Daniel 11
11
1Media nacionpi rey Darío munaychakuyta qallarichkaptinmi, payta kallpanchaspay yanaparqani. 2Kunanmi ichaqa cheqap kaqta yachachisqayki:
Norte lawpi hinaspa sur lawpi reykunamanta
Persia nacionpiqa kimsa reykunaraqmi munaychakunqa, paykunapa qepantañataqmi tawa kaq rey munaychakunanpaq hatarimunqa, chay reyqa kimsantin reykunamantapas aswan apu-apum kanqa. Apullaña kasqanraykum ancha munaysapallaña kanqa, hinaspam llapallanta Grecia nacionpa contranpi hatarichinqa.
3Chaymantam llumpay qari tukuq rey hatarimunqa, payqa llumpay atiywan munaychakuspam munasqanta ruwanqa. 4Ichaqa chay munaychakuyninmi allinta richkaspan tawaman rakinasqa kanqa. Chay reypa munaychakuyninqa manam mirayninkunamanpas qosqachu kanqa, manataqmi ñawpaq tiemponpi hina ancha atiyniyuqchu kanqa. Chaynaqa, kanqa tawaman rakinasqa kaspa sapaq runakunapa munaychakusqanña kasqanraykum.
5Sur lawpi kaq reymi aswan atiyniyuq kanqa, ichaqa tropankunapa kamachiqninmi paymantapas aswan atiyniyuqraq rikurinqa, payqa atiyniyuq kasqanraykum achkallaña nacionkunapi munaychakunqa.
6Watakunapa risqanman hinam, iskayninku huk contratota ruwanqaku. Sur lawpi kaq reymi warmi churinwan casarachinqa norte lawpi kaq reyta, chaynapi iskayninku hawkalla kawsanankupaq. Ichaqa chay casarachisqan warmi churinta qosantinta, wawankutawan chaynataq waqaychaqninkunatawan kuskata wañurachisqankuraykum chay contrato ruwasqankuta yanqachakurunqa. 7Ichaqa chay warmipa hukkaqnin ayllunmi norte lawpi tropakunapa contranpi hatarirunqa, hinaspam norte lawpi reypa murallasqa llaqtanman yaykuruspa vencerunqa.
8Venceruspanmi diosninkunatapas, qori-qollqemanta alhajankunatapas Egipto nacionman apakunqa, hinaspam norte lawpi kaq reyta unay watakuna hawkallata saqeykunqa.
9Chaymantam norte lawpi reyqa, sur lawpi kaq reypa contranpi hatarinqa, ichaqa mana imayuqmi nacionninman kutinqa.
10Ichaqa norte lawpi reypa churinkunam piñakuspanku nana-nanaq tropakunata hatarichinqaku. Lloqlla hinaraq mastarikuspankum sur lawpi reypa murallasqa llaqtanman chayaruspanku huktawan atacanqaku.
11Norte law tropakunapa chayamusqanwanmi sur lawpi reyqa llumpayta piñakurunqa, hinaspam chay nana-nanaq tropakunawan peleaq lloqsispan pasaypaqta vencerunqa. 12Chay nana-nanaq tropakunata vencerusqanwanmi sur lawpi kaq reyqa llumpayta hatunchakurunqa, ichaqa waranqantin-waranqantin tropakunata wañurachichkaspanpas manam unaytachu munaychakunqa.
13Watakuna pasaruptinmi, norte lawpi reyqa, ñawpaqta nana-nanaq tropakuna huñusqanmantapas aswan achkataraq huñurunqa, hinaspam allin armasqa achkallaña tropankunawan sur lawman kutirinqa.
14Chay tiempopim, sur lawpi reypa contranpi achka runakuna hoqarikurunqaku. Paykunawantaqmi Israel llaqtaykimanta kaq mana allin runakunapas hatarinqaku, imaynam visionpi qawasqaykiman hina, ichaqa vencerachikunqakum.
15Norte lawpi rey hamuruspanmi, sur lawpi llaqtapa murallanpa qepanpi allpakunata huk hawaqllaman montorunqa, chayninta yaykuspam chay llaqtata vencerunqa. Sur law reypa tropankunaqa manam imayna kutichikuytapas atinqakuchu, akllasqa soldadonkunapas mana kallpayuqñam rikurirunqaku.
16Norte lawmanta hamuq reymi vencerachikuq enemigonkunawan munasqanta ruwanqa, manam pipas paypa contranpi sayariyta atinqachu. Chay sumaq allpapi munaychakuspam tukuy imata purmachinqa.
