Deuteronomio 28
28
Kasukuqkunaqa Tayta Diospa bendecisqan kanankumanta
(Lv 26.3-13. Dt 7.12-24)
1Sichum Tayta Diosta kasuspaykichik kunan willasqay kamachikuyninkunata ruwayman churaptikichikqa, paymi kay pachapi llapallan nacionkunamanta aswan reqsisqata ruwasunkichik. 2Tayta Diosta kasukuspaykichikqa tukuy kaykunawan bendecisqam kankichik: 3Llaqtapipas chaynataq chakrapipas bendecisqam kankichik.
4Tayta Diosmi churikichikkunata, cosechaykichikkunata, vacaykichikkunapa, ovejaykichikkunapa hinaspa tukuy animalnikichikkunapa uñankunatapas bendecinqa. 5Canastaykichikpas chaynataq masa poqochinaykichik artesapas bendecisqam kanqa. 6Mayta lloqsispaykipas kutiykamuspaykipas bendecisqam kanki.
7Tayta Diosmi enemigoykichikkunata vencechisunkichik. Huk ñanllantam contraykichikpi hamunqaku, ichaqa qanchis ñannintam qamkunamanta ayqenqaku.
8Tayta Diosmi taqekichiktapas, tukuy ima llamkasqaykichiktapas bendecinqa. Señornikichik Tayta Diosmi qosusqaykichik allpapi bendecisunkichik.
9Sichum kamachikuyninkunata ruwayman churaspa munasqanman hina kawsaptikichikqa, prometesusqaykichikman hinam Tayta Diosqa payllapaqña sapaqchasqan llaqtanta hina uywasunkichik. 10Chaynapim kay pachapi llaqtakuna yachanqaku Tayta Diospa llaqtanwan sutichasqa kasqaykichikta, hinaspam manchakusunkichik.
11Tayta Diosmi tukuy imatapas llimparichkaqta qosunkichik: Churikichikkunatam mirachinqa, mirachinqataqmi animalnikichikkunatawan cosechaykichikkunatapas. Chaynatam ruwanqa ñawpaq taytaykichikkunaman qosunaykichikpaq prometesqan allpapi. 12Kapuqninkunata kicharispanmi cielokunamanta allpaykichikman tiempollanpi parachimunqa, hinaspam tukuy ruwasqaykichikpi yanapasunkichik. Achka nacionkunamanmi prestankichik, qamkunam ichaqa mana pimantapas prestakunkichikchu. 13Tayta Diosmi munaychakuqta ruwasunkichik, qamkunapim ichaqa mana pipas munaychakunqachu; ñawpaqpim kankichik manam qepapichu. Chaynataqa ruwasunkichik kay willasqay Señornikichik Tayta Diospa kamachikuyninkunata kasukuspa ruwayman churaptikichikmi.
14 #
Dt 11.13-17. Chayna kanaykichikpaqqa kunan kamachisqaykunamantayá ama karunchakunkichikchu, amataq huk dioskunataqa yupaychankichikchu.
Mana kasukuqkunata Tayta Dios castigananmanta
(Lv 26.14-46)
15Sichum Señornikichik Tayta Diosta mana kasukuspaykichik kunan willasqay kamachikuyninkunatapas chaynataq yachachikuyninkunatapas mana ruwayman churaptikichikqa kay ñakaykunam haypamusunkichik: 16Llaqtapipas chaynataq chakrapipas ñakasqam kankichik. 17Canastaykichikpas, masa poqochinaykichik artesapas ñakasqam kanqa. 18Wawa-churikichikpas, cosechaykichikpas, vacaykichikkunapas, ovejaykichikkunapas chaynataq tukuy animalnikichikkunapa uñankunapas ñakasqam kanqa. 19Mayman lloqsispaykichikpas otaq kutiykamuspaykichikpas ñakasqam kankichik.
20Tayta Diosmi ima ruwasqaykichikpipas ñakasunkichik, muspachisunkichik hinaspa llakichisunkichik. Mana allinkunata ruwanaykichikpaq paymanta rakikusqaykichikraykum manapas unaypi pasaypaqta chinkarachisunkichik.
21Tayta Diosmi peste onqoykunata kachaykamuspa qosusqaykichik allpamanta chinkarachisunkichik. 22Kachaykamunqataqmi tisis onqoytapas, ñakarichikuq calenturatapas, punkipakuytapas, sinchi rupaytapas, usyaytapas chaynataq tarpukuynikichikpaq onqoykunatapas; chaykunam kay pachamanta chinkanayki punchawkama kanqa. 23Cielokunamanta manaña paramuptinmi allpaykichikpas pasaypaqta taqrayarunqa.
