Daniel 2
2
Rey Nabucodonosorpa mosqoyninmanta
1Iskay wataña munaychakuchkaspanmi rey Nabucodonosor mosqokururqa, chayraykum sonqon hukmanyaruptin manaña puñuytapas atirqachu. 2Hinaspam layqakunata, qatipaqkunata, qawaqkunata qayachirqa, qayachirqataqmi Caldea runakunamanta yachayniyuqkunatapas; chaynapim paykunaqa reypa qayllanman hamurqaku. 3Hinaptinmi paykunata rey nirqa:
Mosqorusqaypa imam ninanta mana yachaspaymi hukmanyasqa kachkani, nispa.
4Chaymi Caldeamanta kaq yachayniyuqkuna Aram law rimayninkuman hina reyta nirqaku:
Wiñaypaq kawsakuq reynillayku, imam ninanta willaykunaykupaqyá mosqosqaykita willaykuwayku, nispanku.
5Chaymi rey nirqa:
Ñoqaqa ñam tantearuniña; sichum mosqosqaytapas nitaq imam ninantapas mana willawaspaykichikqa tisapasqam kankichik, wasikichikpas ispakuna raqayñam rikurirunqa. 6Mosqorusqaytawan imam ninanta willaykuwaptikichikmi ichaqa hatunchaspay regalokunata qosqaykichik, qamkunataqa ancha reqsisqatam ruwasqaykichik; chaynaqa imam mosqosqaytawan imam ninanta willaykuwaychik, nispa.
7Chaymi paykuna yapamanta reyta nirqaku:
Reynillayku, qamyá niykuwayku imam mosqorusqaykita, hinaptinqa imam ninantapas willaykusqaykikum, nispanku.
8Reyñataqmi nirqa:
Ñoqaqa yachanipunim qamkunaqa tiempo pasachiy munasqaykichikta, qamkunaqa imam tanteasqaytapas yachankichikñam. 9Imam mosqorusqayta mana willawaptikichikqa llapallaykichikpaqmi huk castigolla kachkan, qamkunaqa tiempo pasarunanta munaspam llullakunata hinaspa yanqakunata niwanaykichikpaq tanteanakuchkankichik. Chaynaqa, imam mosqorusqayta niwaychik, chaynapim mosqoyniypa imam ninanta willaway atinaykichiktapas yachasaq, nispa.
10Chaymi reyta Caldeamanta kaq yachayniyuqkuna nirqaku:
Kay pachapiqa manam pipas kanchu qam reyniykupa mañakusqanta willakuy atiq runaqa, kunankamaqa manataqmi ima reypas, maynaña hatun kaspa otaq maynaña atiyniyuq kaspapas mañakusqaykita hinaqa, ima layqatapas, qawaqtapas nitaq Caldea lawpi yachayniyuqkunatapas mañakurqachu. 11Reynillayku, qampa mañakusqaykiqa ancha-ancha sasallañam, manam chaytaqa pipas willasunkimanchu. Atispaqa atinman dioskunallam, paykunaqa manam runakunawanchu yachanku, nispa.
12Chayta uyariykuspanmi reyqa llumpayta piñakururqa, hinaspam kamachirqa Babilonia nacionpi llapallan yachayniyuq runakunata wañuchinankupaq. 13Chaynata rey kamaykachikamuptinmi Danieltawan kimsan amigonkunatapas wañurachinankupaq maskarqaku.
Reypa mosqoyninta Daniel willakusqanmanta
14Reyta waqaychaq soldadokunapa capitannin Ariocmi, Babiloniapi yachayniyuq runakunata wañuchinanpaq lloqsirqa. Ichaqa Danielmi yachaywan sumaqta rimaspan 15Ariocta tapurqa:
¿Imaynanpitaq reyqa utqayllaman kay kamachikuyta hurqoramun? nispa.
Hinaptinmi Arioc imam pasakusqanmanta Danielman willarqa. 16Chaymi reypa qayllanman Daniel yaykuspan mañakurqa suyaykunanpaq, chaynapi reypa mosqorusqantawan imam ninanta willaykunanpaq. 17Wasinman kutiruspanmi Danielqa imam pasakusqanmanta Ananiasman, Misaelman hinaspa Azariasman willarqa, 18chay pakasqa kaqkunamanta hanaq pacha Diospa yanapakuyninta mañakunankupaq; chaynapi Babilonia nacionpi wakin yachayniyuqkunatawan kuskata mana wañurachinankupaq. 19Chay tutam Diospuni Danielman revelacionpi chay pakasqa kaqkunata qawachirqa, chaymi Danielqa hanaq pacha Diosta 20kaynata yupaycharqa:
Wiñaymanta wiñaykama
Diospa sutin bendecisqa kachun.
