Daniel 3
3
Qorimanta idolota Nabucodonosor ruwachisqanmanta
1Rey Nabucodonosormi qorimanta idolota ruwachirqa, chaypa sayayninmi karqa yaqa kimsa chunka metro, anchonñataqmi yaqa kimsa metro karqa. Hinaspam kamachikurqa Babilonia lawpi Dura sutiyuq pampapi sayachinankupaq. 2Rey Nabucodonosormi qayachirqa gobernadorkunata, capitankunata, kamachikuqkunata, consejaqkunata, tesorerokunata, juezkunata hinaspa provinciankunapi lliw kamachikuqkunatapas, hamuspanku rey Nabucodonosorpa ruwachisqan idolota dedicanankupaq. 3Chaynapim chay nacionpi ancha reqsisqa runakunaqa chay idolopa ñawpaqninman huñunakamurqaku rey Nabucodonosorpa sayachisqan idolota dedicanankupaq. 4Willakamunanpaq reypa kamachisqanmi qayaykachakurqa kaynata:
Llapallan runakuna, lliw nacionkunamanta kaqkuna hinaspa rikchaqmana rimayniyuqkuna, uyariychik. 5Trompetata, qenata, arpata, antarata hinaspa tukuy rikchaq tocanakunata uyarispaykichikmi qonqorakunkichik reypa qorimanta sayachisqan idolota hatunchanaykichikpaq. 6Pipas chay idolopa ñawpaqninpi qonqorakuspa mana hatunchaqqa, chaypunillam rupachkaq hornoman wischusqa kanqa, nispa.
7Chaynapim llapallan huñunakuq runakuna, lliw tocanakuna tocasqankuta uyarispanku qonqorakurqaku, hinaspam reypa sayachisqan qorimanta idolota hatuncharqaku.
8Caldea runakunañataqmi chayman hapipakuruspanku rey Nabucodonosorman asuykurqaku judío runakunata acusanankupaq. 9Paykunam nirqaku:
Wiñaypaq kawsakuq reynillayku, 10qanmi kamachikurqanki trompetata, qenata, arpata, antarata hinaspa tukuy rikchaq tocanakunata uyarispa llapachallan runakuna qonqorakuykuspa qorimanta idolota hatunchanankupaq. 11Kamachikurqankitaqmi pipas qonqorakuspa mana hatunchaqqa chaypunilla rupachkaq hornoman wischusqa kananpaq. 12Reynillayku, ichaqa kachkanmi qampa kamachisqaykita mana kasukuq judío runakuna, paykunataqa Babilonia lawpi kamachikuqkuna kanankupaqraqmi churarqankipas, chayna kachkaspapas manam idoloykikunatapas nitaq qorimanta ídolo sayachisqaykitapas yupaychankuchu, paykunapa sutinmi: Sadrac, Mesac hinaspa Abed-negom, nispa.
13Chaymi rey Nabucodonosor sinchita piñakuspa Sadracta, Mesacta hinaspa Abed-negota pusachimurqa, paykunatam reypa ñawpaqninman chaylla pusaramurqaku. 14Hinaptinmi paykunata rey Nabucodonosor tapurqa:
¿Cheqapchu idoloykunata qamkuna mana yupaychankichik, qorimanta sayachisqay idolotapas manachu hatunchankichik? 15Chaynaqa, ¿listochu kachkankichik tocasqankuta uyariykuspa ruwachisqay idolopa ñawpaqninpi qonqorakunaykichikpaq hinaspa hatunchanaykichikpaq? Mana hatunchaspaykichikqa chaypunillam rupachkaq hornoman wischusqa kankichik. Hinaptinqa ¿yaqachu mayqan diospas makiymanta librarusunkichikman? nispa.
