Eclesiastés 10
10
Wakin yachachikuykunamanta
1Wañusqa chuspiqa perfumepa maynaña miski
asnaynintapas chinkarachinmi,
chaynam sumaq kawsakuq yachayniyuq runapa
pantaruyninpas tukuy ima allin ruwayninta chinkarachinman.
2Yachayniyuq runapa sonqonqa allin kaqkunallapim yuyaymanan,
mana yachayniyuq runapa sonqonmi ichaqa mana allin kaqkunallapi yuyaymanan.
3Mana yachayniyuq runaqa
ruwayninkunawanmi mana yachayniyuq kasqanta qawachikun,
rimayllanwanmi mana yachayniyuq kasqanta reqsichikun.
4Kamachikuqña qampaq piñakuruptinpas
qasillalla kaspa pacienciakuy,
pacienciakuymi ima pantaypaqpas hampiqa.
5Kay pachapim mana allinta rikurqani,
chay mana allinqa kamachikuqkunamantam hamun:
6Mana yachayniyuq runakunataraqmi
hatun llamkaykunaman churanku,
yachayniyuq runakunatañataqmi
taksan llamkaykunaman churanku.
7Rikurqanim esclavokunata caballopi puriqta,
rikurqanitaqmi reypa churinkunatapas criado hina chakiwan puriqta.
8Pipas uchkuta ruwaqqa
chay uchkumanmi wichiykunqa,
pipas perqa taqmaqqa
maqta uruwanmi kachurachikunqa.
9Rumita pakiqqa, rumiwanmi katurachikunqa;
pipas yantata chitqaqqa, waqtakurunmanmi.
10Hacha laqoyaruptin mana ñawchiyaykachispa llamkayqa kallpapaqmi,
imatapas yachaywan ruwaymi aswan allinqa.
11Maqta uruta manaraq allinta mansoyachichkaptin
mansoyachiqninta kachuruptinqa
manam imapipas servinqachu.
12Yachayniyuqpa rimasqankunaqa uyarinapaq hinam;
mana yachayniyuqpa rimasqanmi ichaqa
kikintapunipas sasachakuyman apan,
13payqa mana pasaqkunallata rimayta qallaykuspanmi
llutan rimaykunawanña tukurun.
14Mana yachayniyuq runaqa
ancha rimaysapam.
Imam pasakunanta mana pipas yachachkaspaqa,
¿pitaq willanman paymanta qepaman imam pasakunantaqa?
15Mana yachayniyuq runataqa
llamkasqanpas llumpaytam pisipachin,
llaqtaman riq ñantapas
payqa manam reqsinchu.
16¡Imaynaraq kanqa!
jovenllaraq reyniyuq nacionqa,
kamachiqninkunapas convidollapi sapa punchaw kaptinkuqa.
17¡Mayna kusisqam kanqa,
allin sonqoyuq reypa kamachisqan nacionqa!
¡Mayna kusisqam kanqa
kamachiqninkuna horallanpi mikuspa mana machakuptinkuqa!
18Qella kasqaqa
wasipa qatanpas tuñirunmi,
mana llamkasqaqa
wasipas tuñirunmi.
19Convidoqa saksasqa kanapaqmi,
vinopas kusisqa kanapaqmi,
qollqeñataqmi tukuy imatapas ruwanapaq.
20Reymantaqa amayá sonqollaykipipas mana allintaqa tanteaychu,
apumantaqa amayá sapallaykipipas mana allintaqa rimaychu,
yanqañataq rimasqaykita uyarispa alton pawaq urpikuna
willaykamunmanku.
Currently Selected:
Eclesiastés 10: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012