Paymantam hamun tukuy yachaykunapas,
paymantataqmi hamun tukuy atiypas.
21Payllam tiempokunatawan punchawkunatapas tikran,
payllam reykunata hurqon hinaspa churan,
payllam yachayniyuqkunaman yachayta qon,
payllataqmi yuyayniyuqmanpas yuyayta qon.
22Payllam sasa entiendena kaqkunata runakunaman yachachin,
pakasqa kaqkunatapas reqsichin.
Payqa tutayaypiña kaqkunatapas reqsinmi,
achkiypas paywanmi tarikun.
23Ñawpaq taytakunapa Diosnin,
qanmanmi graciasta qoyki,
qamtataqmi yupaychayki;
qanmi yachayta qowarqanki,
qamtaqmi atiytapas qowarqanki.
Kunanmi imam mañakusqaykuta reqsiykachiwankiku,
kunanmi reypa mosqorusqanta yachaykachiwankiku.
24Chaymantam Daniel rirqa Ariocwan rimaq. Paytam rey kamachirqa Babilonia nacionpi llapallan yachayniyuq runakunata wañuchinanpaq. Danielmi payta nirqa:
Amayá wañuchiychu Babilonia nacionpi yachayniyuq runakunataqa. Ñoqatayá reyman pusaruway mosqoyninpa imam ninanta willamunaypaq, nispa.
25Hinaptinmi utqayman Arioc pusarqa Danielta rey Nabucodonosorpa ñawpaqninman hinaspam kaynata nirqa:
Reynilláy, Judá nacionmanta preso hamuqkuna ukupim tariramuni mosqorusqaykipa imam ninantapas willakuyniki atiqta, nispa.
26Hinaptinmi Beltsasar sutiyuq Danielta rey tapurqa:
¿Yaqachum imam mosqorusqaytawan imam ninanta willaykuwankiman? nispa.
27Chaymi Daniel nirqa:
Chay pakasqa kaqkuna mosqorusqaykitaqa manam willayta atisunkimanchu yachayniyuq runakunapas, qawaqkunapas, layqakunapas, qatipaq runakunapas. 28Ichaqa kachkanmi hanaq pachapi Dios, payllam kayna pakasqa kaqkunataqa reqsichin, hinaspam qanmanpas reynilláy Nabucodonosor hamuq punchawkunapi imam pasakunanmanta reqsichisunki. Ñoqam mosqoynikipi visión chaskisqaykita willasqayki. 29Reynilláy, qanmi camaykipi kachkaspayki hamuq punchawkunapi imam pasakunanmanta yuyaymanachkarqanki, hinaptinmi pakasqa kaqkunata reqsichiq qanman willasurqanki. 30Chay pakasqa kaqkunataqa ñoqamanpas qawachiwarqam; chaytaqa qawachiwarqa manam llapallan kawsaq runamantapas aswan yachayniyuq kasqayraykuchu, chaytaqa qawachiwarqa chay mosqorusqaykipa imam ninanta qanman willanaypaqmi chaynataq tukuy imam yuyaymanasqaykita yachanaykipaqmi.
31Reynilláy, mosqoynikipim qawarqanki ñawpaqnikipi sayachkaqta hatunkaray kancharichkaq runa kaqllata hinaspa mancharikuypaq rikchayniyuqta. 32Umanmi kasqa qorimanta, qasqonwan brazonkunañataqmi qollqemanta, wiksanmanta siki chakankamañataqmi kasqa broncemanta. 33Piernankunañataqmi kasqa fierromanta, chakinkunañataqmi kasqa fierrowan mituwan taqrusqa.
34Qawachkaptikim huk rumi kikillanmanta kururakamuspan chay runaman rikchakuqpa fierromanta mitumanta taqrusqa chakinpi hapirurqa, hinaspam ñutururqa. 35Chaynapim chay fierropas, kañasqa mitupas, broncepas, qollqepas hinaspa qoripas lliw ñutu allpa hinallaña rikurirurqa; cosecha tiempopi wayrapa apasqan erapi tamo hinallañam rikurirurqa, chaynapim maypi kasqanpas manaña yachakurqachu. Chay runa kaqlla sayaqta ñuturuq rumim ichaqa kay pachapas huntaykuyta hatu-hatun orqoman tikrakururqa. 36Chaynatam reynilláy mosqorqanki. Kunanñataqmi willasqayki chaypa imam ninanta.