24Tayta Diosmi parapa rantinpi ñutu allpatawan aqotaña parachimunqa pasaypaqta chinkanaykichikkama. 25Tayta Diosmi enemigoykichikkunawan vencechisunkichik. Enemigoykichikpa contranpim huk ñanninta seqella lloqsinkichik, ichaqa qanchis ñannintam paykunamanta ayqenkichik. Llapa nacionkunapa munaychakunanñam kankichik. 26Ullachkukunawan purun animalkuna ayaykichikta mikuptinpas manam pipas manchachinqachu.
27Tayta Diosqa Egipto runakunata hinam chupuwan, amoqllowan, sarnawan chaynataq seqsipakuykunawan mana hampikuypas atinaykichikkama ñakarichisunkichik; 28ñakarichisunkichiktaqmi locoyaywan, ñawsayaywan chaynataq muspaypi hinaña kaywanpas; 29hinaptinmi chawpi punchaw kachkaptinpas tutayaypi hinaña llapchaykachastin ñawsa hina purinkichik. Ima ruwasqaykichikpas manam allinqa lloqsinqachu. Runakunam ñakarichisuspaykichik tukuy imaykichiktapas apakunqaku, ichaqa manam pipas yanapaqnikichik hamunqachu.
30Casaranaykipaq rimapayasqayki sipastapas hukmi abusarunqa. Wasita ruwaspapas manam chaypiqa yachankichu. Uvasta plantaspapas manam rurunta mikunkichu. 31Toroykitapas qayllaykipim nakanqaku, ichaqa manam aychanta mikunkichu. Wasikimantam asnoykita pusakunqaku ichaqa manam kutichipamusunkichu.
Enemigoykikunam ovejaykikunata qechusunki ichaqa manam pipas yanapaqniki hamunqachu. 32Churikikunatapas qawachkaptikim huklaw nacionniyuq runakunaman qoykunqaku. Paykunawan tupaykuyta anchallataña munaspaykipas manam ima ruwaytapas atinkichu. 33Chakraykimanta cosechasqaykikunatawan llamkaspa huñusqaykikunatapas mana reqsisqayki runakunam mikukunqaku. Sarutyasqa kaspam chaylla-chaylla ñakarinki. 34Tukuy chaykuna pasasuptikim locoyarunki. 35Tayta Diosmi moqoykikunapi, piernaykikunapi chaynataq uma puyuknikimanta chaki pampaykikama mana hampiy atina chupukunawan ñakarichisunki.
36Qampapas chaynataq ñawpaq taytaykikunapapas mana reqsisqan nacionmanmi, qamta chaynataq reynikitapas Tayta Dios pusachisunki. Chaypim kullumanta chaynataq rumimanta ruwasqa sapaq dioskunataña yupaychanki.
37Tayta Diospa pusachisusqayki nacionkunapim qanmanta rimaspanku asipayaspa burlakusunki. 38Achkatam tarpunki ichaqa aqaruway tukuruptinmi pisillata cosechanki. 39Uvastam plantanki, ichaqa urukuna tukurusqanraykum uvasnintapas mana pallankichu nitaqmi vinontapas tomankichu. 40Chakraykikunapim aceitunas sachaykikuna kapusunki, ichaqa rurunkuna kikillanmanta wichirusqanraykum aceitenwanpas mana llusikunkichu.
41Churikikuna kaqpas manam qanwanchu yachanqaku, huklaw nacionkunamanmi preso apasqa kanqaku. 42Llapallan sachaykikunatawan tarpukuynikikunatam aqaruwaykuna tukurunqa. 43Qamkunawan yachaq huklaw llaqtayuqkunam qamkunamantapas aswan munayniyuq kanqaku, qamkunañataqmi aswan-aswan chinkankichik. 44Paykunam prestasunkichik, qamkunam ichaqa mana prestankichikchu. Paykunam munaychakusunkichik, qamkunañataqmi paykunata servinkichik.
45Chaynaqa, chay ñakaykunam hayparuspa wañuchisunkichik. Señornikichik Tayta Diosta mana kasukusqaykichikraykum chaynataq willasusqaykichik kamachikuyninkunatawan yachachikuyninkunatapas mana ruwayman churasqaykichikraykum chaykuna puchukachisunkichik. 46Tukuy chay ñakaykunam qamkunapa chaynataq miraynikichikpa contranpipas admirakuypaq señal hina wiñaypaq kanqa.
47Tukuy imapas qosuqnikichik Tayta Diosta kusikuywan hinaspa tukuy sonqoykichikwan mana servisqaykichikraykum chaykunaqa chayamusunkichik. 48Tayta Diospa kachamusqan enemigoykichikkunatam yarqasqa, yakunayasqa, mana pachayuq hinaspa tukuy imamantapas wakchayasqa servinkichik. Wañunaykichikkamam fierro yugota apachichkaq hina paykunata Tayta Dios servichisunkichik.
