Deuteronomio 13
13
Pantachikuq profetakunata chinkachinamanta
1Sichum qamkuna ukupi rikurirunman profeta tukuqkuna otaq revelacionninpi qawaq tukuqkunapas hinaspa imapas milagromanta otaq admirakuypaq kaqkunamanta nisunkichikman; 2chay milagro otaq admirakuypaq kaqpas cumplikuruptinñataq nisunkichikman: “Haku idolokunataña yupaychamusunchik” nispa, 3hinaptinqa amam kasunkichikchu. Chaywanqa Señornikichik Tayta Diosmi pruebasuchkankichik, cheqapchus icha manachus tukuy sonqoykichikwan, tukuy vidaykichikwan payta kuyasqaykichikta yachananpaq. 4Señornikichik Tayta Diosta qatispa payllata kasukuychik. Kamachikuyninkunata ruwayman churaychik, nisqankunata kasukuspa payllata yupaychaychik, payllata servispa ama haykapipas qepanchaychikchu. 5Chay Profeta tukuq otaq revelacionninpi qawaq tukuq runaqa wañuchisqam kanqa, chay runam Egipto nacionpi esclavo kachkaptikichik hurqomusuqnikichik Señornikichik Tayta Diosmanta rakisunaykichikpaq umachasurqankichik. Tayta Diospa ñanninmantam chay runaqa rakiyta munasurqankichik. Chayraykum qamkuna ukumanta chinkachinkichik.
6-8Sichum wawqekipas, qari churikipas, warmi churikipas, kuyay yanaykipas, llumpay kuyanakusqayki amistadnikipas, pakasqallapi nisunkiman idolonkunata ñawpaq taytaykikunapa mana servisqankunata yupaychanaykipaq, hinaptinqa amam kasunkichu, nitaqmi uyarinkichu. Chay idolokuna muyuriqnikipi kaq runakunapa diosnin kaptinpas otaq huklaw runakunapa diosnin kaptinpas amam kasunkichu nitaq uyarinkichu. Chay hikutasuqniki runataqa amam llakipayankichu, wañuchinankumantapas amam harkakunkichu nitaqmi pakankichikchu. 9Chay runataqa wañuchinkipunim, puntataqa qanmi wañuchiyta qallarinki, chaymantañam wakin runakunapas chaynata ruwanqaku. 10Egipto nacionpi esclavo kasqaykimanta hurqomusuqniki Señornikichik Tayta Diosmanta rakiy munasusqaykimantam wañunankama rumiwan chamqapanki. 11Chayta qawaspankum Israelpa llapallan mirayninkuna manchakunqaku, amaña yapamanta huchallikunankupaq.
12-13Sichum yachanaykipaq Señornikichik Tayta Diospa qosusqayki mayqan llaqtapipas uyarirunki pantachikuq mana allin runakunapa kayna nisqankuta: “Hakuchik mana haykapipas yupaychasqanchik idolokunataña servimusunchik” niqta, 14hinaspaqa sumaqtam qatipaykunkichik. Sichum rimasqankuman hina chay millakuypaq kaqkunata ruwaptinkuqa, 15chay llaqtapi runakunatam llapa animalnintinta espadawan wañuchinkichik, hinaspam chay llaqtapi tukuy imatapas pasaypaqta chinkachinkichik. 16Chay llaqtapa llapa kapuqnintam plazapa chawpinpi huñuruspaykichik llaqtantinta kañaykunkichik, Señornikichik Tayta Diospaq lliw kañana ofrendata hina. Chaynapim chay llaqta wiñaypaq purmachisqa kanqa, manaña huktawanqa hatarichisqa kanankama.
17Chay pasaypaq chinkachisqa kaqkunamantaqa amam imatapas hapikuykunkichikchu, chaynapim Tayta Diospas qamkunawan mana piñakunqachu, aswanqa kuyasuspaykichikmi achkallataña mirachisunkichik, imaynam ñawpaq taytaykichikkunaman prometesqanman hina. 18Chaynataqa ruwanqa kunan kamachisqayman hina Señornikichik Tayta Diosta kasukuspa kamachisqankunatapas ruwayman churaptikichikmi chaynataq paypa munasqanman hina kawsaptikichikmi.
Currently Selected:
Deuteronomio 13: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