37Reynilláy, qamqa kanki reykunapapas reyninmi, hanaq pacha Diosmi qosurqanki nacionkunata munaychakuspa atiywan kamachinaykipaq chaynataq ancha reqsisqa kanaykipaq. 38Qosurqankitaqmi tukuy hinastinpi runakunatapas, animalkunatapas hinaspa alton pawaqkunatapas, chaykunapi munaychakunaykipaq. Reynilláy, chay sayaqpa qorimanta umanqa qanmi kanki.
39Qampa qepaykitam huk rey hatarimunqa, ichaqa kamachikuyninmi qampamanta menoslla kanqa, chaypa qepantañataqmi bronceman rikchakuq kimsa kaq munaychakuq hatarimunqa, hinaspam tukuy kay pachapi munaychakunqa. 40Chaymantañataqmi tawa kaq munaychakuq hatarimunqa fierro hina fuertellaña. Imaynam fierroqa tukuy imata pakipaspan ñutun, chaynam paypas wakin munaychakuykunata pakipaspan ñutupanqa.
41Reynilláy, rikurqankitaqmi chay sayaqpa chakinkuna hinaspa dedonkuna mitumanta parten, partenñataq fierromanta kasqantapas, chayqa chay munaychakuypa rakinasqa kananmantam nichkan; chaywanpas chay munaychakuypa partenqa kanqa fierro hina allin takyaqraqmi, qamqa fierrowan taqrunasqa mitutam rikurqanki. 42Imaynam chay sayaqpa chakinpa dedonkuna wakin karqa fierromanta wakinñataq kañasqa mitumanta, chaynam chay munaychakuypas wakin kanqa allin takyaq, wakinñataq pisi atiyniyuqlla.
43Reynilláy, qanmi fierrowan mitu chaqrusqata rikurqanki, chaynam chay munaychakuypiqa runakunapas taqrunakunqaku, ichaqa imaynam fierrowan mitu mana laqanakunchu chaynam runakunapas mana hukllawanakunqachu. 44Chay reykuna munaychakuchkaptinkum hanaq pacha Dios hatarichinqa wiñaypaq mana tuñichiy atina munaychakuyta, chay munaychakuypa hawanpiqa manam hukqa munaychakunqachu. Aswanqa chay munaychakuymi llapallan munaychakuykunata ñutupaspan wiña-wiñaypaq takyanqa. 45Qamqa reynilláy, rikurqankim orqomanta huk rumi lloqsiramuspan mana pipas kumpaykamuchkaptillan kururakamuspan fierrota, bronceta, kañasqa mituta, qollqeta hinaspa qoritapas ñutuparusqanta. Hatu-hatun Diosmi qanman hamuq punchawkunapi imam pasananmanta qawachisurqanki, chayraykum chay mosqorusqaykiqa cheqap, chaypa imam ninanpas cheqaptaqmi, nispa.
46Chayta rey Nabucodonosor uyariykuspanmi, Danielpa ñawpaqninpi pampakama kumuykuspan kamachirqa Danielman ofrendakunata ofrecenankupaq chaynataq inciensotapas qontichipunankupaq. 47Hinaspam Danielta nirqa:
Cheqaptapunipas qamkunapa Diosnikichikmi llapa dioskunapa Diosninqa, payqa reykunapapas Reyninmi, payllataqmi pakasqa kaqkunatapas reqsichin. Chayraykum qamqa kay pakasqa kaqkunata rikuykachiwanki, nispa.
48Danielta llumpayta hatunchaspanmi achkallaña regalokunata rey qorqa, hinaspam Babilonia lawpi gobernador kananpaq, chaynallataq chay nacionpi llapallan yachayniyuq runakunapa kamachiqnin kananpaq churarqa. 49Chaymantam reyta Daniel mañakurqa Sadracpaq, Mesacpaq hinaspa Abed-negopaq, hinaptinmi paykunata Babilonia lawpi kamachikuqkuna kanankupaq rey churarqa; Danielñataqmi reypa palacionpi qeparqa.
Currently Selected:
Daniel 2: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