16Chaymi Sadracpiwan Mesac hinaspa Abed-nego kaynata nirqaku:
Kay niwasqaykikumantaqa manam imatapas nisqaykikuchu. 17Rupachkaq hornoman wischuykachiwaptikikupas yupaychasqayku Diosniykum librawanqaku, librawanqakutaqmi makikimantapas. 18Chaynaqa, reynillayku, manaña Diosniyku librawaptinkupas manam idoloykikunataqa yupaychasaqkuchu, nitaqmi qorimanta sayachisqayki idolotapas hatunchasaqkuchu, nispanku.
Jovenkunapa librasqa kasqankumanta
19Rey Nabucodonosormi uyanpas pukayanankama llumpa-llumpayta piñakururqa Sadracpa, Mesacpa hinaspa Abed-negopa contranpi, hinaspam kamachikurqa hornota imaynam caldeachinankumantapas qanchis kuti mastaraq caldeachinankupaq. 20Chaymantam tropankunapi kallpasapa soldadokunata kamachirqa Sadracta, Mesacta hinaspa Abed-negota chaqnaruspa rupachkaq hornoman wischuykunankupaq. 21Chaynapim chay kimsa jovenkunata soldadokuna chaqnaruspanku hina pachantillanta rupachkaq hornoman wischuykurqaku. 22Chaylla ruwanankupaq rey kamachikusqanraykum chaynataq hornopas llumpayta rupasqanraykum, chay jovenkuna wischuykuq soldadokunata lenwachkaq nina hayparamuspa wañurachirqa. 23Sadracwan, Mesacwan Abed-negoñataqmi hina chaqnasqa chay rupachkaq hornoman wichiykurqaku. 24Rey Nabucodonosorñataqmi chaylla hatarispan consejaqninkunata mancharisqallaña tapurqa:
¿Manachum kimsa runakunallata chaqnaruspa rupachkaq hornomanqa wischuykurqankichik? nispa.
Hinaptinmi paykuna nirqaku:
Arí reynillayku, chaynam, nispanku.
25Reyñataqmi nirqa:
Ñoqaqa qawachkani mana chaqnasqa tawa runakunatañam; paykunaqa rupachkaq ninapa chawpinpim mana imanasqa purikuchkanku, paykunawan puriq runaqa diosmanmi rikchakun.
26Chaynata niruspanmi rey Nabucodonosor hornopa punkunman asuykurqa, hinaspam qayakurqa:
Tukuy imapa hawanpi munaychakuq Diospa serviqnin Sadrac, Mesac, Abed-nego, lloqsimuychik, nispa.
Chaymi kimsanku rupachkaq nina ukumanta lloqsimurqaku. 27Kamachikuqkunawan, gobernadorkuna, capitankuna hinaspa consejaqkunañataqmi asuykuspanku paykunata qawaykurqaku ninapapas mana imanasqanta, chukchankupas mana qaspasqa kasqanta, pachankupas manam imanakusqachu, nitaqmi rupa-rupallatapas asnasqakuchu.
28Hinaptinmi rey Nabucodonosor chaylla nirqa:
Sadracpa, Mesacpa, Abed-negopa Diosnin hatunchasqa kachun. Paymi angelninta kachamurqa hapipakuqnin serviqninkunata libraykunanpaq. Arí, paykunaqa Diosnillankuta hatunchayta munaspankum ñoqapa kamachikusqaytapas mana kasukurqakuchu, wañuytapas mana manchakuspankum huk dioskunataqa mana yupaycharqakuchu. 29Chayraykum llapallan runakunata, llapallan nacionkunata chaynataq huk rikchaq rimayniyuq runakunatapas kamachini; Sadracpa, Mesacpa, Abed-negopa Diosninkupa contranpi rimaqkunaqa tisapasqam kanqaku, wasinkupas ispakuna raqaymanñam tikrasqa kanqa, paykunapa Diosnin hina kayna librakuykuqqa manam kanchu, nispa.
30Chaynapim rey Nabucodonosorqa, Sadracta, Mesacta, Abed-negota aswan atiyniyuq kanankupaqraq Babiloniapi churarqa.
Currently Selected:
Daniel 3: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
