Deuteronomio 7
7
Israelqa sapaqchasqa llaqta kasqanmanta
(Ex 34.11-17)
1 #
Hch 13.19. Señornikichik Tayta Diosmi yachanaykichik allpaman pusaykususpaykichik qamkunamantapas hatun chaynataq atiyniyuq qanchis nacionkunata qayllaykichikmanta wischunqa; chay nacionkunam kaykuna: Heteokuna, gergeseokuna, amorreokuna, cananeokuna, ferezeokuna, heveokuna chaynataq Jebuseokuna. 2Maypacham Señornikichik Tayta Dios chay nacionkunata qoykusuptikichikmi paykunata venceruspa pasaypaqta chinkachinkichik, amam paykunawanqa ima contratotapas ruwankichikchu nitaqmi llakipayankichikpaschu.
3Amam paykunawanqa casarakunkichikchu, warmi churikichiktapas amam qari churinkuwanqa casarachinkichikchu, nitaqmi qari churikichiktapas warmi churinkuwanqa casarachinkichikchu. 4Yanqañataqmi churikichikta Tayta Diosmanta karuncharachispa diosninkunataña yupaychachinmanku, hinaptinqa Tayta Diosmi contraykichikpi piñakuspan qayllanmanta chaylla chinkarachisunkichikman.
5 #
Dt 12.3. Aswanqa paykunapa altarninkunatam tuñichinkichik, yupaychanankupaq rumimanta ruwasqanku pilarkunatapas pasaypaqtam pakipankichik. Asera idolonkutam ñutunkichik, lliw idolonkunatam kañankichik.
6 #
Ex 19.5; Dt 4.20; 14.2; 26.18; Tit 2.14; 1 Pe 2.9. Qamkunaqa Señornikichik Tayta Diospa sapaqchakusqan llaqtanmi kankichik. Tayta Diosmi kay pachapi llaqtakunamanta akllasurqankichik paypa kuyasqan llaqta kanaykichikpaq.
7Tayta Diosqa kuyasurqankichik hinaspa akllasurqankichik manam wakin nacionkunamanta hatun kasqaykichikraykuchu, qamkunaqa wakin nacionkunamantapas taksallam karqankichik.
8Tayta Diosmi qamkunata kuyaspa chaynataq ñawpaq taytaykichikman jurasqanta cumplispan, Egipto nacionpi esclavo kasqaykichikmanta hurqomusurqankichik, hinaspam hatun atiyninwan rey Faraonpa munaychakuyninmanta hurqomusurqankichik.
9Señornikichik Tayta Diospa cheqap Dios kasqantayá reqsiychik. Payqa kuyaqninkunawanqa chaynataq kamachikuyninkuna kasukuqkunawanqa waranqantin miraykamapas kuyapayarispa pacto ruwasqanta cumpliqmi. 10#Ex 20.5-6; 34.6-7; Nm 14.18; Dt 5.9-10.Pipas cheqniqninkunatam ichaqa kikinpuni chinkachinqa, imam ruwasqanman hinataqmi pagapunqapas.
11Chaynaqa, kunan kamachisqay estatutokunata, kamachikuykunata hinaspa decretokunatayá kasukuychik.
Kasukuqkunata Dios bendecisqanmanta
(Lv 26.3-13. Dt 28.1-14)
12Sichum kay uyarisqaykichik yachachikuykunata kasukuspa ruwayman churaptikichikqa Señorninchik Tayta Diosmi ñawpaq taytaykichikkunata llakipayaspan ruwasqan pactota cumplinqa.
13Payqa kuyasuspaykichikmi bendecisunkichik hinaspam mirachisunkichik. Bendecinqataqmi wawa-churikichiktapas, allpaykichikpa ruruntapas, trigoykichiktapas, vinoykichiktapas, aceitekichiktapas, vacaykichikpa hinaspa ovejaykichikpa uñankunatapas. Chaynataqa ruwanqa ñawpaq taytaykichikman qonanpaq jurasqan allpapim.
14Qamkunaqa llapallan nacionkunamantapas aswan bendecisqam kankichik. Qamkuna ukupiqa qaripas, warmipas manam qolluqqa kanqachu, animalnikichikpas manam machorraqa kanqachu.
15Tayta Diosmi qamkunamanta tukuy onqoykunata wischunqa, Egipto nacionman kachasqan onqoykunatapas manam qamkunamanqa chayachimunqachu. Aswanqa llapallan cheqnisuqnikichik runakunatam chay onqoykunawan ñakarichinqa.
16 #
Dt 11.13-17. Qamkunam ichaqa Señornikichik Tayta Diospa qosusqaykichik allpapi llaqtakunata chinkachinkichik, amam llakipayankichikchu, nitaqmi diosninkunatapas yupaychankichikchu, yanqañataqmi urmachisuqnikichik kanman.
17Ichapas qamkuna niwaqchik: “Kay nacionkunaqa ñoqanchikmantapas aswan achkam ¿imaynataqsi qarqoyta atichwan?” nispaykichik.
18Chaywanpas amam paykunataqa manchakunkichikchu. Rey Faraonwan chaynataq Egipto runakunawan Señornikichik Tayta Diospa tukuy ima ruwasqantam yuyarinkichik. 19Kaytam yuyarinkichik: Señornikichik Tayta Diosmi Egipto nacionmanta hatun milagrokunawan chaynataq admirakuypaq señalkunawan hurqomuwarqanchik, chaykunataqa rikurqankichikmi. Chaynatam manchakusqaykichik nacionkunatapas ruwanqa. 20Puchuqkunamanwan pakakuqkunamanñataqmi wayliskunata Señornikichik Tayta Dios kacharinqa, anchata mancharichispa chinkachinankama. 21Paykunapa qayllanpiqa ama katkatataychikchu. Qamkunawan kaq Señornikichik Tayta Diosmi manchakuypaq hatu-hatun Diosqa.
22Señornikichik Tayta Diosmi chulla-chullallamanta chay nacionkunata qayllaykichikmanta qarqonqa. Llapallan nacionkunata qarqoruynikichikqa manam allinmanchu, purun animalkunam contraykichikpi mirarunman. 23Kikin Señornikichik Tayta Diosmi chay nacionkunata makikichikman churanqa, hinaspam chinkachinankama pasaypaqta tuñirachinqa.
24Reyninkunatapas makikichikman churaykamuptinmi paykunapi munaychakunkichik. Wañuchispaykichikmi sutinkutapas chinkachinkichik kay pachapi manaña pipas yuyanankama. Manam pipas qamkunawan peleaspaqa vencesunkichikchu, aswanqa qamkunam chinkachinkichik.
25Llapa idolonkunatapas kañankichikmi, chay idolokunata llusichisqanku qorita qollqetapas amam munapayankichikchu, yanqam urmachisunkichikman, Señornikichik Tayta Diospa qayllanpiqa chaykunaqa millakuypaqmi. 26Millakuypaq kaqkunataqa amam wasikichikman apankichikchu, yanqam qamkunapas chinkachisqa kawaqchik. Chay millakuypaq kaqkunaqa chinkachisqa kananpaqmi churasqa kachkan, chayraykum chaykunataqa millakuypaqtaña qawankichik.
Currently Selected:
Deuteronomio 7: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