17Hinaspam sur law nacionpipas munaychakuyta munanqa, chaypaqmi sur lawpi reywan huk contratota ruwanqa; chay contrato allin lloqsinanpaqmi warmi churinwan casarachinqa, chaynataqa ruwanqa sur lawpi reypa munaychakuyninta tuñirachinanpaqmi, chaywanpas chay tanteasqankunaqa manam cumplikunqachu.
18Norte lawpi reyqa munapayanqataqmi lamar qochapa patanpi llaqtakunatapas, hinaspam guerrawan achkaqta vencerunqa. Ichaqa huk kamachikuqmi chay reypa hatunchakuyninta puchukarachinqa, hinaspam chay reyta penqayman churanqa. 19Chaymantam chay norte lawpi reyqa nacionninpi murallasqa llaqtanman kutikunqa, ichaqa kutisqanpim wañurunqa, hinaspam pasaypata chinkarunqa.
20Paypa rantinpi hatariq reyñataqmi munaychakuyninpi allinta takyananpaq impuesto cobraqta kachanqa, ichaqa manapas unaymantam wañurachinqaku, payqa manam guerrapichu nitaqmi piñanakuypichu wañunqa.
21Paypa rantinpim huk cheqnipay runa rey kananpaq hatarinqa, ichaqa manam reyta hinachu qawanqaku. Payqa qonqaymantam rikuriramunqa, hinaspam sakrillawan munaychakuyta qallarinqa.
22Payqa kallpasapallaña lloqlla hinam contranpi hatarimuqkunatapas pasaypaqta chinkarachinqa, paykunatawan kuskatam contrato ruwaq kamachikuqtapas wañurachinqa. 23Chay cheqnipay reyqa, paywan contrato ruwaqkunatapas engañaruspam aslla runayuq kachkaspapas vencerunqa. 24Tukuy imapa kasqanpi hawka kawsakuq llaqtakunamanpas yaykuruspanmi taytanpa chaynataq ñawpaq taytankunapa mana ruwasqankunata ruwanqa. Soldadonkunamanmi aypunqa guerrawan tukuy ima qechusqanta, aypunqataqmi qori-qollqe salteasqankunatapas. Payqa murallasqa llaqtakunata atacananpaqmi tanteanqa, chaywanpas chay tanteasqanqa manam unaypaqchu kanqa.
25Atiyninpi kallpanchakuspam achka nana-nanaq tropankunawan sur law reypa contranpi rinqa. Sur lawpi reypas nana-nanaq kallpasapa tropankunata huñuruspan guerraman yaykunqa, ichaqa runankuna qepancharuptinmi enemigonkuna venceyta mana atinqachu.
26Paytaqa mesanpi mikuqmasinkunallam wañurachinqaku, nana-nanaq tropankunapas lloqllapa apasqan hinam rikurirunqaku, chaynapim achkallaña soldadonkuna wañurunqaku. 27Chay iskay reykunaqa mana allin ruwanakuyllapi piensaspankum huk mesallapi tiyaykuspanku llullakunallata ninakunqaku, ichaqa yanqapaqmi chaykunata rimanakunqaku, Diospa nisqan tiempo manaraq chayamusqanrayku.
28Norte lawmanta hamuq reymi nacionninman kutikunqa guerrapi qechusqan qori-qollqekunata aparikuspan, hinaspanmi Diospa pacto ruwasqanpa contranpi hatarinqa. Payqa imam munasqankunata ruwaruspanmi nacionninman kutikunqa. 29Imam nisqan tiempo chayaramuptinmi sur lawman huktawan kutirinqa, ichaqa manam puntapi hinañachu vencenqa.
30Payqa Quitim lawmanta hamuq barcokunapa harkasqan kaspanmi hukmanyasqallaña kutirinqa. Diospa pacto ruwasqanpa contranpi llumpayllataña piñakuruspanmi millakuypaq kaqkunata ruwanqa, hinaspanmi Diospa pacto ruwasqan qepanchaqkunata yanapanqa.
31 #
Dn 9.27; 12.11; Mt 24.15; Mr 13.14. Soldadonkunapas Diospa santuarionpim chaynataq amparakuna wasipim millakuypaq kaqkunata ruwanqaku, Diospaq sapa punchaw animalkuna wañuchinankutapas harkakunqakum, hinaspam chaypa rantinpi millakuypaq kaqtaña ofrecenqaku.
