Eclesiastés 12
12
1Jovenllaraq kaynikipiyá unanchaqnikimanta yuyariy,
sasachakuy punchawkuna manaraq chayaramuchkaptin,
yanqañataq chayna punchawkuna chayamuptin niwaq:
“Manam kusikuyta tariniñachu”, nispa.
2Intipa achkiynin manaraq tutayaruchkaptin,
killapa chaskakunapa kanchaynin manaraq tutayaruchkaptin,
parapa qepanta puyukuna manaraq kutiramuchkaptin.
3Chayamunqam punchaw
palaciota waqaychaq runakunapas katkatatanankupaq,
qari-qari runakunapas kumuykunankupaq,
molinokunapas asllayaruspa wichqakurunankupaq,
ventananta qawaqkunapas manaña rikunankupaq.
4Chay punchawpiqa
hawa lawman qawaq punkukunapas wichqakurunqam,
molinopa punrunyayninpas upallarunqam,
urpikunapas manam takinqañachu,
takikunapas manam uyarikunqañachu.
5Chay punchawpiqa
wichayman qespiytapas manchakunkim,
ñanpipas manchakuykunam kanqa,
almendras sachapas waytarunqam,
aqaruway urupas llasakunqam,
mikuy ganaspas chinkarunqam;
runaqa wiñaypaq yachananmanmi richkan,
wañuruptin waqaqkunapas callekunamantam muyupayamunqaku.
6Unanchaqnikitayá yuyariy
qollqe cadena manaraq tipiruchkaptin,
qori manka manaraq pakiruchkaptin,
puyñupas yakupa patanpi manaraq pakiruchkaptin,
yaku hurqona waskapas manaraq tipipakuruchkaptin.
7Ñutu allpapas manaraq allpaman kutiykuchkaptin,
espiritupas Diosman manaraq kutiruchkaptin.
8Predicadormi nirqa:
¡Tukuy imapas chinkaruqllam!
¡Imapas tukuruqllam! nispa.
Runapa imam ruwananmanta
9Predicadorqa, aswan yachayniyuq kasqanman hinam imam yachasqanta runakunaman yachachirqa. Sumaqta uyariykuspa, sumaqta qatipaykuspanmi achka sumaq yachachikuykunata qellqarqa. 10Predicadorqa anchatam kallpanchakurqa sumaq rimaykunata tariypi, chaynapi cheqap rimaykunata imam kaqta qellqananpaq.
11Yachayniyuqkunapa rimasqanqa ñawchi puntayuq kaspikuna hinam, yachachikuqkunapa rimasqanqa clavokuna hinam, chaynam michiqpa rimariyninqa. 12Chaynaqa, churilláy, kay yachachikuykunatayá chaskikuy. Librokuna qellqayqa manam haykapipas tukunmankuchu, llumpay estudiaypas cuerpotam pisipachin.
13Kay uyarisqayki yachachikuykunapa tukupayninqa kaymi:
Diosta manchakuspa kamachikuyninkunata kasukuy,
chayllam runapa ruwayninqa.
14Runaqa imataña ruwaspanpas,
allin kaqta otaq mana allin kaqtaña ruwaspanpas,
mana pipa rikusqantaña ruwaspanpas,
Diospa juzgasqanmi kanqa.
Currently Selected:
Eclesiastés 12: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012