarkunapa ganchonkunatawan varillankunatapas qollqemantam ruwarqa. 13Punku law otaq intipa qespimunan law patiopa cortinantañataqmi iskay chunka iskayniyuq metro partenta ruwarqa. 14Punkupa kaylaw waqtanpi kaq cortinakunataqa yaqa qanchis metrotam ruwarqa, pilarninkunatawan tiyanankunatapas kimsatakamam ruwarqa. 15Punkupa waklaw waqtanpi kaq cortinatapas qanchis metro sayayniyuqtam ruwarqa, pilarninkunatawan toqoyuq tiyanankunatapas kimsatakamam ruwarqa. 16Patiopa muyuriqninpi llapallan cortinakunataqa kawpusqa linomantam ruwarqa. 17Pilarkunapa toqoyuq tiyanankunatapas broncemantam ruwarqa, pilarkunapa ganchonkunatawan varillankunatapas qollqemantam ruwarqa, chay pilarkunapa puntantapas qollqewanmi llusirqa. Patiopa llapallan pilarninkunaqa moldurayuqkamam karqa.

18Patiopa punkunpi cortinatapas morado qaytumanta, grosella qaytumanta, guindo qaytumanta hinaspa kawpusqa linomanta suma-sumaq bordasqata ruwarqa, chay cortinapas isqon metro largoyuqmi karqa, sayayninñataqmi iskay metro parten, chay cortinakunatapas patiopa cortinankunapa sayaynin sayayniyuqtam ruwarqa. 19Pilarninkunatawan toqoyuq tawa tiyanankunatapas broncemantam ruwarqa, ganchonkunatawan anillonkunatapas qollqemantam ruwarqa, pilarkunapa puntantapas qollqewanmi llusirqa. 20Carpapa estacankunatapas hinaspa patiopa muyuriqninpi estacakunatapas lliwtam broncemanta ruwarqa.

Santuariota ruwanankupaq metalkunamanta

21Moisés kamachikuptinmi Leviypa mirayninkuna sacerdote Aaronpa churin Itamarpa yanapasqan, Diospa pacto ruwasqan Arcata waqaychana carpata ruwaypi hayka materialkunam yaykusqanta cuentata hurqorqaku.

22Judá ayllumanta kaq Hurpa willkan hinaspa Uripa churin Bezaleelqa ruwarqa Moisesman Tayta Diospa lliw kamachisqanman hinam. 23Bezaleeltam yanaparqa Dan ayllumanta kaq Ahisamacpa churin Aholiab. Aholiabmi karqa rumikunapi letrakunata ruwaq, dibujaq, morado qaytuwan, grosella qaytuwan, guindo qaytuwan hinaspa llañu lino qaytuwan bordadokuna ruwaq.

24Carpata ruwananpaq qorimanta ofrenda qosqankum karqa isqon pachak soqta chunka pichqayuq kilo cuarton. Chaynaqa, santuariopi pesoman hinam karqa.

25Runakunata yupaspa qollqe huñusqankuñataqmi karqa kimsa waranqa kimsa pachak chunka isqonniyuq kilo parte masnin. Chaynaqa, karqa santuariopi pesoman hinam. 26#Ex 30.11-16.#Mt 17.24.Iskay chunka watayuqmanta hanaymanmi runakuna yupasqa karqaku soqta pachak kimsa waranqa pichqa pachak pichqa chunka. Paykunam sapakama qorqaku pichqa gramo parten qollqeta. Chayqa karqa santuariopi pesoman hinam. 27Kimsa waranqa kimsa pachaknin kilo qollqetam chulluchirqaku santuariopaq chaynataq cortinapa toqoyuq tiyanankunata ruwanankupaq. Chay qollqemantam toqoyuq pachak tiyanakunata ruwarqa. Sapa tiyanam kimsa chunka kimsayuq kilo qollqeta llasarqa. 28Chunka isqonniyuq kilo parten qollqewanñataqmi, pilarkunapa ganchonkunatawan varillankunata Bezaleel ruwarqa, hina chay qollqewantaqmi pilarkunapa puntankunatapas llusirqa.

29Bronce ofrendañataqmi karqa iskay waranqa kimsa pachak kimsa chunka soqtayuq kilo masnin. 30Chay broncemantam Diosman asuykuna carpapa punkunpa toqoyuq tiyanankunata, altarta, rejillanta hinaspa altarpa llapallan servicionkunata, 31patiopa toqoyuq tiyanankunata, patiopa punkunpa tiyanankunata, carpapa llapallan estacankunata hinaspa santuariopa muyuriqninpi llapallan estacakunatapas ruwarqa.

Currently Selected:

Éxodo 38: RCHQ2

Highlight

Copy