32Chay reyqa, Diospa pactonta qepanchakuqkunatam sumaq sakrillawanña rimapayaspan rantiypaq-rantirunqa; Dios reqsikuqkunam ichaqa kallpanchakuspa kutipakunqaku.
33Llapa runakunamanta allin yachayniyuq kaqkunam achka-achka runakunata yachachinqaku, ichaqa tiempopa risqanman hinam wakiqninku guerrapi ñakarispa kañasqa kanqaku, wakinñataqmi imallankutapas qechurachikuspanku preso rinqaku.
34Chayna ñakarichisqa kachkaspankum asllapipas yanapasqa kanqaku, hinaptinmi iskay uya runakuna achkallaña paykunaman hukllawakurunqaku. 35Yachayniyuq runakunamantapas wakinmi qatikachasqa kanqaku, chayna ñakarichisqaqa kanqaku metal chulluchisqa hina chuyanchasqa kanankupaqmi. Paykunaqa mana allinmanta rakisqa kaspankum mana huchayuqña kanqaku. Chaynaqa, tarikunqaku tukupay tiempo chayamunankamam.
36 # 2 Ts 2.3-4. #
Ap 13.5-6. Norte nacionniyuq reymi tukuy imam munasqanta ruwanqa, hatun tukuspanmi kaynata ninqa: “Ñoqaqa llapallan dioskunapapas hawanpim kachkani”, nispa. Payqa Diospa contranpipas millakuypaq mana allinkunatam rimanqa. Payqa tukuy imapim allinllaña lloqsinqa Diospa piñakuynin payta hayparunankama. Diosqa imam tanteasqantaqa ruwanqapunim.
37Chay norte nacionniyuq reyqa, ñawpaq taytankunapa diosnintapas, warmikunapa yupaychasqan diostapas nitaq mayqan diostapas manam kaqpaqpas hapinqachu. Payqa llapallan dioskunamantapas aswan hatunpaqmi hapikunqa. 38Ichaqa murallasqa llaqtakunata waqaychaq diostam yupaychanqa, chay diostaqa ñawpaq taytankunapas manam reqsirqachu. Chay diostam qori-qollqewan, sumaq alhaja rumikunawan hinaspa ancha valorniyuq kaqkunawan yupaychanqa.
39Payqa rikchaqmana idolokunata yupaychaq tropakunawan yanapachikuspam, mana yaykuy atina murallasqa llaqtakunata vencenqa; reyninkupaq chaskiqnin runakunamanmi tukuy imata qonqa, chay runakunata hatunchaspanmi llaqtakunapi kamachikuq kanankupaq churanqa. Paykunamanqa yanapasqanmantam chakrakunata rakinanqa.
40Tukupay tiempo chayaramuptinmi, sur lawpi rey guerrawan hapirunqa norte lawpi reyta. Ichaqa norte lawpi reymi wayra-para hinaraq sur lawpi reypa contranpi mastarikunqa, guerrapaq carretankunawan, sillada tropankunawan, achkallaña barcokunawanmi chayarunqa; hinaspam lloqlla hinaraq achka llaqtakunata chinkarachinqa. 41Sumaq allpamanpas yaykuruspanmi achka-achka runakunata wañurachinqa; Edom nacionniyuq Moab nacionniyuq runakunam ichaqa paymanta ayqekunqaku, ayqekunqakutaqmi Amonpa mirayninmanta ancha reqsisqa runakunapas. 42Achka nacionkunapi munaychakuptinmi Egipto nacionpas mana lluptinqachu.
43Egipto nacionpa qori-qollqenkunatapas chaynataq ancha valorniyuq kapuqninkunatapas apakunqam. Libia nacionwan Etiopía nacionpas paytam servinqaku. 44Ichaqa intipa qespimunan lawmantawan norte lawmantam mancharikuypaq noticiakunata uyarirunqa, chaymi piñakuyllawanña lloqsinqa tukuy imatapas purmachispan achka runakunata wañuchinanpaq.
45Chay reyqa, carpankunatam lamar qochamanta Diospaq sapaqchasqa “kuyayllapaq moqoman” riq ñanpi sayachinqa. Ichaqa wañunan punchaw chayaramuptinmi manaña pipas yanapanqachu.
Currently Selected:
Daniel 11: RCHQ2
Highlight
Share
Compare
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