49Tayta Diosmi kay pachapa patanpi kaq nacionta contraykichikpi pusamunqa. Paykunam pawachkaq anka hinaraq hamunqaku; rimayninkutapas manam entiendenkichikchu. 50Paykunaqa manchakuypaq rikchayniyuq runakunam. Yuyaqkunatapas chaynataq wawakunatapas mana llakipayaq runakunam.
51Paykunam animalnikichikkunata chaynataq kawsaynikichikkunatapas mikukunqaku. Qamkunapaqqa manam puchunqakuñachu trigota, vinota, aceiteta nitaq vacakunapa hinaspa ovejakunapa uñankunatapas, hinaptinmi yarqaymanta wañunkichik.
52Llaqtaykichikkunapa muyuriqninpim campamentonkuta sayachinqaku, chaynapim hapipakunayki qaqay-qaqay murallaykikunapas tuñinqa. Señornikichik Tayta Diospa qosusqaykichik allpata muyuruspam kayninta chayninta yaykumusunkichik. 53Hinaptinmi yarqaymanta kaspa Señornikichik Tayta Diospa qosusqaykichik churikichikkunatapas mikunkichik.
54Qamkuna ukupi llampu sonqo runapas manam wawqentapas llakipayanqachu, kuyay warmintapunipas chaynataq churinkunatapas nanay ñawinwanmi qawanqa. 55Hinaspam wañusqa churinpa aychan mikusqantapas mana qaraykunqachu. Enemigoykichikkuna muyurusuptikichikqa manam imapas mikunaykichikpaq kanqachu, paykunaqa llumpaytam ñakarichisunkichik.
56Qamkuna ukupi añañanka, niñatukuspa qala chakilla pampata mana saruy munaq warmipas kuyay qosantawan wawankunatam nanay ñawinwan qawanqa. 57#2 R 6.28-29; Lm 4.10.Hinaspam wachakusqan wawan mikusqantapas chaynataq kikinpa madrennin mikusqantapas mana qaraykunqachu, pakasqallapim kikillan mikurunqa. Enemigoykichikkuna muyurusuptikichikqa manam imapas mikunaykichikpaq kanqachu, paykunaqa llumpaytam ñakarichisunkichik.
58Sichum kay libropi qellqasqa yachachikuykunata mana kasukuptikichikqa, nitaq ancha reqsisqa manchakuypaq Señornikichik Tayta Diostapas mana manchakuptikichikqa, 59paymi qamkunaman chaynataq miraynikichikkunaman admirakuypaq manaña tukuy atiq hatun ñakariykunata hinaspa manchakuypaq mana hampiy atina onqoykunata kachaykamunqa. 60Egipto nacionpi manchakusqaykichik llapa castigokunatam qamkunamanpas kachaykamusunkichik, hinaptinmi chaykunawan ñakarinkichik.
61Tayta Diosqa kacharimusunkichiktaqmi kay kamachikuy libropi mana qellqasqa kaq onqoykunatawan ñakariykunatapas, hinaspam chaykunawan puchukachisunkichik.
62Chaynaqa, Israelpa mirayninkuna, cielopi chaskakuna hina achkallaña kachkaspapas, aschallañam puchurunkichik, Señornikichik Tayta Diosta mana kasukusqaykichikrayku. 63Imaynam Tayta Diosqa tukuy imapi bendecisuspaykichik chaynataq mirachisuspaykichik kusikurqa, chaynatam ñakarichisuspaykichikpas chaynataq wañuchisuspaykichikpas kusikunqa, chaynapim qosusqaykichik allpamanta qarqosqa kankichik.
64Tayta Diosmi llapallan nacionkunaman, kay pachapa patanmanta huknin patankama cheqechisunkichik. Chaypim qamkunapa chaynataq ñawpaq taytaykikunapa mana reqsisqan kullumanta hinaspa rumimanta ruwasqa idolokunataña servinkichik. 65Chay nacionkunapiqa purisqallaykichikpi kaspam samaytapas mana tarinkichikchu. Tayta Diosmi mancharisqallataña, weqe ñawintinta hinaspa llakisqallataña kawsachisunkichik.
66Vidaykichikpas wañuypa patanpi hinaña kaptinmi, tutapas punchawpas mancharisqalla kankichik. Manam yachankichikchu wañunaykichikta otaq kawsanaykichiktapas. 67Hatun manchakuytawan sasachakuyllata qawaspaykichikmi sapa pacha achikyayta ninkichik: “Amalaya tutaykurunmanña”, nispa. Tutaykuruptinñataqmi ninkichik: “Amalaya achikyarunmanña”, nispa.
68Tayta Diosmi nisurqankichik Egipto nacionman amaña haykapipas kutinaykichikpaq; ichaqa kikinmi barcokunapi kutichisunkichik, hinaptinmi esclavo kanaykichikpaq enemigoykichikkunaman munachikunkichik, ichaqa manam pipas rantiyta munasunkichikchu.
Currently Selected:
Deuteronomio 28: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
