Éxodo 34

Musoq tabla rumikunamanta

(Dt 10.1-5)

1Moisestam Tayta Dios nirqa:

Iskay tabla rumikunata labray punta kaqkunata hina, ñuturusqayki tabla rumikunapi qellqatam musoqmanta qellqasaq. 2Paqarinpaq alistakuy, paqarinmi Sinaí orqopa puntanman seqanki, chaypim ñoqawan tupasunchik. 3Qanwanqa amam pipas seqamunqachu, amataqmi pipas chay orqomanqa rikurimunqachu. Chay orqopiqa amataqmi ovejatapas nitaq vacatapas michinqakuchu, nispa.

4Chaymi Moisés, iskay tabla rumikunata punta kaqta hina labrarqa, hinaspam Tayta Diospa kamachisqanman hina tutapayta hatarispan Sinaí orqoman seqarqa. Labrasqan iskaynin tabla rumikunata aparikuspan. 5Tayta Diosñataqmi puyupi uraykamuspan Moiseswan karqa, hinaspam sutinta willarqa. 6Moisespa ñawpaqninta pasaspanmi Tayta Dios nirqa:

“¡Ñoqaqa Tayta Diosmi kani,

llakipayakuq, kuyapayakuq Diosmi kani,

ñoqaqa llampu sonqom kani,

mana chaylla piñakuruqmi kani,

cheqap kuyapayakuqmi kani!

7 # Ex 20.5-6; Nm 14.18; Dt 5.9-10; 7.9-10. Ñoqaqa waranqantin miraykunakama kuyapayakuqmi kani,

mana allin ruwaqtapas, mana kasukuqtapas,

huchallikuqtapas pampachaykuqmi kani.

Huchayuq runatam ichaqa,

Tayta-mamakunamanta qallaykuspa

willkanpa willkankunakama castigasaq”, nispa.

8Hinaptinmi Moisés, apurawman pampakama kumuykuspan hatuncharqa, 9hinaspam nirqa:

Señorlláy, cheqaptapuni kuyawaspaykiqa ñoqaykuwanyá riy. Señorlláy, llaqtaykiqa rumi sonqo runakunam, mana allin ruwasqaykutawan huchaykuta pampachaykuspayá runaykikunapaqña chaskiykullawayku, nispa.

Musoq pactomanta

(Dt 7.1-5)

10Tayta Diosmi nirqa:

Ñoqam llapallan runaykikunapa ñawpaqninpi pactota ruwasaq, kay pachapi nitaq maylaw nacionpipas mana pipapas ruwasqantam admirakuypaq milagrokunata ruwasaq, maymi qampa kasqaykipim llapallan Israel runakuna ñoqapa ruwasqayta rikunqaku, mancharikuypaqmi qanwan ruwasqaykunaqa kanqa.

11Kunan kamachisqayta kasukuychik, ñoqam ñawpaqnikichikmanta wischusaq amorreokunata, cananeokunata, heteokunata, ferezeokunata, heveokunata hinaspa jebuseokunata.

12Yaykunaykichik allpapi yachaqkunawanqa amam ima contratotapas ruwankichikchu, yanqañataqmi urmachisuqnikichik rumi hina kanmanku. 13#Dt 16.21.Aswanqa altarninkunatam tuñichinkichik, yupaychasqanku rumikunatapas pakipankichikmi, Asera sutiyuq idolonkutapas ñutunkichikmi.

14Amam qonqorakunkichikchu idolokunapa ñawpaqninpiqa; huk dioskunata yupaychanaykichiktaqa manam munanichu, ñoqa Tayta Diosqa celosom kani.

15Chay nacionpi runakunawanqa amam ima contratotapas ruwankichikchu, paykunaqa chuchumikaruq casada warmi hinam idolonkupaq animalkunata wañuchispa aychantapas mikuchisunkichikman. 16Yanqataq churikichikkunatapas chaypi kaq warmikunawan casarachiwaqchik, hinaptin chuchumikaruq casada warmi hina churikichikkunatapas diosninkunaman pusanman hinaspa chaykunataña yupaychachinman.

17 # Ex 20.4; Lv 19.4; Dt 5.8; 27.15. Yanqañataq ima metaltapas chulluchispa idolokunata ruwawaqchik.

Watapi fiestakuna ruwanankumanta

(Ex 23.14-19. Dt 16.1-17)

18 # Ex 12.14-20; Lv 23.6-8; Nm 28.16-25. Kamachisqayman hinam mana levadurayuq tanta fiestata ruwankichik, qanchis punchawmi mana levadurayuq tantata Abib sutiyuq killapi mikunkichik, chaytaqa ruwankichik chay killapi Egipto nacionmanta lloqsimusqaykichikraykum.

19 # Ex 13.2. Lliw piwi churikichikmi ñoqapaq kanqa, ñoqapaqtaqmi sapaqchanki vacaykikunapa, ovejaykikunapa hinaspa cabraykikunapa punta kaq orqo wawankunatapas. 20#Ex 13.13.Asnopa punta wawantañataqmi huk carnerowan cambianki, mana cambiaspaykiqa chay asnochapa kunkantam qewirunki. Piwi churikichiktapas cambiankichikmi, mana ofrendayuqqa amam pipas rikurimuwanqachu.

21 # Ex 20.9-10; 23.12; 31.15; 35.2; Lv 23.3; Dt 5.13-14. Soqta punchawmi llamkankichik, qanchis kaq punchawpim ichaqa samankichik, tarpuy kaptin otaq cosecha kaptinpas samankichikmi.

22 # Lv 23.15-21; Nm 28.26-31. # Lv 23.39-43. Pascua fiestamanta qanchis semananmanmi trigo cosecha qallariy fiestata ruwankichik, ruwankichiktaqmi cosecha tukuy fiestatapas. Chay fiestatam sapa wata, cosecha tukuyta ruwankichik.

23Watapim kimsa kutita qamkunamanta llapallan qarikuna asuykamuwanqa, ñoqa Tayta Diosmi, Israel runakunapa Diosnin kani. 24Ñawpaqnikichikmantam wakin nacionkunata wischuspay allpaykichikta mirachisaq. Watapi kimsa kutitakama qayllayman hamunaykichikkamaqa manam pipas allpaykichiktaqa hapikuykunqachu. Ñoqam Diosnikichik kani.

25 # Ex 12.10. Sacrificasqaykichik animalpa yawarnintaqa amam levadurayuq tantatawan kuskataqa ofrecewankichikchu; Pascua fiestapi animal wañuchisqaykichikpa aychantapas amataqmi paqarinnintin punchawkamaqa puchuchinkichikchu.

26 # Dt 26.2. # Dt 14.21. Allpaykichikpi wiñaqmanta punta cosechasqaykichiktaqa allin kaqnintam ñoqa Tayta Diospa wasiyman apamuwankichik.

Amam uña cabrachataqa mamanpa lechenpiqa yanunkichu.

Diospa pactonta Moisés qellqasqanmanta

27Moisestam Tayta Dios nirqa:

Kay nisqayta qellqay, kay nisqayman hinam qanwan hinaspa Israelpa mirayninkunawan pactoyta ruwani, nispa.

28Moisesmi Tayta Dioswan chay orqopi karqa tawa chunka punchaw tawa chunka tuta, manam mikurqachu nitaqmi yakutapas tomarqachu. Chaypim tabla rumikunapi pactonta otaq chunkantin kamachikuykunata Tayta Dios qellqarqa. 29Chaymantam Moisés Sinaí orqomanta uraykamurqa chunkantin kamachikuykunata iskay tabla rumikunapi marqarikuspan, ichaqa manam musyakurqachu Tayta Dioswan rimasqanrayku uyan kancharisqantaqa. 30Aaronwan Israelpa mirayninkunañataqmi Moisespa uyanta kancharichkaqta qawaykuspanku, mancharikuymanta mana asuykuyta atirqakuchu. 31Chaymi Moisés qayaptin Aaronwan llaqtapa kamachiqninkuna payman asuykurqaku, hinaptinmi paykunawan Moisés rimarqa. 32Chaymantam Israelpa llapallan mirayninkuna asuykaramuptinku Sinaí orqopi Tayta Diospa kamachimusqanman hina kamachirqa. 33Paykunawan rimayta tukuruspanmi Moisés huk velowan uyanta tapakuykurqa.

34Tayta Dioswan rimaq yaykuspanmi Moisés uyan tapakusqan velota lloqsimunankama hurqokuykuq, lloqsiramuspanñataqmi Tayta Diospa kamachimusqanta Israelpa mirayninkunaman willaq. 35#2 Co 3.7-16.Israelpa mirayninkuna, Moisespa uyan kanchariqta qawaptinkum payqa kasqallan tapakuykuq Tayta Dioswan rimaq yaykunankama.

Currently Selected:

Éxodo 34: RCHQ2

Highlight

Copy